Media-icmal 02.12.17

Azərbaycan ordusunun qüdrəti, Azərbaycan insanının kasıblaşması, sosial müdafiə siyasətinin yetərsizliyi bugünkü (02 dekabr, 2017-ci il) medianın aparıcı mövzularındandır...Cənubi Qafqazın ən güclü ordusu

"Azərbaycan" qəzeti "Cənubi Qafqazın ən modern və güclü ordusu" sərlövhəli (http://www.azerbaijan-news.az/index.php?mod=3&id=134989) məqalədə Azərbaycan ordusunun rol və gücünü dəyərləndirir.

Müəllif güclü ordunu dövlətin və xalqın təhlükəsiz yaşamaq təminatı kimi dəyərləndirir, dərhal da bu müstəvini 30 ilə yaxın davam edən Qarabağ problemi üzərinə gətirir.

Müəllif vurğulayır ki, problemin dinc vasitələrlə həllinə beynəlxalq qurumların da vasitəçi olmasına baxmayaraq, hələ ki, real nəticələr yoxdur.

Həm də müəllif problemin həllini tapmamasının əsas səbəbkarı kimi Ermənistanın BMT səviyyəsində qəbul edilən qətnamələrin tələblərini yerinə yetirməməsini göstərir.

Məqalə müəllifi də bundan irəli gələrək deyir ki, bu problem dinc vasitələrlə həllini tapmadığı halda Azərbaycan tərəf torpaqlarını hərb yolu ilə azad etməyə məcbur olacaq: "Müharibə variantında kimin qalib gələcəyini bütün dünya bilir. Təkcə ordumuzun ötənilki aprel zəfərini misal gətirmək yetərlidir. Reallıq ondan ibarətdir ki, Azərbaycanın inkişafı və artan maliyyə imkanları Silahlı Qüvvələrimizin də müasir standartlara cavab verən peşəkar orduya çevrilməsində mühüm rol oynayıb. Hazırda Cənubi Qafqazın ən böyük gücünə malik Azərbaycanın Silahlı Qüvvələri öz döyüş hazırlığına görə MDB məkanında ön sıralarda gedir".

Yazıda Azərbaycan ordusunun həm texniki təminat, həm döyüş qabiliyyəti, həm müasir silah arsenalına malik olduğu, "Global Firepower" beynəlxalq şirkətinin dünyanın ən yaxşı ordularının yenilənmiş reytinqinə dair hesabatında Azərbaycan ordusunun 58-ci pilləyə yüksəldiyi göstərilir.

Müəllif Azərbaycan ordusunun qüdrətli olmasının sübutu kimi prezident İham Əliyevdən sitat da gətirir: "Bu günün özündə biz işğal edilmiş torpaqlarda istənilən hədəfi məhv edə bilərik. Amma biz öz hərbi potensialımızı daha da gücləndirməliyik. Buna ehtiyac var və buna imkanlarımız çatır. Yoxsul Ermənistandan fərqli olaraq, biz bütün hərbi texnikanı öz hesabımıza alırıq və Azərbaycanda da bu texnikanı istehsal edirik".

Yazı müəllifi ölkədə güclü hərbi-sənaye kompleksi formalaşdığını xüsusi olaraq vurğulayaraq deyir ki, Azərbaycan ordusunun vəzifəsini layiqincə yerinə yetirməyə hər an hazır olması reallıqdır və son dövrlərin hərbi uğurları da xəbər verir ki, ərazi bütövlüyünün bərpa ediləcəyi gün uzaqda deyil.

Neftin ucuzlaşmasının yadigarı -sınıq təknə

"Exo" qəzetində isə "Azərbaycanda neftin ucuzlaşması insanları "sınıq təknə" yanında qoyub" (http://ru.echo.az/?p=65042) sərlövhəli məqalə oxumaq olar.

Müəllif ölkədə işsizliyin artmasını "Xidmət-iş" Həmkarlar İttifaqları Federasiyasinin vitse-prezidenti Cəmaləddin İsmayılovla müzakirə edir.

"Bu gün bir çox subpodratçı olan neft şirkətləri Azərbaycanda fəaliyyətlərini dayandıraraq ölkədən gediblər və nəticədə minlərlə Azərbaycan vətəndaçı işsiz qalıb". C.İsmayılov durumu qəzetə belə anladır.

C.İsmayılov deyir ki, neftin qiymətinin azalması Azərbaycana xaricdən gələnləri yox, məhz yerli vətəndaşları "sınıq təknə" yanında qoyub.

Ekspertə görə, neftin qiymətinin enməsinin nəticəsi olaraq ilkin zərbə neft sahəsinə, daha sonra tikinti sektoruna dəyib.

C.İsmayılov vurğulayır ki, neft sektoru hələ özünə gəlməsə də tikinti yenidən dirçəlməyə başlayır və xaricilər yenə də qayıdırlar: "Qayıdanlar əsasən türk kapitallı türk şikətləridir, amma burada tikintidə fəhlə və digər mütəxəssislər kimi çalışanlar azərbaycanlılardır. "Bu şirkətlərdə işçilərin əmək hüquqlarının pozulmasına gəlinçə. nisbi azalma var.

Ekspert Nəriman Ağayev də deyir ki, Azərbaycan iqtisadiyyatının daxili problemləri Azərbaycanda çalışan xaricilərin gəlirlərinə təsir etməyib, belə ki, onlar maaşlarını dollarla alıblar və bu mənada ziyan çəkməyiblər.

N.Ağayev belə hesab edir ki, neftin qiymətinin düşməsilə yaranan beynəlxalq xammal böhranı neft şirkətlərinin gəlirlərinə də artıq təsir göstərir və buna görə də şirkətlər xaricdən gələn bahalı işçi qüvvəsindən imtina edəcəklər.

Ekspert yaxın illərdə Azərbaycanda çalışan xaricdən gələn işçilərin sayının azalacağını bildirir və daha sonra durumun necə dəyişəcəyinin neftin qiymətindən aslı olduğunu vurğulayır.

N.Ağayev hesab edir ki, xarici işçi qüvvəsinin ölkədən getməsi Azərbaycanın xeyrinədir, belə ki, yerli işçi qüvvəsini bu sahələrə cəlb etmək olar.

Amma ekspert deyir ki, xaricilərə ödənilən yüksək maaşları onlara ödəməyəcəklər, amma hər halda digər sahələrlə müqayisədə neft sahəsində maaşlar daha yüksəkdir.

Sosial müdafiəyə ehtiyacı olanlar artır"Novoye Vremya" qəzetində isə diqqəti "Meyarlar müəyyən edildi: Ehtiyacı olanlar azalmayacaq" sərlövhəli məqalə cəlb edir. (http://www.novoye-vremya.com/w113132/.../#.WiGkuEpl_IU).Müəllif ehtiyac meyarlarının və yaşayış minimunun qaldırılmasının zərurət olduğunu bildirir və bunun indiki sosial müavinətlərin sədəqə səviyyəsində olması ilə izah edir.

Məqalə müəllifi 2018-ci il üçün ünvanlı sosial yardımın 14 manat artırılaraq 130 manat, yaşayış minimumunun isə 155 manat təşkil etdiyini bildirir və bu məbləğlərə belə münasibət ifadə edir: "Hökumət hesab edir ki, bu məbləğlər normal həyat təminatı üçün yetərlidir, əslində isə nə ehtiyac meyarı, nə də yaşayış minimumu hakimiyyətin əhaliyə "sosial dəstək" bəyanatları ilə üst-üstə düşmür" .

Müəllif birmənalı olaraq bildirir ki, bu məbləğə bir ay yaşamaq, ümumiyyətlə, bunu əhaliyə real sosal dəstək adlandırmaq mümkün deyil.

Yazı müəllifi uşaqlara görə verilən məbləğlərin də yetərli olmadığını bildirir,

Uşağa baxmağa görə verilən müavinətin 30 manat, 3 yaşa qədər uşağa verilən müavinətin 15 manat, birədəfəlik verilən müavinətin məbləğinin 90 manat olması xatırladılır: "Əgər bu başqa ölkələrdə olan müavinət həcmlərilə müqayisə olunsa ortaya olduqca acınacaqlı mənzərə çıxar. Uşağa baxmaq bir qayda olaraq iri maliyyə məsrəfləri tələb edir. Uşaq yeməyinə, tibbi müayinəsinə və digər xidmətlərə bahalıq səbəbindən yaxın düşməli deyil. Bu 30 manat isə heç "pampes"in pulunu ödəyə bilmir".

Müəllif deyir ki, hökumət mənasız tikinti layihələrinə, hətta məmurların təmtəraqlı yaşamasına pul tapır, amma məsələ uşaq vəsaitlərinə çatanda məlum olur ki, büdcədə pul yoxdur.

Müəllif vurğulayır ki, zəruri olan məhsulların qiymətləri günbəgün yox, saatbasaat artır, bir kiloqram kərə yağının qiyməti 20 manata çatır, üstəlik istər təhsil, istər tibbi müəssisə olsun hamısına ödəniş etmək lazımdır.

Müəllifə görə, belə məbləğlərin müəyyən olunması insan ləyaqətinin alçaldılması deməkdir, hökumət isə az qala Azərbaycan iqtisadiyyatının guya dünya donoruna dönməsindən danışır: "Uşaqlara 30 manat müavinət, cüsi ehtiyac meyarları və yaşayış minimumu ayıran iqtisadiyyatı sosialyönlü saymaq olmaz.

Belə "sosial siyasət" sosial müdafiəyə ehtiyacı olan vətəndaşların sayını artırır".