![Xədicə İsmayıl: Keyfiyyətsiz ittihamları ilə intellektimizi təhqir edirlər](https://turan.az/resized/media/2015/main/022800108330-750-500-resize.webp)
- Söz istəyirəm
- 28 Fevral 2015, 13:59
- 64
Xədicə İsmayıl: Keyfiyyətsiz ittihamları ilə intellektimizi təhqir edirlər
Araşdırmaçı jurnalist Xədicə İsmayılın Kürdəxanı təcridxanasında qapalı keçirilən məhkəmədə söyləmək üçün hazırladığı son sözünü Azadlıq qəzeti dərc edib. Jurnalistin son sözünü təqdim edirik:
Bu il fevralın 23-də Kürdəxanıdakı Bakı İstintaq Təcridxanasında Xədicə İsmayıla hökm oxunub. Elman Türkoğlu işi ilə bağlı. Bundan əvvəl keçirilən prosesdə Xədicə xanım məhkəmədən iclasın açıq keçirilməsini tələb etmişdi.
Binəqədi Rayon Məhkəməsinin hakimi Sədrəddin Hacıyev onun və vəkilin vəsatətini nəzərə alacağını, növbəti prosesin açıq keçiriləcəyini bildirmişdi. Prosesdə iştirak etmək istəyənlərə (həm də jurnalistlərə) fevralın 23-də səhər ərizəylə Binəqədi Rayon Məhkəməsinə gəlmək mesajı göndərmişdi. Jurnalistlər və Xədicə xanımın ailə üzvləri deyilən vaxtda məhkəmə binasına gəlsə də, hakim qaçıb gizlənmişdi. Jurnalistlərəsə onun Kürdəxanıda olduğu deyilmişdi. Bundan sonra Kürdəxanıya gedən jurnalistlərə hakimin hələ gəlmədiyi bildirilmişdi. Beləliklə, hakimin yalanı üzə çıxmışdı. Prosesin yekununda Xədicə xanım 2500 manat cərimə olunmuşdu.
Vəkil Elton Quliyev isə Xədicə xanımın qapalı iclasa etiraz olaraq son söz deməkdən imtina etdiyini bildirmişdi.
Azadlıq qəzetinin əməkdaşı vəkilə müraciət edib və Xədicə Ismayılın məhkəmədə deyə bilmədiyi son sözlərinin nədən ibarət olduğunu öyrənib. Vəkil son sözü Xədicə xanımla birgə müzakirə etdiklərini və yadında qalanların təxminən aşağıdakı məzmunda olduğunu deyib.
“Hörmətli proses iştirakçıları, hörmətli hakim!
Mən bu gün bu məhkəmə prosesinin açıqlığı təmin olunmadan burada son söz söyləməliyəm. Əslində prosesin, mənə qarşı irəli sürülən ittihamın özü ilə bağlı deyəcəyim o qədər də çox deyil. Bu ittihamın mənə qarşı irəli sürülən digər ittihamlardan fərqi nədir ki? Bu ittihamlar da, onları irəli sürənlər də sadəcə prezident Əliyevin repressiya maşınının alətləridir. Əslində bu günə qədər uğrunda çalışdığımız amal da məhz həmin alətlərin insan ləyaqətinə zidd olan əməllərə məcbur edilməyəcəyi bir cəmiyyət qurmaq olub. Təəssüf ki, belə deyil və ölkəmiz üzəduranlar, yalançılar, vicdansız prokuror və hakimlər ölkəsinə çevrilib.
Dediyim kimi, bu ittihamın başqasından fərqi yoxdur. Mənim üçün nə fərqi var, məni hansı yalanla tutacaqlar.
Heç bir aidiyyətim olmayan “özünü öldürmə həddinə çatdırma” ittihamı olmur, “Azadlıq” radiosunun bütün fəaliyyətini qanunsuz elan edib məni qanunsuz sahibkarlıqda günahlandırmaları olsun, onlar da olmasa, yaymadığım məlumata görə böhtanda və təhqirdə ittiham olunmaq olsun.Detallar o qədər önəmli deyil, önəmli olan bircə məqam var. Bu qədər pulu, polisi, casusu, izləmə aparatları, xəfiyyə infrastrukturu olan hökumət niyə mənə qarşı bir düz-əməlli iş düzəldə bilmir. Mənə qarşı prosesdə Ilham Əliyev rejimini təmsil etməyə Elman Türkoğludan fərqli variant tapa bilmirlərsə, vay onların halına.
Ölkədə hər şey kimi repressiya aparatı da korrupsiyaya uğrayıb, Heydər Əliyevin vaxtilə tətbiq etdiyi pripiska fəndləri indi Ilham Əliyevə qarşı tətbiq olunur. Çox keyfiyyətsiz ittihamları və istintaqları ilə intellektimizi təhqir edirlər. Əslində, bəlkə də önündə bayraqdarın getdiyi bu proses mənə qarşı istifadə olunan işlərin, Leyla Yunus, Anar Məmmədli, Intiqam Əliyev, Seymur Həzi və başqalarının işləri arasında ən çox səy göstəriləndir. Necə deyərlər, yaxşısı budur. MTN, Prokurorluq, siz - Sədrəddin müəllim, ümumi səylərlə Elman Türkoğlunun əvəzinə sübut toplamaqla məşğul olmusuz, yenə də, təəssüf edirəm, ortaya bir şey çıxara bilməmisiniz.
Yoxdur sübutunuz. Hansı qərarı çıxaracaqsınız, özünüz bilərsiniz. Məni bu, hər şeydən az narahat edir. Mən təqsirli olmadığımı bilirəm, məni cəmiyyətdən nə qədər təcrid etsəniz də, cəmiyyət də mənim təqsirsiz olduğumu bilir. Mənə çıxardığınız, çıxaracağınız hökmlərin ağırlığı elə öz üzərinizdədir. Daşıyın daşıya biləcəyiniz qədər. Bircə onu bilirəm ki, xalq sizin yüklərinizi daşımayacaq sizin əvəzinizə. Manatla birgə devalvasiyaya uğrayacaq cinayətkar rejimin sabitliyi. Bu qədər". -03D-
-
- Söz istəyirəm
- 28 Fevral 2015 14:04
Söz istəyirəm
-
Gəncə şəhərində ünvanlı sosial yardımın təyinatı ilə bağlı yubanmalar yarandığı deyilir. Gəncə şəhərində yaşayan Hacıyev Vüqar Turana bildirib ki, artıq bir aydan çoxdur ki, ünvanlı dövət sosial yardım üçün Dövlət Sosial Müdafiə Fondunun Gəncə vahid əlaqələndirmə mərkəzinə müraciət etsə də, ona nə müsbət cavab, nə də imtina cavabı verilmir: "Əlaqəndirmə mərkəzinə zəng vurub soruşanda deyirlər ki, VEMTAS sistemi işləmir deyə, müraciətlərə baxılması və cavabların verilməsi mümkün deyil. Bir aydan çoxdur ki, Gəncədən müraciət edən adamlar konkret cavab ala bilmir".
-
Çin hökümətinin başlatdığı Bir yol, bir kəmər layihəsi Çinin müasir tarixinin əsas uğuruna çevrilib. Çin Xalq Respublikasının təşəbbüskarı olan layihəyə tərəfdaş ölkələrdəki fəaliyyəti yalnız ikitərəfli iqtisadi yüksəlişlə məhdudlaşmır, həmçinin Bir yol, bir kəmər-ə üzv olan dövlətlərdə Çinin xarici siyaəstinə dəstəkdir. Əlavə olaraq layihədə üzvlüyü olan ölkələr Çin üçün mühüm təbii resurs mənbəyidir. Azərbaycan da Çinin rəhbərlik etdiyi Bir yol, bir kəmər layihəsinin iştirakçılarından biri olaraq ikitərəfli münasibətlərin tərəqqisində mühüm rol oynayır. Belə ki, Rusiya-Ukrayna müharibəsinin başlanması ilə Rusiya ərazisinin Qərbə çıxışının bağlanmasından sonra Trans-Xəzər Beynəlxalq Nəqliyyat yolu Azərbaycanı əsas ticarət marşurut xətti edib. Həmçinin yaranan şərait qeyri-neft sektorun artırmaq və İkinci Qarabağ Müharibəsindən sonra xarici investisiyanın ölkəyə axınını planlaşdıran Azərbaycan üçün xeyirli nəticələnə bilər. Lakin, Çinlə münasibətlərdəki yalnış siyasət bir çox mənfi təsirlər də vəd edir.
-
İki il əvvəl Biləsuvar Rayon İcra Hakimiyyətinin və Əmək və Əhalinin Sosial Müdafiəsi Nazirliyinin nümayəndələri Birinci Qarabağ müharibəsinin qəhrəmanı, şəhid Şaiq Kəlbiyevin evinə gəliblər və hakimiyyətin bu ailə üçün yeni ev tikmək niyyətində olduğunu bildiriblər.
-
Dəyərli media mənsublarını, peşəkar və vicdanlı jurnalistləri məhbəsdən salamlayıram.
Rəy yaz