�YENİ AZƏRBAYCAN� QƏZETİNİN BAŞ REDAKTORUNA

Hörmətli Hikmət Babaoğlu,
Müxbiriniz Aqşin Şahinoğlunun yazdığı həcv "Yeni Azərbaycan" qəzetində işıq üzü gördüyü zaman mən Kürətrafındakı daşqın ərazisində həmvətənlərimizin problemləri ilə məşğul idim.
Avqustun 14-də sizin qəzetdə "Mehman Əliyevi danışdıran nədir?" adlı məqalənin dərc olunması təəccüblü deyil. Jurnalist təşkilatlarının və Mətbuat Şurasının monitorinqlərinə əsasən, "Yeni Azərbaycan" qəzeti Azərbaycan jurnalistinin Peşə-Davranış Məcəlləsinin pozulması üzrə lider mövqelərdən birini tutur.
Yaxşı olardı ki, siz bu haqda düşünəydiniz ki, son üç gündə bu həcvin internet versiyasını cəmi 5 nəfər oxuyub. Bu, hakim partiyanın mətbu orqanı üçün yaxşı göstərici deyil.
Mənim şəhərin mərkəzində böyük ofisi və onlarla əməkdaşı hansı pullarla saxlamağım, firavan həyat sürməyimlə bağlı qaldırdığınız və sizi qıcıqlandıran ilk məsələ, yumşaq desək, yalandır.
Agentlik Xaqani küçəsindəki ümumi həyətdə köhnə mənzili icarəyə götürüb. Mənim 10 kv. metrdən ibarət kabinetimin pəncərəsi yoxdur və bu otağı əməkdaşımız ilə bölüşürəm. 2009-cu ilin fevralına kimi VAZ 2106 markalı avtomobilim olub. İndi isə 1997-ci il buraxılışı olan "C-180" markalı köhnə "Mersedes"im var. Özüm isə qardaşımın evində yaşayıram. Mənim əmək haqqım hökumətyönlü agentliyin orta müxbirinin əmək haqqının həcmi qədərdir. Mən bununla fəxr etmirəm, lakin fakt budur, - sizin uydurmalarınız deyil. Heç olmasa, məqalədə sitat gətirdiyiniz və hörmətlə yanaşdığınız Əflatun Amaşovdan mənim maddi rifahım barədə öyrənmək olardı.
İkinci yanlış bəyanat isə mənim Açıq Cəmiyyət İnstitutu - Azərbaycan (Soros Fondu) İdarə Heyətinin sədri postuna seçildikdən sonra kəskin şəkildə fəallaşmağım ilə bağlıdır. Sizlərdən fərqli olaraq, mənim vətəndaşlıq və peşə mövqeyim hər zaman böyük fəallığı ilə seçilib və müxtəlif problemləri əhatə edib. Əsasən KİV sahəsində fəal araşdırmalar aparmışam, mətbuatın iqtisadi vəziyyəti, informasiyaya çıxış imkanları, peşə-etik normaları kimi problemlərin həlli ilə bağlı təkliflər irəli sürmüşəm. Bunu "Yeni Azərbaycan"ın əsas ideoloqlarından biri Əli Həsənov da təsdiqləyə bilər.
Son vaxtlar mən satın alınmış mətbuat və müstəqil K&

#304;V-in itirilməsilə cəmiyyətə yaranan təhlükə barədə tez-tez çıxışlar edirəm. Mənim araşdırmalarım və təkliflərim, nəhayət, eşidildi və hakimiyyət tərəfindən qəbul edildi. Prezident İlham Əliyev Mətbuat Şurası İdarə Heyətinin üzvləri ilə görüşündə etiraf etdi ki, Azərbaycanda hakim partiya ideoloqlarının bildirdiyi kimi 4 min yox, 120 qəzet fəaliyyət göstərir. O, həmçinin 2 mln. manat məbləğində olan mediareklam bazarının həcmini yolverilməz adlandırıb. Sizə sualım belədir: reklam bazarının həcmi cəmi 2 mln. manat olduğu və qəzet satışlarının onlarla və yüzlərlə nüsxə ilə ölçüldüyü halda 120 mətbu orqanı necə dolana bilər?
Deyə bilərəm ki, Turan-ın informasiya məhsullarının satışından rəsmi gəliri (başqa gəliri yoxdur) gündəlik 5 min nüsxə qəzetin satışına ekvivalentdir. Lakin etiraf edirəm ki, bu, informasiya işinin inkişafı üçün kifayət deyil.
Siz Soros Fondunu Azərbaycanda bütün pisliklərin mənbəyi kimi, bundan təmsil etdiyiniz hakimiyyətə təhlükənin yaranması kimi qələmə verməyə cəhd göstərirsiniz. Lakin məhz sizin hakimiyyət Corc Sorosa və onun baxışlarına böyük inamla və hörmətlə yanaşır.
Bu münasibətlərin əsası cənab Sorosun Azərbaycana səfəri, prezident Heydər Əliyev və onun oğlu İlham Əliyevlə görüşləri zamanı qoyulub. Fond dünyanın digər inkişaf etməkdə olan ölkələrində olduğu kimi, Azərbaycanda da dövlət institutlarının və vətəndaş cəmiyyətinin inkişafı üçün çox iş görüb.
Xalq Cəbhəsi və Müsavat partiyalarının fond tərəfindən maliyyələşdirilməsi ilə bağlı narahatlığınıza da son qoymaq istərdim. Əvvəlki seçki ilində olduğu kimi, bu il də fond qarşıdakı parlament seçkiləri üçün əhəmiyyətli dərəcədə vəsait ayırmayıb. Fikrimcə, razılaşarsınız ki, ayrılmış 70 min dollar həcmində kiçik qrantlarla inqilab etmək olmaz.
Nəhayət, maliyyə şəffaflığının vacibliyi və ədalətli rəqabət şəraitinin yaradılması barədə ideyama gəlincə, mən bir daha müvafiq dövlət qurumlarını KİV-in maliyyə mənbələrinin araşdırılması üzrə yoxlamalara başlamağa çağırıram. Və buna ilk növbədə sizin praktik olaraq alınmayan və köşklərdə qalan, İnternetdə oxunmayan qəzetinizdən başlamağı tövsiyə edirəm.
Ümüdvaram ki, göndərdiyim məktubu qanuna müvafiq şəkildə qəzetinizdə dərc edəcəksiz.
Hörmətlə,

Mehman Əliyev
Turan İnformasiya Agentliyinin direktoru