Media-icmal 02.05.2016

Onlar heç zaman unudulmayacaq

“Azərbaycan” qəzeti Azərbaycan Diplomatiya Akademiyasında məzunlar buraxılışı və “Qəhrəmanlar unudulmur” adlı mərasim və tədbirdə ölkənin birinci xanımı Mehriban Əliyevanın çıxışı barədə yazır.

M.Əliyeva Akademiyanın yaradılması münasibətilə rəhbərliyi və tələbə kollektivini təbrik edib. M.Əliyeva bu ali məktəb haqda deyib: “ADA Univesiteti ölkəmizdəki çoxsaylı universitetlər arasında gənc olmasına baxmayaraq, qısa bir zamanda böyük nüfuz və hörmət qazanmış universitetdir”.

M.Əliyeva çıxışında Qarabağ mövzusuna da toxunub və bu il aprelin 2-5-də cəbhədəki əməliyyatlarla bağlı bildirib: “Aprelin əvvəlində bizim mərd övladlarımız Vətən yolunda şəhid oldular. Onların qəhrəmanlığı hesabına əldə edilən uğurlar hər bir azərbaycanlının ürəyini qürur hissilə doldurdu. Şəhid olan bütün övladlarımız Azərbaycan xalqının qəlbində yaşayacaq. Onların ailələrinə yardım etmək Azərbaycan dövlətinin ən başlıca vəzifəsidir.

Biz Azərbaycanın müstəqilliyi və ərazi bütövlüyü yolunda canlarını qurban verən qəhrəmanlarımızın əziz xatirəsi qarşısında baş əyirik. Onlar heç zaman unudulmayacaq”.

H.Hacızadə: Rusiya hər yerdə düşmən görür

“Azadlıq” qəzeti Avropa Birliyinin Azərbaycanı da əhatə edən “Şərq Təfədaşlığı Proqramı”na Rusiyanın sərt münasibətini və Qərbdən Azərbaycana sanksiya təhdidlərini politoloq Hikmət Hacızadə ilə araşdırır.

“Rusiya Azərbaycanı niyə Avropada görmək istəmir?” sərlövhəli məqalədə Rusiya XİN başçısı Sergey Lavrov Avropa Birliyinin adı çəkilən layihəsini Rusiyanın nüfuzdan salınmasına xidmət etməsi kimi dəyərləndirir. S.Lavrov məsələyə belə münasibət ifadə edir: “Bizi Şərq Tərəfdaşlığının əvvəlki kimi ərazilərin zəbt edilməsi və bu ərazilərdə Rusiyanın nüfuzunun azaldılmasına yönəlmiş geo-siyasi layihə kimi istifadə edilməyəcəyinə inandırmağa çalışırlar”. Rusiya bu kontekstdə əməkdaşlıq etməyəcək və “boş oturmayacaq””.

Digər tərəfdən məqalədə Qərbin Azərbaycana sanksiya tətbiqinin ciddi niyyət olduğunu rəsmi Bakının anladığı qeyd edilir və bu ilin martında bir qrup siyasi məhbusun azadlığa çıxması bu niyyətin göstəricisi kimi dəyərləndirilir.

H.Hacızadəyə görə, bütün problem Rusiyanın aqressiv xarici siyasət kursu ilə bağlıdır. Bu açqılama Rusiyanın bütün dünya ilə qarşıdurmaya getməsi deməkdir. Rusiyanın yürütdüyü kütləvi psixoz siyasətinin nəticəsidir. Hər addımda düşmənçilik siyasəti görürlər. Görünür, Rusiyanın rəhbərliyi və ictimaiyyəti sağalmaz xəstəliyə yoluxub. Bu siyasətin sonu yaxşı olmayacaq”.

Politoloq Rusiyanın bu irrasional addımlarını Azərbaycan üçün böyük təhlükə adlandırıb. “Çünki Azərbaycan belə təhlükəli siyasət yürüdən bir dövlətin yanında qərarlaşıb”.

Güzəştlər olacaq , ya yox?

“Yeni Müsavat” qəzeti “Problemli kreditlər yenidən gündəmdə” sərlövhəli məqalədə bu məsələni ekspertlərlə müzakirə edir. Müzakirəyə səbəb isə deputat Vahid Əhmədova istinadən parlamentdə bu məsələ ilə bağlı qanun layihəsi hazırlanmaqda olması göstərilir.

Deputat Əli Məsimov ikinci devalvasiyadan sonra dollarla götürülmüş kreditlərin qaytarılması sahəsindəki problemin həllinə belə yanaşır. “Təklif edirik ki, burada dövlət qurumları ilə bankların maraqları balanslaşdırılsın. Bir hissəsini banklar, bir hissəsini dövlət qurumları, bir hissəsini dollarla kredit götürən vətəndaşlar, bir hissəsini də Mərkəzi Bank öz üzərinə götürüsün”.

Amma layihə ilə bağlı ekspert Əkrəm Həsənov deyir ki, bu layihə indiki kreditlərə yox, bundan sonra götürüləcək kreditlərə şamil edilir. İndiki kreditlərin taleyinə aidiyyatı yoxdur. “Biz artıq dəfələrlə eşitmişik ki, hökumət təmsilçiləri güzəştin olmayacağını deyirlər. Hökumət deyirsə ki, güzəşt olmayacaq, deməli bunun üçün pul yoxdur, pul yoxdursa, parlament tərəfindən belə qanunun qəbul edilməsi gözlənilmir”.

Ekspert Natiq Cəfərli hökumətin və Mərkəzi Bankın dollarla kreditlər məsələsində yükü vətəndaşların çiyinlərinə qoymasını səhv yanaşma adlandırır. O, bu kretditlərlə bağlı indiki durumu belə anladır: “Həm hökumət, həm Mərkəzi Bank durumun ciddiliyini anlayırlar. Hökumət anlayır ki, belə davam etsə, bank sektorunda çöküş baş verə bilər, elə banklar var ki, probemli kredit həcmi 80%-i keçib”.

Ekspert Vüqar Bayramov isə bu məsələdə bankların güzəştə getməyəcəklərini deyir: “Banklar heç bir güzəştə getmək istəmir və praktik olaraq getmirlər. Müştərilərin heç də hamısı belə böyük fərqi qarşılamaq imkanlarına malik deyil. İl yarım öncə, 10 min dollar kredit götürən şəxsin indi təkcə ana məbləğdə fərqi 7200 manat edir, faizlərlə birgə müştəri banka 20 min manatdan çox pul ödəməlidir”.