Aİ xüsusi nümayəndəsi Qarabağ nizamlanması haqqında

Bakı/01.03.18/Turan: Avropa İttifaqının Cənubi Qafqaz üzrə xüsusi nümayəndəsi Toyvo Klaar fevralın sonlarında regiona səfərinin və Azərbaycan və Ermənistan rəhbərliyi ilə görüşlərinin yekunları ilə bağlı Ermənistanın "Mediamaks" agentliyinə müsahibə verib.

Klaar Qarabağ nizamlanması ilə bağlı prinsipcə yeni heç nə deməyib, amma bu zaman bədbinliyini gizlətməyib.

Sülhə gedən yol danışıqlardan və tərəflər arasında minimum etimadın bəqərar edilməsindən keçir. "Təəssüf ki, 2016-cı ilin aprelində təmas xəttində gərginliyin artması həmin vaxta qədər olan etimada mənfi təsir göstərdi və onu azaltdı. Eyni zamanda, son günlər biz bəzi müsbət inkişafların şahidi oluruq, münaqişə zonasında vəziyyət daha sakitdir, danışıqlar prosesində fəallıq görünür, Krakovda xarici işlər nazirlərinin görüşündə ATƏT-in hazırki sədrinin şəxsi nümayəndəsinin ofisinin genişləndirilməsi barədə razılıq əldə olunub. Bu addım çoxdan atılmalı idi", deyə o bildirib.

"2016-cı ildəki gərginlikdən sonra biz populizmin artmasının şahidi olduq, bu, təkcə ən yüksək səviyyədə baş vermirdi. Əhali arasında da nifaq güclənmişdi. Təəssüf ki, biz dialoq qurulması və ya ortaq maraqların tapılması üçün tədbir görmək istəyən insanların çox vaxt kəskin tənqidə məruz qaldığını görürük. Bu, çox narahat edir. Rəsmi sülh prosesinin dəstəklənməsi üçün insanla arasında sülh və əlaqələr qurulması çox vacibdir", deyə o qeyd edib.

Nizamlanma əldə olunmasında Avropa İttifaqının roluna toxunan Klaar münaqişənin ən qısa zamanda beynəlxalq hüquq prinsiplərinə uyğun şəkildə nizamlanmalı olduğu haqqında hamıya məlum olan mövqeyi təkrarlayıb. Məsələnin nizamlanması üzrə güzəştlərin tapılmasına görə əsas məsuliyyət münaqişə tərəflərinin üzərinə düşür.

Tərəflər yekun razılaşma əldə etdikdə Avropa İttifaqı tərəfləri dəstəkləməyə və bərpa işlərinə kömək etməyə hazırdır.

"Biz Dağlıq Qarabağ münaqişəsinin sülh yolu ilə nizamlanması üçün insanlar arasında sülh və əlaqələrin qurulmasına yönəlmiş vətəndaş cəmiyyəti proqramlarını dəstəkləyirik. Biz digər münaqişələrin təcrübəsindən bilirik ki, sülh razılaşmaları cəmiyyətlər tərəfindən möhkəmləndirilməlidir", deyə Klaar bildirib.

O, Aİ nümayəndəsinin Qarabağa getmək istəyib-istəmədiyi barədə suala müsbət cavab verib.

"Qeyd etməliyəm ki, Dağlıq Qarabağa belə bir səfər onun müstəqilliyinin tanınması və ya hətta bu istiqamətdə bir addım belə demək olmayacaq.

Əlbəttə, Dağlıq Qarabağa səfər etmək, maraqlı tərəflərlə görüşlər keçirmək, vəziyyətlə tanış olmaq istərdim, amma eyni zamanda bilirəm ki, belə səfərlərlə bağlı bəzi narahatlıqlar var. Anlaşılmazlıqlardan və yanlış şərhlərdən uzaq olmaq üçün hər bir addımı tərəflər və ATƏT MQ-nin həmsədrləri ilə sıx əməkdaşlıq halında atmaq lazımdır, deyə o əlavə edib. -02D-