Kür daşqınlarından zərər cəkmişlər FHN-ə qarşı

2010- cu ilin yazında baş vermiş Kür Araz daşqınları zamanı evlərinə və təsərrüfatlarına ciddi ziyan dəymiş, problemləri bu günə qədər həll olunmayan bir qrup Saatlı, Sabirabad, Salyan və İmişli rayon sakinlərinin Fövqəladə Hallar Nazirliyinə (FHN) və Meliorasiya və Su Təsərrüfatı ASC- yə, eləcə də yerli rayon İcra Hakimiyyətlərinə qarşı Şirvan şəhər İnzibati İqtisad Məhkəməsində növbəti  məhkəmə prosesi keçirilib. Hakim Elxan Əmirəliyevin və İxtiyar Abuşovun sədrliyi ilə 4 qrup olmaqla 18 nəfərin iddiasına baxılıb. Məhkəmədə cavabdeh tərəf- FHN- nin nümayəndəsi Vüqar Hacıyev, iddiaçılarla yanaşı onların nümayəndəsi, “Kür” Vətəndaş Cəmiyyəti Qərargahının koordinatoru Oqtay Gülalıyev iştirak edib. Meliorasiya və Su Təsərrüfatı ASC- nin nümayəndəsi məhkəməyə gəlsə də məhkəmə prosesində iştirakdan imtina edib.

“Kür” Vətəndaş Cəmiyyəti Qərargahının məlumatına görə, məhkəmədə çıxış edən Fövqəladə Hallar Nazirliyinin nümayəndəsi Vüqar Hacıyev bildirib ki, evlərinin bərpa- gücləndirilməsinə qərarı verilmiş, hazırda adı iddiaçıların siyahısında olan bəzi şəxslərə son günlər kompensasiya verilməsinə başlanılıb. O eyni zamanda iddiaçıların evinə keçirilən texniki baxışla bağlı baxış aktlarının surətini və iddia ilə bağlı təmsil etdiyi nazirliyin rəsmi mövqeyini məhkəməyə təqdim edib. FHN təmsilçisi qeyd edib ki, iddiaçılar arasında bəzi şəxslər var ki, onların evlərinə nazirliyin müvafiq komissiyası tərəfindən indiyə qədər baxış keçirilməyib. O fikrini bununla əlaqələndirib ki, evlərinə baxış keçirilən şəxslərin siyahısı FHN- ə yerli İcra hakimiyyətləri tərəfindən təqdim olunur və həmin şəxslərin adları sözü gedən siyahıda olmayıb. FHN təmsilçisi eyni zamanda qeyd edib ki, bəzi iddiaçıların iddiası üzrə onların evləri ilə bağlı araşdırmalar davam edir. 

Məhkəmədə çıxış edən iddiaçıların nümayəndəsi, hüquq müdafiəçisi Oqtay Gülalıyev 2010- cu ilin yazında baş vermiş Kür Araz daşqınlarından 30 aya yaxın vaxt keçməsinə və problemlərin həlli istiqamətində dövlət büdcəsindən 460 milyon manat vəsait ayrılmasına baxmayaraq evlərinin bərpa- gücləndirilməsinə qərar verilmiş vətəndaşlara müvafiq kompensasiyaların indi verilməsinə başlanılmasın gec də olsa müsbət addım kimi dəyərləndirib və bu addımı son aylarda FHN- ə qarşı artan məhkəmə iddiaları ilə əlaqələndirib. O, FHN- ni digər iddiaçıların da problemlərinin həlli istiqamətində müvafiq addımlar atmağa çağırıb.

Məhkəmənin gedişində iddiaçıların bir qismi son zamanlar onların iddiasının təmin olunması, evlərinin tikilməsi və kompensasiyaların, eləcə də bərpa gücləndirmə pullarının verilməsini nəzərə alaraq iddialarından imtina etdiklərini bildirdilər. Qalan iddiaçılar iddialarında qaldıqlarını qeyd edərək məhkəmədən ziyan dəymiş, yaşayış üçün yararsız vəziyyətə düşmüş evlərinin tikilməsini və ya bərpa olunmasını, eləcə də onlara ədalətli kompensasiya ödənilməsinin FHN üzərinə qoyulması ilə bağlı qərar çıxarılmasını məhkəmədən xahiş ediblər. 

İddiaçılar həmçinin 2010- cu ilin yazında baş vermiş Kür Araz daşqınlarının əsas səbəblərindən biri kimi adı çəkilən çayların vaxtlı- vaxtında təmizlənməməsi və bəndatma, sahilbərkitmə işlərinin aparılmadığını əsas gətirərək onlara dəyən ziyana görə Meliorasiya və Su Təsərrüfatı ASC- ni və onun sədri Əhməd Əhmədzadəni məhkəməyə verdiklərini bildirdilər. İddiaçılar eyni zamanda qeyd etdilər ki, bütün bunlar az imiş kimi daşqınlardan sonra dövlət büdcəsindən külli miqdarda vəsait ayrılmasına baxmayaraq Meliorasiya və Su Təsərrüfatı ASC Kür və Araz çayları ətrafında sahil bərkitmə və bəndatma işlərini həyata keçirərəkən onlara məxsus təsərrüfatları, bağ- baxçaları, hətta yardımçı tikililərini, tövlələrini, həyatyanı torpaqlarını belə böyük traktorların qabağına verib süpürüb bəndlərə vurublar. Nəticədə onlara həm daşqın zamanı, həm də daşqından sonra xeyli həcmdə ziyan dəyib, torpaqları zəbt olunub və ya yarasız hala düşüb. Ə. Əhmədzadənin nümayəndəsinin məhkəməyə gəlsə də məhkəmədə iştirak etməməsi isə  iddiaçıların haqlı narazılığına səbəb oldu və bunu özlərinə, eləcə də məhkəməyə hörmətsizlik kimi qiymətləndirdiklərini bildirdilər.

Hakim tərəfləri barışığa, ortaq məxrəc tapmağa dəvət edib. O növbəti məhkəmə prosesində İmişli və Saatlı RİH- in iştirakı ilə bağlı adı çəkilən quruma rəsmi məktub göndəriləcəyini bildirərək məhkəmə prosesini 28 noyabra qədər təxirə salıb.

Xatırladaq ki, 2010- cu ilin yazında baş verən Kür Araz daşqınları zamanı ölkənin 30- a yaxın rayonunda evlərə və təsərrüfatlara ciddi ziyan dəyib. Ziyanın aradan qaldırılması üçün dövlət büdcəsindən 460 milyon manatdan artıq vəsait ayrılıb. Hələ də yüzlərlə insan evlə və ədalətli kompensasiya ilə təmin olunmayıblar. 130 ailə bununla bağlı FHN, Meliorasiya və Su Təsərrüfatı ASC- ni, eləcə də yerli İcra Hakimiyyətlərini məhkəməyə veriblər. 2 nəfərin iddiası Avropa İnsan Hüquqları Məhkəməsinə göndərilib. İddiaçıların hüquqları “Kür” Vətəndaş Cəmiyyəti Qərargahı tərəfindən qorunur.—06D--