Şahdağdakı otellər idarəetməyə verilir

Bakı/24.04.18/Turan: Tikintisi Azərbaycan büdcəsinə 1 milyard dollara başa gəlmiş Şahdağ Yay-Qış Turizm Kompleksindəki dövlətə məxsus otellərin "Şahdağ Turizm Mərkəzi" QSC (ŞTM) tərəfindən idarəetməyə çıxarılması haqda elan verilib. Yüzlərlə personalı olan bu dövlət müəssisəsinin otelləri idarəetməyə verməsi müəyyən suallar yaradıb. Turan İA həmin sualları səhmdar cəmiyyətinin rəhbərliyinə ünvanlayıb.

- Turan İA: Kompleksin ərazisindəki otellərin hansı turizm mərkəzinin balansındadır? Həmin otellərdə toplam neçə nömrə və yer var? Bu otellərdə neçə nəfər çalışır? Otellərdə çalışan şəxslərin ŞTM -in, yoxsa başqa kommersiya qurumunun işçisi sayılır?

- ŞTM: "Şahdağ Turizm Mərkəzi" QSC-nin balansında hazırda bir beşulduzlu ("Şahdağ Hotel və Spa"), bir dördulduzlu ("Zirvə" hotel) və apartman tipli mehmanxana ("Gaya Residences") fəaliyyətdədir. Həmin hotellərdə ümumilikdə 244 otaq və 732 yataq yeri (172 otaq - "Şahdağ Hotel və Spa"), (43 otaq - "Zirvə" hotel) və (29 otaq - "Gaya Residences") mövcuddur. Hotellərdə çalışan işçilər birbaşa "Şahdağ Turizm Mərkəzi" QSC ilə müqavilə əsasında fəaliyyət göstərirlər.

- Turan İA: İndiyədək qeyd olunan otellərin idarə olunması hansı qaydada həyata keçirilib? İdarəedici ilə ŞTM QSC-nin otellərin idarə olunması sahəsində səlahiyyət bölgüsü necədir? İdarəetməyə verilmə hansı zərurətdən irəli gəlir?

- ŞTM: Turizm mərkəzinin fəaliyyətdə olduğu 6 il ərzində hotellərin idarə edilməsi QSC-nin birbaşa nəzarəti ilə hazırda Andorra dövlətinə məxsus, dağ-xizəkçilik və turizm sahəsində ixtisaslaşmış "PGİ Management" və turizm mərkəzi tərəfindən birlikdə həyata keçirilır. "PGİ Management"şirkətinin mütəxəssisləri əsasən kanat yollarının və xizək yamaclarının fəaliyyətini tənzimlədiyindən qış mövsümü üçün dağ əyləncələri departamentində xarici mütəxəssislərin sayı 20 nəfərə kimi artır. Bununla yanaşı, hazırda "PGİ Management" şirkətinin 5 işçisi hotellərin idarəedilməsi departamentində, 1 nəfər isə dağ əyləncələri departamentində çalışır.

Adıçəkilən şirkətlə müqavilənin bağlanması Azərbaycan üçün yeni bir təcrübə olan dağ-xizəkçilik və dağ-hotelçilik sisteminin idarə edilməsində effektivliyin artırılması, dünya təcrübəsinin öyrənilməsi və yerli mütəxəssislərin yetişdirilməsinə təkan vermək məqsədi daşıyır.

Bundan əlavə, "Azərbaycan Respublikasının 2018-ci il dövlət büdcəsi haqqında" Azərbaycan Respublikasının Qanun layihəsinə Hesablama Palatasının rəyinə əsasən, mərkəzin fəaliyyətinin təsərrüfat hesablı prinsip əsasında həyata keçirilməli olduğu nəzərə alaraq 2018-ci ilin dövlət büdcəsində nəzərdə tutulmuş vəsaitin optimallaşdırılması, həmçinin büdcə vəsaitlərinin nəticəliliyinin yüksəldilməsi məqsədilə QSC-nin gəlir əldə edilməsi ilə bağlı fəaliyyətinin gücləndirilməsi, eyni zamanda vəsaitlərin qənəatli və səmərəli istifadəsi istiqamətində tədbirlərin həyata keçirilməsi məqsədəmüvafiq hesab edilib.

Bu səbəbdən peşəkar idarəetmənin sistemliliyinin və vahidliyinin təmini, mövcud resurslardan səmərəli istifadə olunması, nəticə etibarilə, əsas fəaliyyətdən olan gəlirlərin artırılması və xərclərin azaldılması istiqamətində işlərin görülməsi zərurəti yaranıb.

- Turan İA: Bunadək otellər kənar şəxsə idarəetməyə verilmişdisə, idarəetmənin şərtləri nə olmuşdu və buna görə ŞTM QSC-yə 2016-2017-ci illərdə hansı məbləğdə haqq ödənilib?

- ŞTM: Hotellərin idarəetməyə verilməsinin əsas şərtləri yerli peşəkar kadrların hazırlanmasında yaxından iştirak, mütəmadi olaraq xidmət keyfiyyətinin artırılması və beynəlxalq standartlara uyğunlaşdırılması məqsədilə təlimlərin təşkili, ümumilikdə mövcud potensialdan istifadə edərək iş prosesinin daimi təkmilləşdirilməsi, dağ-xizək hotelçiliyi sahəsində beynəlxalq təcrübənin tətbiq edilməsi, xərclərin optimallaşdırılaraq gəlirlərin artırılmasına yönəldilməsinə dəstək xidmətinin göstərilməsi olmuşdur.

- Turan İA: Otellərin göstərdiyi xidmətlərdən 2017-ci ildə əldə olunan vəsait nə qədərdir? Bu onların saxlanması xərclərini, eləcə də məcburi ödənişlərin təmin olunmasını qarşılayıbmı?

- ŞTM: Hazırda QSC-nin 2017-ci il üzrə maliyyə hesabatı hazırlanır. Müstəqil auditor tərəfindən rəy verildikdən sonra hesabat müvafiq mətbu orqanlarında dərc olunacaqdır.

- Turan İA: "Şahdağ Turizm Mərkəzi" QSC-nin idarəetmə aparatında və struktur bölmələrində nə qədər işçi çalışır?

- ŞTM: "Şahdağ Turizm Mərkəzi" QSC-də ştat vahidi üzrə 507 əməkdaş çalışır, mövsüm ərzində isə əlavə 320 nəfər işçi də cəlb olunur. --08B--