Azərbaycan hökuməti qazın və elektrik enerjisinin qiymətini artırıb

Azərbaycan hökuməti yanında Tarif Şurası noyabrın 28-də enerjidaşıyıcılarının qiymətinə yenidən baxıb. Bu tədbirlər kommunal xidmətlərin ödənişi ilə bağlı “differensiallaşdırılmış sistem”in tətbiqi ilə izah edilir.

Belə ki, “əhali” qrupundan olan istehlakçılar üçün təbii qazın tarifi illik istehlak həcmi 1500 kubmetri keçməyirsə bir kubmetrə görə 0,1 səviyyəsində saxlanılıb.

Həmin qrupa daxil olan istehlakçılar 1500 kubmetrdən çox qazın istifadəsinə görə hər 1 kubmetr üçün 0,2 manat ödəyəcək.

Elektrik stansiyaları, kimya, metallurgiya sənayesi müəssisələri üçün 1000 kubmetr qazın qiyməti 80 manatdan 120 manata qaldırılıb. “Qeyri-əhali” kateqoriyasından olan digər istehlakçılar üçün 1000 kubmetr qaz 100 manatdan 200 manata qaldırılıb.

Qaz üçün yeni tariflər 2017-ci il yanvarın 1-dən qüvvəyə minir.

Bundan əlavə, bir kilovatt/saat elektrik enerjisinin topdansatış qiyməti 0,043 manatdan 0,057 manatadək artırılıb.

İstifadə etdiyi elektrik enerjisinin aylıq istehlak həcmi 250 kilovatt/saatı keçməyən istehlakçılar üçün elektrik enerjisinin bir kilovatt/saatının pərakəndə qiyməti  0,07 manat səviyyəsində saxlanılıb. Göstərilən həcmdən artıq elektrik enerjisinin istifadəsinə  görə istehlakçılar hər kilovatt/saat üçün 0,11 manat ödəyəcəklər.

Dövlət Neft Şirkətinin (SOCAR) məlumatına görə, “əhali” qrupuna daxil olan abonentlərin 62 faizi ildə ən azı 1500 kubmetr qaz işlədir.

“Azərişıq” şirkətinin məlumatına görə, “əhali” qrupuna daxil olan abonentlərin 72 faizi ayda ən azı 250 kilovatt/saat elektrik enerjisi işlədir.

Lakin bu məlumatların səhihliyi şübhə doğurur. Çünki qış mövsümündə yaşayış evlərinin bir çoxunda mərkəzləşdirilmiş istilik sistemi olmadığından istehlakçılar mənzillərini qızdırmaq üçün müxtəlif elektrik cihazlarından və ya kombi sistemindən istifadə etməyə məcbur olur. Hər iki halda ay əzində 1500 kubmetrdən çox qaz və elektrik enerjisi işlədilir. 

Digər tərəfdən, qazın qiymətinin artması ilə əlaqədar çox güman ki, yaxın zamanlarda istilik sisteminin də qiyməti artacaq.

Odur ki, qiymətlər əhalinin böyük hissəsinin maddi vəziyyətinə zərbə vuracaq.

Ümumiyyətlə, enerjidaşıyıcılarının qiymətinin artması digər malların da qiymətinin artmasına şərait yaradır. Və bütün bunlar manatın dollara nisbətən dəyərdən düşməsi fonunda baş verir.

Qeyd edək ki, bu il elektrik enerjisinin qiyməti ikinci dəfədir ki, artırılır.

İyulun 15-dən tariflər 16 faiz artırılıb.

Bundan öncə mayın 16-dan içməli su və kanalizasiyadan istifadəyə görə ümumi tarif artırılıb. –06D--