Narkotik cinayəti törədənlərin əksəriyyəti işləmir

Bakı/20.08.2019/Turan: Dövlət Statistika Komitəsi Daxili İşlər Nazirliyinin məlumatlarına əsasən, ölkədə cinayətkarlıqla bağlı məlumat yayıb. Məlumata görə, 2019-cu ilin ilk 6 ayı ərzində 13534 cinayət hadisəsi qeydə alınıb.

Məlumatda deyilir ki, bu cinayətlərin 2472-si və ya 18,3%-i narkotik vasitələrin və psixotrop maddələrin qanunsuz dövriyyəsi ilə əlaqədardır. Onların da 59,6 faizini narkotik maddələri satış məqsədi olmadan, 33,2 faizini isə satış məqsədilə əldə etmə, habelə bu maddələri istehsal etmə, göndərmə, yaxud qanunsuz olaraq satmaq kimi cianyətlər təşkil edir: "Hesabat dövründə narkotik vasitələrin və psixotrop maddələrin qanunsuz dövriyyəsi ilə bağlı 1674 nəfər cinayət törətmiş şəxs müəyyən edilmişdir ki, onların da 99,0 faizi cinayət məsuliyyətinə cəlb olunmuşdur", deyə məlumatda vurğulanır.

Məlumata görə, cinayət törətmiş şəxslərin 68,2 faizi heç yerdə işləmir və oxumur, 24,6 faizi isə əvvəllər də cinayət məsuliyyətinə cəlb olunmuş şəxslərdir.

Bu cainayəti törədənlərin 77 faizini 30 və daha yuxarı, 15 faizini 25-29, 8 faizini 18-24 yaşlı şəxslər təşkil edir. -0-