İnsan alverinə qarşı mübarizə üzrə beynəlxalq konfrans keçirilir

Bu gün ATƏT-in Bakı ofisi Exselsior otelində insan alveri qurbanlarının müdafiəsinə həsr olunmuş beynəlxalq konfrans keçirir. İkigünlük konfransda  məqsəd hakim, prokuror, vəkil və hüquqşünasların insan alveri və məcburi əmək hallarının mühakiməsində rolunun müzakirəsi, eləcə də insan alveri qurbanların müdafiəsi ilə bağlı müxtəlif ölkələrin təcrübəsini öyrənməkdir.     

Forumda Azərbaycanın Daxili İşlər, Ədliyyə nazirliklərinin vəzifəli şəxsləri, ATƏT-in insan alverinə qarşı mübarizə üzrə koordinatorunun xüsusi təmsilçisi, Beynəlxalq Miqrasiya Təşkilatı,  Özbəkistan, Böyük Britaniya, Türkiyə, Niderland, Moldova, Qazaxıstan, Qırğızıstan və başqa ölkələrdən hakimlər, ekspertlər,  qeyri- hökumət təşkilatlarının nümayəndələri iştirak edir. 

“İnsan alverinə qarşı mübarizəyə cəlb olunmuş bütün tərəflərin qurbanların zəif durumda olduğunu qəbul etməsi çox vacib haldır. Önəmli məsələlərdən biri də onların insan alveri qurbanı olduğu zaman məcburən törətdikləri əməllərə görə cinayət məsuliyyətinə cəlb edilməməsi və cəzalandırılmamasıdır”, - ATƏT-in Bakı ofisinin rəhbəri Koray Tarqay qeyd edib. 

Onun fikrincə, insan alveri cəmiyyətlərə ağır zərbədir. İnsan alveri qurbanları əsasən kasıblar, status ala bilməyən miqrantlar və kimsəsiz uşaqlar olur. 

Azərbaycan insan alverinə mübarizə sahəsində regionda nümunə ölkələrdən biridir. Burada insan alverinə və məcburi əməyə cəlb etməyə qarşı mübarizə ilə bağlı qanunlar və çoxsaylı digər hüquqi aktlar qəbul edib. Ölkədə bu sahədə milli fəaliyyət planı həyata keçirilir. 2012-ci ildə Azərbaycan ABŞ Dövlət Departamentinin 2-ci nəzarət siyahısından çıxarılaraq 2-ci qrup siyahısına salınıb. 

“Əgər əvvəlki illərdə hər il ölkədə insan alveri və məcburi əməklə bağlı 80-85 cinayət qeydə alınırdısa, 2013-cü ildə cəmi 15 insan alveri və 4 məcburi əmək halı qeydə alınıb”, - Daxili işlər Nazirliyinin İnsan Alverinə Qarşı Mübarizə Baş İdarəsinin rəisi Cavad Şıxəliyev qeyd edib. 

Onun sözlərinə görə, ölkədə insan alveri qurbanlarına 400 manat birdəfəlik yardım edilir. 

Eyni anda 46 qurbanı qəbul edən sığınacaq, qurbanların uşaqları üçün xüsusi sığınacaq və təhsilini davam etdirməsi üçün siniflər fəaliyyət göstərir. Bütün qurbanlar pulsuz paltar, yemək və hüquqi xidmətlə təmin olunur. 

O, insan alverinə qarşı mübarizə üzrə 2014-2018-ci illəri əhatə edəcək Milli Fəaliyyət Planının layihəsinin hazırlanaraq Nazirlər Kabinetinə təqdim edildiyini də diqqətə çatdırıb.-03C-