L.Xəlilov: Krım tatarlarını yeni deportasiya və kütləvi həbslər gözləyə bilər

Azərbaycan Türk Ocaqları Birliyi (ATOB) Krım tatarlarının Krımdan deportasiya olunmalarının 70 illiyi ilə bağlı dəyirmi masa keçirib.

Krım tatarlarının deportasiyası türk xalqlarına zülmün bir nümunəsi kimi dəyərləndirilib. Bu deportasiya sovet rejiminin türk xalqlarından və o cümlədən Krım tatarlarından qisas alması adlandırılıb. “Sovet rejimi Krım tatarlarını tarixi vətənlərindən məhrum etdi, sonralar bu addımın səvh olduğu etiraf olunsa da, Krım tatarlarına tarixi vətənlərinə dönməyə icazə vermədilər”, - deyə qurumun rəhbəri Zahir Əlisoy mövqeyini bildirib.

Krım tatarlarına qarşı repressiyaların 1800-cü illərdən, yəni Krım müstəqilliyini itirəndən başlandığı vurğulanıb. Uzun zaman Rus imperiyasına tabe olmayan Krım tatarlarının müxtəlif vaxtlarda repressiyaya uğradıqları deyilib. Sovet rejimi ilk vaxtlarda Krım sovet sosialist respublikasının yaranmasını məqbul sayıb. Daha sonra Stalinin şəxsində “ittifaqçılar” mövqelərini gücləndirdikdən sonra Krım Muxtar respublikasına döndərilib. Ən son olaraq 1944-cü il mayın 18-də kütləvi şəkildə Orta Asiyaya sürgün ediliblər. “Amma sovet rəhbərliyi biləndə ki, yarımadada Krım tatraları hələ var, gəmiyə dolduraraq Azov dənizinə çıxarıb və orada suya qərq ediblər”, - deyə Krım tatarlarının təmsilçisi Lir Xəlilov qeyd edib. Sovet rejimi deportasiya olunan xalqlara sonradan vətənlərinə dönmək icazəsi versə də, Krım türklərinə, axıska türklərinə belə hüquq tanımayıb. Bundan ötrü uzunmüddətli mübarizə getsə də, Krım tatarları tarixi vətənləri olan Krıma ancaq sovet rejimi dağıldıqdan sonra qayıda biliblər.

Krımın bu gününə toxunan natiq Rusiyanın Krımı ilhaq etməsilə yenə də Krım tatarlarının həyatları üçün deportasiya təhlükəsi yarandığını deyib. Krım tatarlarının Ukraynanın maraqlarını müdafiə etməsinin məntiqi olduğu vurğulanıb. 

“Rusiya avtoritar dövlət olduğu üçün Krım tatarları onun tərkibində bütün azadlıqlarından məhrum olacaqlar”, - deyə L.Xəlilov Krım tatarlarının mövcud durumunu anladıb. İndiki durumun yaranmasında rəsmi Kiyevin də günahı olduğunu nəzərə çatdırıb. Krım tatarlarının müraciətlərinə baxmayaraq, rəsmi Kiyev Krım tatarlarını yarımadanın yerli xalqı kimi tanımaq istəməyib. Bu isə Rusiyaya “Krımda rusların hüquqlarını müdafiə etməsi” adı altında Krıma hücumunu asanlaşdırıb. 

Beynəlxalq aləmə və türk dünyasına müraciət edən L.Xəlilov Krım tatarlarının haqlarını ən ciddi şəkildə qorumağa çağırıb.

18 may Krım tatarlarının deportasiyası gününü hər il xalqın izdihamlı aksiyalarla yad etdiyini deyən L.Xəlilov bu il Krımda bu tarixi qeyd etməyə “oyuncaq hökumət”in icazə verməməsinə diqqət çəkib. Beynəlxalq aləmə və türk dünyasına müraciət edən L.Xəlilov Krım tatarlarının haqlarını ən ciddi şəkildə qorumağa çağırıb. -05C-