Cümhuriyyət:100-cü ilimi, son aylarımı?

2022-ci ilin başa çatmasına təxminən 40 saat qalmışkən   iqtidarın kiçik ortağı  Milliyyətçi Hərəkat Partiyasının mühüm bir adamının(həm də alimin) qətlə yetirilmə hadisəsi 1 yanvar gəlmədən xeyli ciddi şübhəni də özüylə gətirib-gəldi. İqtidar partiyası sözçüsünün hadisədən 3 gün sonra verdiyi açıqlama Azərbaycan mediasının önəmli qismini 25 il pəncəsinin altında saxlamış Maho ağa ləqəbli Əli Həsənovun sözləriylə eyni idi:2 mart 2005-ci ildə dünya miqyaslı journalist-yazar Elmar Hüseynov qətlə yetiriləndə lütf edib vida mərasiminə təşrif buyurmuş Maho ağa fətvasını vermişdi: ”Bu hadisədən siyasi məqsədlərlə istifadə edilməsin”. İddialara görə, dövlət başçısı Erdoğan 30 dekabrda qətlə yetirilən Sinan Ateşin xanımına zəng edərək hadisənin üstünün açılması üçün lazım  olan hər şeyin ediləcəyini deyib. Türk milliyyətçiliyinin önəmli bir simasının qətlə yetirilməsinə 3 yanvara qədər münasibət bildirməyən MHP lideri Bahçeli, ölüm hadisəsini gündəmə gətirənləri yaxından izlədiklərini xatırladaraq əndişəli  ortamı bir az da gərdi.

Müxalifət partiyaları  və müstəqil  mediadakı  qələm sahibləri qətl hadisəsinin aydınlığa qovuşdurulması üçün iqtidara təzyiq göstərir; ana müxalifət partiyası hadisəylə bağlı öz araşdırma qovluğunu hazırlayarkən Gelecek Partiyasının sədri Ahmet Davutoğlu (keçmiş baş nazir) “Yoxsa küçələrdə siyasi qətllərə hazırlıq gedir?” kimi qorxulu bir sualı gündəmə gətirdi.

Milliyyətçi Hərəkat Partiyasının `öldürücü açıqlaması isə partiyanın` asıb-kəsmə siyasəti`nin sözçüsü professor Semih Yalçından gəldi: ”Vaxtı gələndə Həzrət Əlinin qılıncı Zülfüqar olar, şər güruhunun zəhər saçan dilini kəsib provokatorların boynunu qopararıq”. Bax, ən gec 5.5 ay sonra  keçiriləcək  seçki ərəfəsində Türkiyə üçün ən qorxulu ssenari də bu `boyun qoparmaq` məsələsinin tədavülə daxil edilməsi olacaq.

Təsəvvür edirsinzmi, XXİ əsrin ilk rübünün başa çatmasına vur-tut 2 il qala 58 illik keçmişi olan bir siyasi qurumun professor-sözçüsü `boyun qoparmaq`dan bəhs edir. Mənzərə bu ikən Milliyyətçi Hərəkat Partiyasının  yenidən 1970-ci illərin jarqonuna geri qayıtmasının məqsədi nə ola bilər?

Bu partiya təxminən 6 ildən bəri Türkiyədəki iqtidarın  kiçik ortağı kimi hərəkət edirsə, `boyun qoparmaq` məsələsini iqtidarın böyük ortağıyla məsləhətləşib razılaşdıqdan sonra gündəmə gətirir, yoxsa böyük ortaq cənab Erdoğan, ondan daha böyük ortaq AKP bu qədər vahim bir jarqonun tədavülə daxil edilməsindən xəbərsizdir? Seçkiyə gedən yolda bu jarqonun MHP tərəfdarlarını konsolidə edə bilməyəcəyi məlumdur, AKP bundan nə qazanacaq? İşin kilid nöqtəsi də buradır. Köşə yazarları və müxalif siyasətçilər qətl hadisəsinin ssenarisini də icrasını da artıq aydınlığa qovuşdurub ünvanın da sirr olmadığını ifadə edirlər.

Fakt və şərhlərə  uzun müddətli siyasi müşahidələri də əlavə edəndən sonra bu təxminləri irəli sürmək mümkündür:

• 1. Milliyətçi təbəqə üzərində təsir gücü yüksək olan bir şəxsin qətlə yetirilməsi seçki ərəfəsindəki istefaların qabağını qorxu-hürkü yoluyla almaq məqsədi daşıyır;
• 2. Qətli icra etdirənlər eyni zamanda bir neçə yerə mesaj göndərərək keçmişdəki fəaliyyətlərinə yenidən qayıda biləcəklərinə işarə edirlər;
• 3. Etnik zəmində münaqişə planları reallaşmayınca milliyyətçi təbəqənin öz içindən mühüm bir şəxsin qətlə yetirilməsi  yeni çalxantılara təməl  yarada bilər;
• 4. 30 dekabrdakı qətl hadisəsi,Ahmet Davutoğlunun iddia etdiyi kimi,yeni qətllərə qapı aralayarsa,yaranacaq  xaos ortamında növbəti seçkiyə getmək  mümkün olarmı?

Axırıncı təxmin tükləri nə qədər ürpərtsə də  ehtimaldan qəti şəkildə  kənarda tutulması da  doğru olmayacaq.

Türkiyə Cümhuriyyəti özünün 77 illik çoxpartiyalı sisteminin tarixində ən böhranlı seçkiyə doğru gedir. AKP lideri və dövlət başçısı Erdoğan da özünün qurduğu dövlətin  iqtisadi baxımdan ən böyük problemlərlə üzbəüz qaldığı  dönəmdə seçki meydanlarını inlətməyə hazırlaşır.

Bu ay  içində namizədini açıqlamağı planlaşdırmış müxalif blokun da meydanları `gümbür-gümbür gümbürdətməsinə` çox qalmayıb. İqtidar partiyası üçün Katar Mərkəzi Bankı sanki Beynəlxalq Valyuta Fondu kimi çalışarkən Rusiyadan gələn illeqal pulların dərdə nə dərəcədə dərman olacağını 2-3 ay içində görə biləcəyik.

Bu seçkinin keçirilməsi və  qutulardan bu dəfə də AKP-nin birinci çıxması halında Cümhuriyyətin taleyinin tamamilə başqa istiqamətə yönələcəyini görmək əsla sürpriz olamayacaq.

Yarım əsrlik siyasət həyatı boyunca öz idealına doğru addım-addım irəliləmiş cənab Erdoğanın o idealdan vaz keçdiyini əsla düşünməyin.

Seçkidə qalibiyyətin çantada kəklik olmadığına dair proqnozlar güclənərsə?...

30 dekabrdakı qətl hadisəsi tükləri boş yerə ürpərtmir…