Nikol Paşinyan islam terrorizmindən narahatdır və inanır ki, Moskva Qarabağda müharibəyə imkan verməyəcək

Bakı/18.05.19/Turan: "Dağlıq Qarabağda eskalasiya İraqdan və Suriyadan qaçanları bizim regiona gətirə bilər", - Ermənistanın baş naziri Nikol Paşinyan cümə günü rusiyalı jurnalistlərlə görüş zamanı bildirib.

"Siz görürsünüz ki, İran ətrafında necə gərgin vəziyyət yaranıb və bu gərginlik artmaqda davam edir. Suriyada islam radikal qruplaşmalarının böyük sayda döyüşçüləri var, onlar başa düşürlər ki, artıq Suriya və İraqda onlara yer yoxdur. Bizim məlumata görə, bu gün onlar özlərinə yeni yerlər axtarırlar. Əgər bizim regionda yeni eskalasiya baş verərsə bu, onlar üçün, məsələn, Azərbaycana getməyə yaxşı bəhanə olacaq. Onlar üçün ora çox əlverişli nöqtədir, oradan öz hərəkətlərini İran, Rusiya, Cənibi Qafqaz və Mərkəzi Asiya istiqamətində genişləndirə bilərlər", - "Radio Svoboda" Paşinyandan sitat gətirib.

Onun sözlərinə görə, Qarabağda yeni müharibə artıq lokal olmayacaq və o ümid edir ki, bunu Rusiyada və Azərbaycanda, hətta İranda da başa düşürlər. O əmin olduğunu bildirib ki, Moskva Qarabağ münaqişəsinin ancaq sülh yolu ilə nizamlanmasında qarant olacaq. Paşinyanın sözlərinə görə, Rusiyanın zəruri vasitələri var ki, bunlar yeni eskalasiyaya imkan verməyəcək. "İnanmıram ki, lazım olduğunda rusiyalılar bu vasitələrdən istifadə etməsinlər" - o vurğulayıb .-02D-