Ekspert Teleradio Şurasının səlahiyyətlərinin artırılmasını media azadlığına zərbə hesab edir

Azərbaycan Milli Televiziya və Radio Şurasının səlahiyyətləri artırılıb, eyni zamanda, teleradio yayımçılarına qarşı cəzalar sərtləşdirilib.

Milli Məclis fevralın 24-də “Televiziya və radio yayımı haqqında” qanununun 16.11-ci, 23.1-ci və İnzibati Xətalar Məcəlləsinin 187-1 və 187-2-ci maddələrinə dəyişikliklər edib.

Qanunun 16.11-ci maddəsinə edilən dəyişikliyə görə, teleradio yayımçısı istifadə haqqını müəyyənləşdirilmiş müddətdə ödəyə bilmirsə, MTRŞ məhkəmə qərarı olmadan yayımı dayandıra bilər.

Qanunun 23.1-ci maddəsinə edilən dəyişikliyə görə, teleradio yayımçıları lisenziyanın qayda və şərtlərini və qanunun tələblərini pozduqda lisenziyanın qüvvəsi və ya hər-hansı proqramın yayımı teleradio yayımı sahəsində müvafiq dövlət orqanının qərarı ilə bir ayadək müddətə müvəqqəti dayandırılır.

İndiyədək qüvvədə olan qanuna görə qaydalar, şərtlər və qanunun tələblərini pozduqda lisenziyanın qüvvəsi məhkəmənin qərarı ilə bir gündən yeddi günədək müvəqqəti dayandırıla bilər.

Dəyişikliklərdə bir sıra digər hallarda da teleradio yayımçılarının lisenziyalarının ləğv edilməsi səlahiyyəti Milli Televiziya və Radio Şurasına verilir.

İnzibati Xətalar Məcəlləsinin 187-1 (Televiziya və radio yayımı haqqında qanunvericiliyin pozulması) və 187-2-ci (Teleradio yayımı sahəsində xüsusi razılığın (lisenziyanın) qayda və şərtlərinin pozulması) maddəsinə edilən dəyişikliyə əsasən, göstərilən cərimələr vəzifəli şəxslər üçün 1500 manatdan 2500 manata qədər, hüquqi şəxslər üçün isə 5000 manatdan 8000 manata qədər tətbiq edilir.

Hər iki maddənin indiyədək olan sanksiyası vəzifəli şəxslər üçün 300 manatdan 500 manata qədər, hüquqi şəxslər üçün isə min manatdan 2 min manata qədərdir.

Media hüququ üzrə ekspert Ələsgər Məmmədli Turan agentliyinə bildirib ki, 2006-2007-ci ildən başlayaraq, İnizbat Xətalar Məcəlləsində cərimələrin miqdarı sürətlə artırılır. “Amma teleradio sektoru bahalı biznes sahəsi, lisenziya dəyərləri yüksək olmasına baxmayaraq, bu sahədə cərimələrdə artım qeydə alınmamışdı. Məsələn, QHT-lərə qarşı cərimələr 15 min manata qədər idisə, teleradio sahəsində cərimələr min manata qədər deyil. Bu artım yenə də real artım deyil. Əgər QHT-lərə 15 min manat cərimə kəsilirsə, teleradio sahəsinə bundan qat-qat artıq cərimələr kəsilməlidir. Çünki biznes strukurudur”.

Ekspert eyni zamanda istənilən sahədə yüksək cərimənin tərəfdarı olmadığını deyib. “Sadəcə balans baxımından bunu dedim. Tənzimləmələr həmişə adekvat olmayıb. Məsələn, qəzetlərə 30-50 min manat cərimələr kəsilir, amma televiziyalar çox cüzi cərimə edilir”.

Məmmədli Milli Televiziya və Radio Yayımı Şurasının səlahiyyətlərinin artırılmasını düzgün hesab etmir. “Əgər teleradio yayımı şurası seçki yolu ilə formalaşan kollegial bir qurum olsaydı, burada bir ziddiyyət axtarmaq düzgün olmazdı. Amma, təəssüf ki, bu gün teleradio şurasının üzvləri prezident tərəfindən təyin olunur. Bu baxımdan təyin olunmuş bir qurumun səlahiyyətlərinin artırılması media azadlığı baxımından mənfi təsir edəcək. Onsuz da Azərbaycanda televiziya sahəsində azadlıq çox aşağı səviyyədədir. Demək olar ki, yox səviyyəsindədir. Bu, əlavə inzibati resurslar televiziyaların ümumiyyətlə işləməsini daha da çətin vəziyyətə salacaq”.

Ekspert hesab edir ki, televizyalar siyasi basqılara daha çox məruz qalan qurumlardır. “Televiziyalarda siyasi pluralism, demək olar ki, yox vəziyyətindədir. Çünki onlar dövlət tərəfindən lisenziyalaşır. Lisenziya asılılığı var. Hər 6 ildən bir lisenziya almalıdırlar”, deyə o qeyd edib. -03B-