İntiqam Əliyevin işi üzrə prosesdə jurnalistlər təhqir olunub

Martın 10-da Bakı Ağır Cinayətlər Məhkəməsində hüquq müdafiəçisi İntiqam Əliyevin işi üzrə proses davam edib.

İclasın əvvəlində vəkil Fəxrəddin Mehdiyev Əliyev barəsində qətimkan tədbirinin dəyişdirilməsi, onun hüquq müdafiəçiləri və ictimaiyyət nümayəndələrindən ibarət qrupun zaminliyi ilə azadlığa buraxılması haqqında vəsatət qaldırıb.

Onlar məhkəmədən Əliyevin şəxsiyyətini, hüquq müdafiə fəaliyyətini, ölkədə və xaricdə məşhurluğunu nəzərə almağı xahiş ediblər. Müraciət müəllifləri Əliyevin azadlıqda olarkən məhkəmə iclaslarına gələcəyinə zamin olublar.

Lakin prokuror buna qarşı çıxaraq bildirib ki, qətimkan tədbirinin dəyişdirilməsinə “ehtiyac” görmür, hakim Rasim Sadıxov vəsatəti təmin etməyib.

Daha sonra vəkil Şəhla Hümbətova bildirib ki, prokurorluq yenə Hüquq Maarifçiliyi Cəmiyyətinin (HMC) ofisində axtarış zamanı müsadirə edilmiş maliyyə sənədlərinin və avadanlığın qaytarılması haqqında sorğusunu rədd edib.

Hakim Sadıxov bildirib ki, prokurorluq sənədlərin bir hissəsini qaytarıb. Lakin Əliyev özü deyib ki, onun Avropa İnsan Hüquqları Məhkəməsində apardığı işlərin bir hissəsi qaytarılıb, onların bu cinayət işi ilə əlaqəsi yoxdur.

Digər tərəfdən, hətta onun AİHM-də apardığı işlər üzrə də bütün sənədlər qaytarılmayıb.

Daha sonra vəkil Hümbətova Ədliyyə Nazirliyinin reyestrindən qrantların qeydiyyatı haqqında məlumatları istəmək barədə vəsatət qaldırıb. Çünki bu məlumatlar müdafiə tərəfə verilmir. Qrantların qeydiyyatı haqqında bildirişləri isə istintaq müsadirə edib. Əliyev məhz qrantları qeydiyyatdan keçirmədən layihələr həyata keçirməkdə təqsirləndirilir.

Vəkil Cavadov həmçinin Unibank-a zərərçəkmiş Əfsanə Orucovanın – HMC-nin mühasibi Gülşən Orucovanın bacısının hesablarından tam çıxarış istənilməsi haqqında vəsatət qaldırıb.

Vəkil deyib ki, işdə olan qismi çıxarışlar zərərçəkmişin özü tərəfindən təqdim edilib və onların doğruluğu şübhə doğurur. Lakin hakim hər iki vəsatəti təmin etməyib.

Daha sonra Əfsanə Orucova ifadə verib, o, bankda onun adına hesab açıldığını, oraya pul köçürüldüyünü, daha sonra o pulları Əliyevə verdiyini deyib. Bu zaman o qeyd edib ki, pulu bacısı – MHC-nin mühasibi vasitəsilə verirdi.

Ə.Orucova bu sövdələşmənin şərtlərini qəbul etməsini onunla izah edib ki, o, pensiya fonduna vergilər və ödəmələr ödəyirdi.

Fərdi vergi ödəyicisinin identifikasiya nömrəsinə malik olub-olmadığı haqqında suala cavabda o, xatırlamadığını deyib.

Ə.Orucova bildirib ki, pullar tərcümə xidmətinin ödənişi kimi tərtib edilirdi.

Müdafiə tərəfin bankın ona hansı əsaslarla pul verdiyi, tərcümə xidmətləri haqqında müqavilə təqdim edib-etmədiyi haqqında sualı, prokurorun israrı ilə ləğv edilib.

Ümumiyyətlə bir çox suallar ya prokurorun təklifi ilə, ya da hakimin özü tərəfindən ləğv edilirdi.

Əliyev məhkəməyə etiraz etdiyini bildirib. Hakim bununla əlaqədar yazılı ərizə yazmağı təklif edib.

Mühasib G.Orucovanın bacısının yerinə sual vermək və sualları cavablandırmaq cəhdi müdafiə tərəfin və zalda iştirak edənlərin qəzəbinə səbəb olub.

Daha sonra o, zalda oturan jurnalistləri təhqir etməyə başlayıb, onları “ermənilərdən pul alan vicdansız, naxələf, şərəfsiz və satqın adlandırıb”.

Daha sonra G.Orucovanın hüquqi nümayəndəsi, Vəkillər Kollegiyasının üzvü Nemət Heydərov da hakimi təhqirlərə son qoymağa çağıran jurnalistləri təhqir etməyə başlayıb.

Mübahisələrlə əlaqədar hakim iclası dayandırıb, zalı boşaltmağı tələb edib. Sonradan iclasın martın 17-nə təyin edildiyi elan edilib.

Vəkil Heydərovun təhqirlərinə məruz qalmış jurnalistlər və ictimaiyyət nümayəndələri Vəkillər Kollegiyasına şikayət vermək niyyətindədirlər.

Bundan başqa, onlar G.Orucovanı və N.Heydərovu şərəf və ləyaqəti təhqir etdiklərinə görə məsuliyyətə cəlb etməyə hazırlaşırlar.

* İntiqam Əliyev 8 avqust 2014-cü ildə qanunsuz sahibkarlıq, vergi ödənişindən yayınma və vəzifə səlahiyyətlərindən sui-istifadə ittihamları ilə həbs edilib. Sonradan o, həmçinin mənimsəmə və vəzifə saxtakarlığında ittiham olunub. Amnesty İnternational beynəlxalq hüquq müdafiə təşkilatı onu “vicdan məhbusu” kimi tanıyıb. -06C-

Rəy yaz

Cəmiyyət

İran Prezidentinin həlak olduğu hadisə Azərbaycan- İran münasibətlərinə təsir edə bilərmi? – Nəsimi Məmmədli Çətin sualda



Bizi sosial şəbəkələrdə izləyin

Xəbər lenti