Azərbaycanda məhərrəmlik başladı

İslam il hesablaması ilə 1437-ci il bu gün başlayıb və ilin ilk ayı olan məhərrəm ayının 1-dir.

Bu ay islamda 5 haram aydan biri sayılır. İlahi əmrə görə, bu aylarda müharibə və ya savaş etmək olmaz.

Amma məhərrəm ayı məhz Məhəmməd peyğəmbər (ə.s)-ın nəvəsi, İmam Əlinin  (s.s.ə) oğlu İmam Hüseynin qətlilə yadda qalıb. Belə ki, islam tarixilə məhərrəm ayının 10-cü günü (aşura günü) İmam Hüseyn 72 tərəfdarı ilə birlikdə Kərbəlada şəhid edilib. O, miladi tarixlə 680-ci il oktyabrın 10-da qətlə yetirilib. 

10-cu gün ifadəsi ərəb dilində “aşura” adlandırıldığı üçün İmam Hüseynə təziyə saxlayanlar mərasimə “aşura mərasimi” deyirlər. Məhərrəm ayının 1-dən 10-na kimi şiə dünyası hər gün şam namzından sonra məscidlərə toplanır, Kərbəla hadisəsi barədə əhvalatları dinləyirlər. Mərsiyyəxanlar Kərbəla hadisələri barədə mərsiyyələr söyləyərək insanları həmin döyüşdə həlak olan körpələrin, gənclərin, ağsaqqalların qətllərinə ağladırlar. Məhərrəm ayının 1-dən əza məclisləri təşkil edilməsi məhz həmin gündən etibarən İmam Hüseynin Kərbəlaya səfərə başlaması ilə bağlıdır.

Bu hadisəyə görə şiə dünyasında iki ay şənliklər, toylar olmur. İmamın qətlilə bağlı 40 gün yas saxlanılır. Həmin 40 günün 20 günü məhərrəm ayına, qalan 20 gün isə səfər ayına təsadüf edir. Ona görə də şiə dünyası islam təqviminin ikinci ayı olan səfər ayının 40 mərasimindən sonraya təsadüf edən son 10 gününü də şənlik etmir.

İmam Hüseynin 40 mərasimi isə “ərbəin” adlanır. 

Oktyabrın 15-dən, yəni məhərrəm ayının 1-dən ölkənin məscidlərində əza məclisləri qurulmağa başlayaraq, oktyarın 24-də yəni aşura günündə kütləviliyi baxmından bu əzadarlıq pik nöqtəsinə çatacaq. -05-