E.Fətullayev: İstənilən qərbli jurnalist antidemokratik şəraitdə işləyə bilməz

Bu günlərdə Strasburqda I Ümumdünya Demokratiya Forumu öz işini yekunlaşdırıb. Forumda Azərbaycanı “İnsan Haqları Uğrunda” ictimai birliyinin rəhbəri Eynulla Fətullayev təmsil edib. 

Bu Forumu qeyri-rəsmi “siyasi Davos sammiti” adlandırırlar. Foruma 1000 nəfərə yaxın ictimai-siyasi xadim, beynəlxalq qurum rəhbərləri, 150 nəfərə yaxın jurnalist qatılıb. 

Demokratiya şəraitində KİV-lərin məsuliyyəti məsələsi haqda diskussiya olub və E.Fətullayev bu haqda çıxış edib. Natiq demokratik cəmiyyətdə yaşamadığı üçün bu mövzuda danışmayıb. Qeyri-demokratik cəmiyyətdə mətbuatın işi haqda danışıb. Ona görə, istənilən qərbli jurnalist antidemokratik şərtlər daxilində sadəcə işləyə bilməz. Azadlığı, həyatı ilə risk edərək həqiqəti söyləmək məsuliyyətini daşımağa gücü çatmaz, jurnalist təhqiqatı apara bilməz. Bütün dövlət və özəl qurumlar informasiyanı şərhdən, jurnalistlə əməkdaşlıqdan imtina edir. “Azərbaycanda kommersiyaya aid informasiya az qala dövlət sirri sayılırsa, bu halda mətbuatla əməkdaşlıqdan necə söhbət gedə bilər?”, - deyə E.Fətullayev Azərbaycandakı durumu anladıb. Jurnalist biznes qurumunun hansısa dövlət adamına və ya məmura aid olması haqda informasiya əldə edirsə, xəbəri yoxlayıb dəqiqləşdirə bilmir. Çünki, biznes qurumu qanunla sahibi haqqında məlumat verməmək hüququna malikdir. 

E.Fətullayev Facebook-un Azərbaycanda populyarlığına da toxunub. Onun fikrincə, artıq heç kim azadlığı və həyatı ilə risk eləmək istəmir. Jurnalistika həddən artıq məsuliyyətli peşə olduğu üçün populyarlığını itirir. 

Yalnız internet sayəsində Azərbaycanda yeni mətbuat, yəni vətəndaş jurnalistikası təşəkkül tapır. Bu, hal alternativ düşüncə tərzi hüququnu tanımayan avtoritar və ya totalitar ölkələrə xas olan sosial anomaliya və ya sosial fenomendir. 

Qloballaşmanın yeni mərhələsi, internet və sosial şəbəkələrin cəmiyyət həyatına təsiri belə ümid yaradır ki, artıq cəmiyyət demokratiyanın olmaması məsuliyyətini paylaşmağa başlayır. İnternet cəmiyyəti demokratikləşmə prosesinə cəlb edib, vətəndaş şüurunu, gələcəyə görə məsuliyyət hissini özünə qaytarıb. Onu həbs etmək, satın almaq, əzib məhv etmək mümkün deyil. Bu jurnalistika yalnız insanlar hüquqlarından könüllü imtina etdikdə məhv ola bilər. Vətəndaş məsuliyyətindən imtina isə belə ölkələrdə cəhalət, qaranlıq, zülmətin uzun illər ərzində davam edəcək hökmranlığını yaratması demək olar. -05D-