DÖVLƏT BAYRAĞI İLK KÜLƏYƏ DAVAM GƏTİRMƏDİ

    BAKI/03.09.10/TURAN: Ötən gecə yenicə açılmış Dövlət Bayrağı Meydanında utanc gətirən hadisə baş verib. Belə ki, gecə qalxan qasırğa küləyi dünyada ən böyük, ən hündür və ən yaxşı bayrağı uçurub.
     Bayraq bir gün belə davam gətirməyib. Bu bayrağın qurulması üçün ölkənin vergiödəyiciləri 20 mln. manat ödəyiblər.
     Bir qədərdən sonra cırılmış bayraq dirəkdən çıxarılıb. Görünür, hakimiyyət təcili olaraq yenisini sifariş verib. Lakin bu gün günorta bulvara planlaşdırılan gəzinti zamanı İlham Əliyev dünyadakı ən böyük bayrağı öz qonağına, Rusiya prezidentinə göstərmək istəyib.
     *Amerikanın Trident Support şirkətinin hazırladığı layihəni Azərbaycanın Azenko şirkəti həyata keçirib. Meydanın ərazisi 60 hektar təşkil edir, yuxarı hissəsi isə 31 min kv. metrdir. Bayraq dirəyinin hündürlüyü 162 metrdir. Konstruksiyanın ümumi çəkisi 220 ton, bayrağın öz çəkisi 350 kq., eni 35 metr, uzunluğu 70 metrdir.
     Dövlət bayrağının səmaya qaldırılması zamanı möhtəşəm lazer şousu nümayiş etdirilib və atəşfəşanlıq olub.
     2007-ci il noyabrın 17-də prezident İlham Əliyev Bakıda Dövlət Bayrağı Meydanının yaradılması haqqında sərəncam imzalayıb. 2009-cu il noyabrın 17-də isə Dövlət Bayrağı Gününün təsis olunması haqqnda sərəncam imzalayıb. Bundan sonra hər il noyabrın 9-u respublikada Dövlət Bayrağı kimi qeyd olunacaq. -02B-