Media-icmal 04.02.19

Ölkə əhalisinin gəlirləri və sosial müdafiəsi, Binə kəndində yolların vəziyyəti, ölkə gənclyinin vəziyyətinə baxış və s. məsələlər bugünkü (04 frvral, 2019-cu il) medianın aparıcı mövzularındandır.

Diqqət mərkəzində olan sosial müdafiə

"Azərbaycan" qəzeti "Məqsəd əhalinin sosial rifahını daha da yaxşılaşdırmaqdır" sərlövhəli məqalədə ölkə əhalisinin sosial vəziyyətini dəyərləndirir.

Müəllif ötən illərin statistikasına istinadən ölkədə iqtisadi inkişafın əhalinin sosial durumuna müsbət təsir etdiyini desə də bununla belə pensiyaların, müavinətlər və digər sosial ödənişlərin müntəzəm şəkildə inflyasiyaya uyğun artırıldığını da deyir.

Bu artımın baş baş verməsinə səbəb kimi isə müəllif 2018-ci ildə də iqtisadi sahədə qazanılan uğurları göstərir: "Ümumi daxili məhsulda iqtisadi artım 1,4, qeyri-neft sektorunda 1,8, sənaye istehsalında 1,5 faiz olub. Qeyri-neft sektorunda isə sənaye istehsalı 1,9 faiz artıb. Bunun fonunda əhalinin gəlirləri 9,2 faiz artıb, inflyasiya isə cəmi 2,3 faiz olub. Beləliklə, əhalinin gəlirləri inflyasiyadan yüksəkdir".

Yazı müəllifi sosial durumun yaxşılaşmasına daha bir səbəb kimi rəsmi statistik göstəricilərə istinadən 2018-ci ildə ölkədə həm əhalinin məşğulluğunun, həm də əməkhaqqı və gəlrilərin artmasını göstərir: "Dövlət Statistika Komitəsinin verdiyi məlumata görə, 2018-ci ilin yanvar-noyabr aylarında ölkə iqtisadiyyatında muzdla çalışan işçilərin orta aylıq nominal əməkhaqqı 2017-ci ilin eyni dövrülə müqayisədə 2,9 faiz artaraq 540,1 manat təşkil edib. Əməkhaqqı neft sektorunda 3000,7, qeyri-neft sektorunda 484 manata çatıb. Dövlət müəssisələrində çalışan işçilərin əməkhaqları 430,5, özəl müəssisələrdə isə 687,7 manat olub".

Müəllif rəsmi göstəriciləri davam etdirərək deyir ki, 2017-ci ilə nisbətən 2018-ci ildə ölkə əhalisinin gəlirləri nominal ifadədə 9,2 faiz artaraq 53688,6 milyon manata çatıb, hər nəfərə düşən gəlirlər 5467,7 manat və ya ayda orta hesabla 455,6 manat təşkil edib.

Məqalə müəllifi vurğulayər ki, bütün icbari və könüllü ödənişlər edildikdən sonra əhalinin sərəncamında 49595,5 milyon manatlıq vəsait qalıb.

Müəllif bütünlükdə əhalinin, eləcə də onun ayrı-ayrı kateqoriyalarının sosial müdafiəsinin daim diqqət mərkəzində olduğunu deyərək şəhid ailələrinə veriləcək birdəfəlik 11 min manatlıq vəsaitin 2019-cu il 28 yanvar fərmanı ilə daha 2725 ailəyə şamil olunduğunu göstərir.

Müəllif deyir ki, əhalinin sosial müdafiəsinin gücləndirilməsi dövlət sənədləri ilə də dəstəklənib, dövlət başçısının 2018-ci il fevralın 19-da imzaladığı sərəncamla bütün növ əmək pensiyalarının sığorta hissəsi orta aylıq nominal əməkhaqqının illik artım tempinə uyğun indeksləşdirilərək artırılıb.

Müəllif əhalinin sosial müdafiəsinin gücləndirilməsi yönündə daha bir sənəd kimi dövlət başçısının "Sosial müavinətlərin məbləğinin artırılması haqqında" 23 fevral 2018-ci il tarixli sərəncamını göstərir ki, bu sənəd həmin ilin mart ayının 1-də qüvvəyə minib.

Müəllif deyir ki, bu sərəncamla sosial müdafiəyə ehtiyacı olan müxtəlif növ əhali kateqoriyalarına nəzərdə tutulan sosial müavinətlər 10 faiz artırılıb.

Bir Bakı kəndindən acı mənzərə

"Oxu.az"da isə Bakı kəndində acınacaqlı mənzərə" sərlövhəli məqalə oxumaq olar .

Müəllif Bakının Binə kəndindəki "Südçülük" ərazisindəki yolun keçilməz hala düşməsinin səbəbləri barədə müzakirə açır.

Yazı müəllifinin deməsinə görə, vəziyyətin araşdırılmasına səbəb bir xanım jurnalıstin bəhs olunan ərazidəki yolun durumu ilə bağlı sosial şəbəkədəki foto paylaşımları olub.

Müəllif deyir ki, həmin jurnalistin qeydlərinə görə, Binə kəndinin "Südçülük" adlanan ərazisində yol kənarında su ötürücülərinin olmaması səbəbindən yağış suları yolun üst qatını yuyaraq geniş çalalar əmələ gətirib və bu da kənd sakinlərinə çətinliklər yaradıb.

"Ərazidə yaşayan qadın və uşaqlar çala-çuxur, palçıq içində olan yolları düzəltməyə çalışıblar. Yerli sakinlər yaranmış vəziyyətdən narazılıqlarını ifadə ediblər" deyə müəllif problemin bugünkü mənzərəsini nəzərə çatdırır.

Müəllif deyir ki, Binə kəndində yolların pis vəziyyətə düşməsinə Xəzər Rayonu İcra hakimiyyətindən də münasibət bildiriblər.

Müəllifin deməsinə görə, Xəzər Rayon İcra Hakimiyyəti başçısının köməkçisi Hikmət İslamov "Oxu.az-a açıqlamasında bildirib ki, "Südçülük" adlanan ərazidə yolların pis vəziyyətdə olması ilə bağlı onların məlumatı var.

Yazı müəllifi vurğulayır ki, icra başçısının köməkçisi yaxın gələcəkdə həmin ərazilərin əsaslı təmirinin planlaşdırıldığını söyləyib.

"Südçülük"də yerləşən yolların əsaslı təmiri üçün vəsait tələb olunur. Küçələrin təmiri ilə bağlı məsələ Dövlət Proqramına salınıb. Baş vermiş hadisə ilə bağlı qəsəbə nümayəndəsinin məlumatı var", - o bildirib.

Amma müəllif burada diqqəti məsələnin açıq qalan tərəfinə cəlb edərək deyir ki, H.İslamov ərazinin nə zaman təmir olunacağı ilə bağlı dəqiq məlumat verməkdə çətinlik çəkib: "Biz layihələr hazırlamışıq. Həmin layihələr təsdiq olunandan sonra ərazidə müvafiq işlərə başlaya bilərik".

Bu ölkənin gənclik arzuları....

"Azadlıq.info"da isə "Gənclərin günü" sərlövhəli məqalə diqqəti cəlb edir.

Müəllif ölkə gəncliyinin vəziyyətini gündəmin müzakirəsinə daşıyır.

Məqalə müəllifi deyir ki, ölkədə uzun illərdir ki, gənclərə qayğıdan danışırlar, xüsusən də son günlər bütün telekanallar, rejim mətbuatı gənclərin Azərbaycanda problemsiz həyat yaşamalarını işıqlandırırlar.

Yazıda deyilir ki, 2 fevral "Gənclər günü" kimi qeyd olunduğu üçün bu "qayğı"nın dozası artıb. (1997-ci ildə fevralın 2-i Azərbaycanda Gənclər Günü kimi qeyd olunur-red.).

Müəllif iddia edir ki, ölkədə gəncliyin yaşamı ilə bağlı reallıq tamamilə fərqlidir və heç də telekanallarda göstərildiyi kimi deyil, telekanallarda göstərilənlər yaltaqlıq nümunələrinin meydan sulamasıdır.

"Xaricə mühacirət edənlərin, şərlənərək həbs olunanların, ali təhsilli işsizlərin siyahısına baxanda gənclərin üstünlük təşkil etdiyini görürük", - müəllif gəncliyə münasibətdə reallığn mənzərəsini öz baxımından dəyərləndirir.

Müəllif başqa səhnəni də diqqtə çatdıraraq deyir ki, vəzifə kürsüsündə oturanların yaşına nəzər salanda da "qocalar evi" nin təntənəsini görürük,yəni, bu ölkədə gənclərin günü yoxdur və bu ölkədə gənclər sürətlə qocalırlar.

"Gənclik arzuları kredit borcunu ödəyə bilməkdən, təhsil haqqını tapa bilməkdən, ölkədən qaça bilməkdən, az rüşvətlə ev tikə bilməkdən ibarətdir", - müəllif ölkə gəncliyinin gündəminin bundan ibarət olduğunu iddia edir.

Üstəlik əlavə olaraq belə bir sual da edir ki, "qanunların pas atdığı, milyardların talan edildiyi, yaltaqlığın karyera pilləkəni olduğu ölkədə, gənclərin günü necə olmalıdır?".

Müəllifə görə, bu dedikləri təkcə gəncliyə aid deyil, əslinə qalsa bu ölkədə qocaların da, uşaqların da, gənclərin də günü qaradır və bir qarın çörək tapmaq gün görmək deyil, insanıqsa insan kimi də yaşamalıyıq.

Müəllifin daha bir iddiasına görə, ölkədə minlərlə gənc vətəndaş kimi yox, troll kimi yetişdirilir, minlərlə gəncə qürurlu olmaq yox, yaltaq olmaq tövsiyə edilir.

Yazı müəllifi iddia edir ki, ölkəyə vətəndaş azadlıqlarını, ədaləti bu ölkənin mübariz, əqidəli, prinsipial gəncliyi gətirəcək.

Bu iddiadan irəli gələrək müəllif düşünür ki, gözəl günlərin, yaltaqlığın ləyaqətə məğlub olacağı, qocalmış fikirlərin gənc ideyalara təslim olacağı günlər hələ qarşıdadır...