Dini radikallıq səhv dini təsəvvürlərdən qaynaqlanır

“Jurnalistlər Ekstremal Şəraitdə” ictimai birliyi çərşənbə axşamı “Xəzər” universitetində “Dini radikalizmə qarşı mübarizə” layihəsi çərcivəsində dəyirmi masa keçirib.

İctimai birliyin sədri Firuzə Bəyməmmədqızı layihənin mahiyyəti haqqında məlumat verib. Din adı altında radikal dini qruplaşmaların fəallaşdığını, gəncləri cihad, haqq mübarizəsi adı altında siyasi döyüşlərə alət etdiyini bildirib. Bundan əlavə, elə bu ad altında həmin qrupların dünyanın müxtəlif ölkələrindən insanları öz anti-insani mübarizəsinə alət etdiyi vurğulanıb.

Universitetin əməkdaşı Elnurə Əzizova dini radikallığın heç də dinlə birbaşa əlaqəsi olmadığını deyib. Onun fikrincə, belə hadisələr daha çox ictimai-siyasi və sosial-iqtisadi, dini problemlər yaşayan ölkələrdə baş verir. Amma din sahəsi daim diqqət mərkəzində olmalıdır ki, burada hansısa qüvvələr fəsadlar törədə bilməsinlər. Universitetin digər əməkdaşı Mayıl Yaqubova görə isə, müəyyən dünya gücləri İŞİD və s. adı altında belə qruplaşmaların fəaliyyətindən öz zor tətbiq etmələrini pərdələmək üçün istifadə edirlər.

Faktiki olaraq radikal qruplaşmalar öz anti-insani hərəkətlərilə böyük güclərin islamı gözdən salmaq siyasətinə alət olurlar. M.Yaqubova görə, bu durumda Azərbaycanı Yaxın Şərqdə baş verən hadisələrdən kənar saxlamaq üçün ölkədəki “ənənəvi islamın” təbliğini gücləndirmək lazımdır. Türkiyədə, İranda bu ölkələrə aid dini əhatə olduğu kimi Azərbaycanda da ölkənin mental xüsusiyyətlərini əhatə edən islam olmalıdır. Eyni zamanda dövlət də bu ənənəvi islamın təbliğinə ciddi maraq göstərməlidir.   

Daha sonra dəyirmi masaya qatılan tələbələr öz fikir və təkliflərini səsləndiriblər.

Onların fikrincə, SSRİ dağıldıqdan sonra postsovet məkanındakı ölkələrdə dini sahədə boşluq yaranıb və indi Şimali Qafqazda fəaliyyət göstərən radikal cərəyanlar həmin boşluqda özünə yer edib. Eyni zamanda, Azərbaycanda az-çox mövcud olan qeyri-ənənəvi dini cərəyanlar da bu sahədə boşluq olan müstəqilliyin ilk dövründə formalaşıblar. Natiqlərə görə, Azərbaycan telekanallarında dinin təbliği yoxdur, olan təbliğ isə dini təsəvvür formalaşdırmaq üçün yetərli deyil. Buna görə də insnalarda din barədə doğru təsəvvürlər formalaşa bilmir, hər yanlış din adına qavranılır.

Natiqlər bu məsələdə islama qarşı ayrı-seçkilik olduğunu da iddia ediblər. Onlara görə, dünya media maqnatları islamla terrorizmi, islamla xofu eyniləşdirmək yarışına giriblər, dünyada islama birtərəfli mənfi münasibət siyasəti yürüdülür.

Natiqlərə görə, dinin tədrisi, dini verilişlərin kəmiyyət və keyfiyyətinin artırılması bu sahədə çıxış yollarından biridir. Eyni zamanda, islam dünyası alimlərinin islam aləmində baş verən hadisələri müzakirə etməsi üçün beynəlxalq tədbir keçirmələrinə ciddi ehtiyac var. -05D-