Azərbaycanlı Gürcüstana 2,5 kq qızıl aparmağa çalışıb

Tbilisi/08.12.17/Turan: Gürcüstan Maliyyə Nazirliyinin İstintaq Xidmətinin əməkdaşları qanunsuz olaraq 2,5 kiloqram qızıl məmulatı keçirmək ittihamı ilə "Sarp" gömrük-buraxılış məntəqəsində Azərbaycan vətəndaşını saxlayıb, bu barədə idarənin məlumatında deyilir.

Mənbənin məlumatına görə, adı açıqlanmayan təqsirləndirilən şəxs qaçaqmalı Türkiyədən Gürcüstana keçirməyə cəhd edib. O, bəyan edilməmiş qızılı avtomobilindəki gizli saxlanc yerində gizlədib. Qızıl məmulatların ümumi dəyəri 165,5 min laridir (təxminən 62 min dollar).

"Gürcüstanın gömrük sərhədindən malların keçirilməsi ilə bağlı qaydaların pozulması, xüsusilə böyük ölçüdə törədildikdə" maddəsi ilə cinayət işi açılıb, bu maddə 5 ildən 7 ilədək azadlıqdan məhrumetmə cəzası nəzərdə tutur.

Bu, Gürcüstan vasitəsilə ilk qızıl qaçaqmalçılığı cəhdi deyil. Oktyabrda Gürcüstan gömrükçüləri "Qırmızı körpü"də 2 kq qızıl külçəni keçirməyə çalışan Azərbaycan vətəndaşını saxlayıb. Qaçaqmalın ümumi dəyəri 53 min dollar idi.

2016-cı il avqustun 18-də Azərbaycan vətəndaşı yenə "Qırmızı körpü"dən ümumi çəkisi 18,6 kiloqram olan 19 qızıl külçə keçirməyə çalışıb.

Qızıl maşının arxa oturacağının altında gizli saxlanc yerində gizlədilmişdi. Qaçaqmalın dəyəri 572,6 min dollar təşkil edirdi.

Bu ilin aprelində Bayram Gəncəliyev və Elman Hüseynov Gürcüstana 12 kiloqram yüksək əyarlı qızıl və 131 min dollar keçirməyə çalışıblar.

İyunda Gürcüstana təxminən 24 min dollar dəyərində qızıl külçə aparan Ramin Nəbiyev həbs edilib. -02D-