Şolts ilə Əliyev energetika və Qarabağ haqda danışıblar

Bakı/14.03.23/Turan:  Azərbaycan Almaniyanın və rolu artmaqda olan Avropa İttifaqının tərəfdaşıdır. Almaniya Ermənistanla Azərbaycan arasında sülhdə maraqlıdır və son vaxtlar gərginliyin artmasından narahatdır. Bunu Almaniya kansleri Şolts Azərbaycan prezidenti İlham Əliyevlə birgə keçirdiyi mətbuat konfransında bildirib.

"Sülh Azərbaycan və Ermənistanın ərazi bütövlüyü nəzərə alınmaqla qurulmalı, həmçinin hər iki ölkənin vətəndaşlarının hüquqları təmin edilməlidir", - o qeyd edib. Eyni zamanda vurğulayıb ki, Almaniya Qarabağın müstəqilliyini tanımayıb və tanımır.

Öz növbəsində İlham Əliyev deyib ki, Avropa İttifaqı  və Azərbaycan arasında, əsasən enerji sahəsində əməkdaşlığın inkişafı məsələləri müzakirə olunub. Azərbaycan Avropa ölkələrinə təbii qaz nəqlini iki dəfə artırmağı planlaşdırır. Yaxın illərdə Azərbaycan Albaniya, Monteneqro, Çexiya və Macarıstana qaz nəql edəcək, o deyib.

Almaniyanın 30 iri şirkətilə görüşdə yaşıl energetika sahəsində əməkdaşlığın inkişafı nəzərdən keçirilib. Əsasən yaşıl energetikanın istehsalı və Avropaya ixracı ilə bağlı razılaşma var, Əliyev sözlərinə davam edib.

O, Ermənistanla münaqişəyə toxunaraq xatırladıb ki, Azərbaycan ərazisi 30 il erməni işğalı altında olub. Torpaqlar İkinci Qarabağ Müharibəsi nəticəsində azad edilib. "Biz erməni tərəfinin qəbul etdiyi beş prinsip əsasında sülh bağlamağı təklif etdik. Ümid edirəm ki, Ermənistan bu imkandan istifadə edəcək", - o deyib. 02B