Media-icmal 02.04.21

Azərbaycanın media orqanları ölkə həyatı üçün aktual saydıqları məsələləri gündəmin müzakirəsinə  gətirirlər.

“Yeniavaz.com” saytı “AZAL-ın fəaliyyəti ilə bağlı ən vacib gözlənti bilet qiymətinin azaldılmasına nail olmaqdır”  sərlövhəli məqalədə “Azərbaycan Hava Yolları”nın (AZAL) fəaliyyəti müzakirə edilir.

Nəzərə çatdırılır ki, AZAL-ın tətbiq etdiyi bahalı qiymət və xidmətlər əhali arasında ciddi narazılıqla qarşılanır. Eyni zamanda, davamlı tənqidlərə baxmayaraq, müsbət mənada irəliləyiş baş vermir.  

Haqqında bəhs edilən məsələ ilə bağlı şərh verən ekspertlər deyirlər ki, AZAL-ın problemi düzgün qoyulmalı və onun əsasında çıxış yolu axtarılmalıdır.

Ekspertlərə görə, AZAL-da əsas problem bilet və xidmətlərin çox baha olmasıdır. Ekspertlər hesab edirlər ki, istənilən halda AZAL-ın hava yolları kimi fəaliyyəti zərərlidir, onu başqa şirkətlər əvəz edə, aktivləri özəlləşdirilə, başqa qurumla əvəzlənə bilər. Ekspertlər  düşünürlər ki, AZAL İnvestisiya Holdinqinin nəzarətinə verilsə də, holdinq problemlərin mahiyyətini gizlədir.

Mütəxəssislər hava limanı və AZAL-ın bir-birindən ayrılmasını irəli sürürlər, çünki, hava limanı AZAL-a tabedir deyə qiymətləri AZAL təyin edir, bu hava limanından digər yerli hava yolları ucuz qiymətə istifadə edə bilmirlər. Bu AZAL-ın müəssisə maraqlarına uyğun gəlir, odur ki, hava limanları AZAL-ın tabeliyindən çıxarılmalıdır. Ekspetlərə görə, aidiyyatı qurumlar şəffaflıq tələb etməli, oyunun qaydalarını müəyyən etməlidirlər.

“Neft bazarında sabitsizlik: Qlobal böhranın manata və Azərbaycan iqtisadiyyatına təsirləri - ekspert rəyi” sərlövəhli məqalədə isə neft bazarındakı vəziyyət qiymətləndirilir.

Müəllifə görə, neft bazarındakı durum hasilatçılar üçün ürəkaçan deyil, iri neft ixracatçılarının hasilatın azaldılmasına dair saziş imzalamasına baxmayaraq, neft qiymətləri düşməkdə davam edir.

Müəllif deyir ki, xüsusilə koronavirus pandemiyasının dünya iqtisadiyyatına, eləcə də neft bazarına zərbəsi danılmazdır, Azərbaycana daxil olan valyutanın 85 faizə yaxını enerji sektorunda formalaşır, odur ki, qlobal neft bazarında neftin qiyməti düşəndə və qalxanda bunun Azərbaycan iqtisadiyyatına təsirini ekspertlər dəyərləndirirlər.

Ekspertlər deyirlər ki, hazırda bazarda neftin qiyəti 64 dollar civarındadır və neftin qiyməti bundan sonra çox artmayacaq, əksinə, 5-10 faiz ucuzlaşması trendi var.

“Müsavat.com” saytı isə “Sərt karantin rejimi olsunmu? Fərqli yanaşmalar” sərlövhəli məqalədə son vaxtlar koronavirusa yoluxmada artım olması ilə bağlı sərt karantin rejiminə gedilib-gedilməməsini müzakirə edir.

Məsələnin mahiyyəti bundan ibarətdir ki, mütəxəssislərin arasında bu məsələyə baxışda vahid möve yoxdur. Mütəxəssislərin bir qismi qaydalara riayət edilməsilə rejimin yumşaldılmasının tərəfdarıdır, digər qismi hesab edir ki, yoluxma artdığı üçün sərt karantin rejiminə keçilməlidir.

Mütəxəssislərə görə, xalq sərt karantin rejiminə keçməyə yox deyir, hökumət tərəddüd edir, yoluxma isə artmaqdadır və belə davam edərsə perspektivdə vəziyyət daha da pisləşə bilər.  

Koronavirusa yoluxanları müalicə edən həkimlərin bəziləri də düşünür ki, karantin olmalı, amma yumşaq karantin tətbiq edilməlidir, qaydalara riayət edilməli, qapanmalara gedilməməidir.

Bu mövqedə olan həkimlərə görə, qapalı oturmaq da olmaz, çünki insanlar ruhdan düşürlər və sərt karantinin tərəfdarı deyillər.

Amma yoluxmanın artmasını əsas gətirən həkimlər hesab edirlər ki, sərt karantin  rejimi tətbiq edilməlidir, əks halda yoluxmanın üçüncü, dördüncü dalğası da ola bilər.

“Sfera.az” saytı isə, “Türkdilli dövlətlərin Zirvə görüşünün tarixi əhəmiyyəti - əməkdaşlıq daha güclü platformaya keçəcək” sərlövhəli məqalədə türkdilli dövlətlərin başçılarının martın 31-də keçirilmiş qeyri-rəsmi Zirvə görüşünü dəyərləndirir.  

Məsələ ilə bağlı şərh verən ekspertlərə görə, Türk Dövlətləri Əməkdaşlıq Şurası türkdilli dövlətlər arasında inteqrasiya proseslərini sürətləndirir, bu dövlətlər arasında biriyi gücləndirir. Onlara görə, keçirilmiş tədbir bu dövlətlər arasında əlaqələrin və əməkdaşlığın daha da gücləndirirlməsinin növbəti təzahürüdr.

Ekspertlər hesab edirlər ki, hətta bu video-konfrans özü belə tarixi əhəmiyyətə malikdir. Onların fikrincə, bu, gələcəkdə türkdilli dövlətlərin əməkdaşlığının güclü platformaya keçməsinə zəmin yaradır.

“Modern.az” saytı “Təhsil naziri məktəblərin bağlanmasından danışdı” sərlövhəli məqalədə bu prosesin baş verməsinin səbəbini təhsil naziri Emin Əmrullayevə istinadən təqdim edir.

Nazir deyir ki, koronavirusa yoluxmanın üstünlük təşkil etdiyi

Bakıda, Sumqayıtda, Gəncədə, Şəkidə və Abşeron rayonunda tədrisin distant formaya keçirilməsi ilə bağlı qərar qəbul edildi.

Nazir əlavə edir ki, son həftə ərzində olan yoluxmaların 80%-dən çoxu bu bölgələrin payına düşür.

Onun sözlərinə görə, yoluxma hallarının daha az baş verdiyi yerlərdə tədris əyani formada həyata keçiriləcək, amma yoluxma halları artarsa həmin ərazilərdə də tədrisin distant formaya keçirilməsi nəzərdə tutulur: "Pandemiyanın hazırkı mərhələsində ümumi təhsil müəssisələrinin fəaliyyətinin təşkilinə dair 30 mart tarixində elan etdiyimiz sorğu çərçivəsində 50.000- ədən çox rəy qəbul edilib. Rəylərin əksəriyyətinə görə, məktəblərin bu və ya digər formada distant tədrisə keçirilməsi qeyd olunurdu", deyə nazir bu bölgələrdə distant təhsilə keçidin daha bir səbəbinə aydınlıq gətirir.