Aleksandr Qolts: Rusiya və NATO Suriyada böyük müharibə istəmir

Rusiyalı ekspert, “Ejednevnıy Jurnal” (“Gündəlik Jurnal”) nəşrinin baş redaktoru Aleksandr Qolts Turan-a müsahibəsində Suriyadakı münaqişə ilə bağlı vəziyyəti və Moskvanın siyasətini qiymətləndirib.

Bu vəziyyətə Moskvanın strategiyası haqqında danışmaq olar, yoxsa Kreml impulsiv hərəkət edir?

Bu suala cavabda Qolts deyib ki, belə bir strategiya var və o, Əsəd rejiminin dəstəklənməsindən ibarətdir. Amma bu, strategiyanın yalnız bir hissəsidir. “Putin açıq-aşkar bildirib ki, xalqlara avtoritar liderlərdən qurtulmaq uğrunda mübarizədə dəstək verir. O hesab edir ki, bütün etirazlar və rəngli inqilablar Qərbin fitnələridir”, deyə ekspert bildirib.

Putin strategiyasının daha bir hissəsi Ukraynadan sonra beynəlxalq təcridlikdən çıxmaq cəhdidir. “Yəni o, Qərbin onunla danışmağa məcbur olduğu bir vəziyyət yaratmaq istəyir. Və indi böyük münaqişəyə doğru irəliləyişə yol verməmək üçün Qərb liderləri onunla danışırlar. Putinin daha bir motivi özünü Rusiyada belə bir inqilab təhlükəsindən qorumaqdır”, deyə Qolts fikrinə davam edib.

Münaqişənin real müharibəyə keçməsi ehtimalı nə qədər yüksəkdir?

Bu suala cavabda Aleksandr Qolts deyib ki, genişmiqyaslı əməliyyatlar olacağına inanmır, amma Kremlin “cavab vermək” və Türkiyə təyyarəsini vurmaq istəməsi ehtimalı var.

Genişmiqyaslı döyüş əməliyyatlarına gəlincə, nə Moskva, nə də NATO buna hazır deyil. “Genişmiqyaslı əməliyyatlar həyata keçirmək üçün orada 300 min nəfər yerləşdirmək lazımdır. Rusiyanın isə başqa planları var – Əsəd rejimini saxlamaq. Buna görə münaqişənin genişmiqyaslı xarakter alacağını gözləməyə dəyməz. Bunun əleyhinə olan ikinci səbəb ondan ibarətdir ki, NATO bunu istəmir. İndi Qərb liderləri israrla Ankaranı təmkinli olmağa və işi ciddi qarşıdurma həddinə çatdırmamağa çağırır. Bundan başqa, NATO-da hesab edirlər ki, vəziyyətin gərginləşməsinə görə məsuliyyət Türkiyənin üzərinə düşür və o, təyyarəni vurmamalı idi. Məhz buna görə Alyansın reaksiyası bu qədər yumşaq olub”, Qolts belə hesab edir.

Təyyarənin məhv edilməsindən sonra Rusiya ictimaiyyətinin əhval-ruhiyyəsini necə səciyyələndirmək olar? – sualına cavabda ekspert bildirib ki, bu, açıq-aşkar “hərbi isteriyadır”.

“Bu əhval-ruhiyyə süni şəkildə qızışdırılır. Bu, məxsus edilir. Məqsəd çox sadədir – insanları ətrafda düşmənlərin dolu olduğuna, hakimiyyətin istənilən tənqidçisinin isə düşmən olduğuna inandırmaq. Bu vəziyyətdə və belə bir əhval-ruhiyyənin olduğu şəraitdə ölkəni idarə etmək asandır”, deyə Qolts bildirib. -02В-