![ABŞ Azərbaycanın hökumətyönlü strukturlarını maliyyələşdirir](https://turan.az/resized/media/2013/main/050100034616-750-500-resize.webp)
“2013-cü ildə USAID Azərbaycanda 10 milyon dollar həcmində proqramlar həyata keçirəcək. İndiyədək Azərbaycanda əsas üç sahədə proqramlar həyata keçirirdi – iqtisadi inkişaf, demokratik idarəçilik və səhiyyə. Təəssüf ki, biz artıq səhiyyə sektorunda fəaliyyət göstərmirik. Belə ki, Azərbaycan bu sahədə vəzifələrin öhdəsindən gəldiyi üçün bu sektorla yalnız dövlət məşğul olur”- USAID-in (Amerika Beynəlxalq İnkişaf Agentliyi) Avrasiya üzrə administrator assistenti Peyc Aleksandr “Amerikanın səsi”nə müsahibəsində bildirib.
Radionun “yerli müşahidəçilər deyirlər ki, USAID əsasən hökumətpərəst yaxud hökumət təşkilatlarını maliyyələşdirir. Bu ittihama necə cavab verərdiniz?” sualının cavabında Peyc Aleksandr deyib ki, USAID-in məqsədi müxtəlif təbəqədən olan iştirakçıları maliyyələşdirməkdir.
“Məqsədimiz insanların icmada aktiv ola bilmələrini təmin etmək üçün onların hüquqi prosesdə iştirakına nail olmaqdır. Ümumiyyətlə, yaxşı olardı ki, nə vaxtsa biz o nöqtəyə çataq ki, orada layihələr hökumət və qeyri-hökumət kateqoriyalarına deyil, birgə əməkdaşlığa əsasən dəyərləndirilsin. Bu işin mahiyyəti elədir ki, çox vaxt layihələrin həyata keçirilməsi hökumətlə əməkdaşlığa bağlıdır. Fəaliyyətimizin 60 faizi demokratiya və özünü-idarəçiliyə aiddir. Biz bunlardan bəzilərini hökumətlə çiyin-çiyinə işləməklə həyata keçiririk. Bu həm də bizə imkan verir ki, fəaliyyətimiz düzgün səviyyədə eşidilsin”, - o bildirib.
“Sizin təşkilatınız Azərbaycan Hüquqşünasları Konfederasiyası ilə 1.5 milyon ABŞ dolları məbləğində layihə üzrə razılıq imzalayıb. Bu layihənin ictimai faydalılığı nədir?” sualına cavabda deyib ki, burada əsas hədəf hökumətlə cəmiyyət arasındakı təmasları təmin etməkdir.
“ALC adlandırdığımız bu proqram ictimai hüquqi yardıma dair qanunun qəbul edilməsində faydalı rol oynayır. Mən ilk öncə təəccüblənmişdim ki, Azərbaycanda yoxsul zümrələrə pulsuz hüquqi məsləhət verilmir. Söhbət burada ən yoxsul zümrədən gedir. Bildiyimə görə, parlamentdə artıq bu qanunun birinci oxunuşu olub. Habelə, bu konsorsium Xəzər Universiteti vasitəsi ilə insan haqları üzrə hüquqşünasların növbəti nəslini yetişdirəcək. Ölkə üçün istər daxildə, istərsə də xaricdə bu sektorda insanların təlim keçmələri vacibdir. Biz bu qrupun fəaliyyətinə nəzarət edirik və ümid edirik ki, o öz işində müvəffəq olacaq”, - o vurğulayıb.
P.Aleksandr Azərbaycanda demokratiya, insan hüquqları, ədalətli və azad seçki, söz azadlığı sahəsində problemlərlə bağlı münasibətləri liberallaşdırmaq sahəsində layihələr barədə danışarkən deyib ki, USAİD Azərbaycanda demokratiya və idarəçiliyə 6 milyon dollar xərcləyir.
“Bizim əsas üç məqsədimiz var: vətəndaşların hökumətdə iştirakı, sivil cəmiyyətin aktivliyi və vətəndaşlara müstəqil media, ədliyyə və parlamentin işini izah etmək. Əsas funksiyamız informasiya axınını təmin etməkdir. Biz istəyirik ki, hər iki tərəf – tələbat və təchizat bir-birini eşidə bilsinlər".
USAİD bu il Azərbaycan prezidenti yanında Qeyri- Hökumət Təşkilatlarına Dövlət Dəstəyi Şurası ilə sosial-iqtisadi inkişafa yönəlmiş yeni layihə imzalayıb.
“Bu layihənin maliyyə dəyəri 14 milyon dollar təşkil edir ki, bunun yarısını USAİD, yarısını isə Azərbaycan hökuməti növbəti beş il ərzində maliyyələşdirəcək. Məqsəd konkret icma layihələri həyata keçirməkdir. Məsələn, mən səfərimin bir hissəsi olaraq Qubaya getdim. Orada layihə çərçivəsində çəkilən asfalt yolu nəzərdən keçirdik. Layihədə iştirak etmiş yerli sakinlərlə görüşdük. Onların orta yaşı 60 olardı. Onlar çox sevinirdilər ki, bu yolun tikilməsi övladlarının məktəbə sərbəst-gediş gəlişinə yardım edəcək. Demokratiya belə işləyir. İcma istədiyi layihələri həyata keçirmək üçün fəaliyyətə qoşulur. Bunu hökumətlə əməkdaşlıq etmədən həyata keçirmək mümkün deyil”,- o qeyd edib.
USAİD Azərbaycanda 1991-ci ildən fəaliyyət göstərir.
Bu müsahibə göstərir ki, amerikalı donorlar Azərbaycanda ən çox hökumətyönlü qurumları maliyyələşdirirlər, nəinki müstəqil. Odur ki, Azərbaycan hakimiyyətinin ABŞ-dan qrant alana QHT-lərin ünvanına ittihamları əsassızdır.06-03D-
Rəy yaz