Media-icmal 06.03.20

Dövlət başçısının bölgələrə səfərləri, əmanətlərin tam sığortalana bilməməsi ətrafında müzakirələr, idarəçiliyə baxış, bəzi istiqamətlərdə bahalığa səbəblər və s. məsələlər medianın aparıcı mövzuları sırasındadır..

“Azərbaycan” qəzeti “Prezidentin səfərləri regionların inkişafına əlavə stimul verir” sərlövhəli məqalədə dövlət başçısının regionlara səfərlərini dəyərləndirir.

Müəllif deyir ki, prezident İlham Əliyev martın 3-də Goranboy, Şəmkir və Qazax, martın 4-də isə Ağstafa və Tovuz rayonlarında səfərdə olub, bir sıra sosial-iqtisadi obyektlərin açılışında iştirak edib, rayon ictimaiyyətinin nümayəndələri ilə görüşüb, onların istək və arzularını öyrənib.

Müəlifin deməsinə görə, dövlətin həyata keçirdiyi sosial siyasət sayəsində son 16 ildə səhiyyənin inkişafı yüksək səviyyəyə çatıb, paytaxtla yanaşı bölgələrdə də müasir tələblərə cavab verən yeni xəstəxanalar tikilərək əhalinin ixtiyarına verilib.

“Son 16 ildə Azərbaycanın ancaq bölgələrində 22 yeni xəstəxana, 15 diaqnostika müalicə mərkəzi inşa edilib, 28 mərkəzi rayon xəstəxanası əsaslı təmir olunub. Beş xəstəxananın tikintisi isə davam edir. Beləliklə, ancaq bölgələrdə 70 müasir tibb ocağı istifadəyə verilib. Əlbəttə ki, bu tibb ocaqları insanların sağlamlığına xidmət göstərir. Bakı şəhərində də bir çox xəstəxanaların tikintisi, təmiri artıq yekunlaşıb. Bütövlükdə son 16 ildə ölkəmizdə 700-dən çox tibb müəssisəsi tikilib və əsaslı təmir olunub”. Bunu isə dövlət başçısı Goranboy Rayon Mərkəzi Xəstəxanasının açılışında bildirib.

Müəllif eyni zamanda ölkədə xalçaçılığın inkişafı istiqamətində görülən işlər barədə deyir ki, əhali bunu rəğbətlə qarşılayır, eyni zamanda xalçaçılığın inkişafı fermerlər üçün də sərfəlidir.

Müəllif yada salır ki, dövlət başçısı digər rayonlarda da açılışlarda iştirak edib. 

“Bizimyol.info”  “Təşvişə düşən əmanətçilərlə bağlı açıqlama” adlı məqalədə əmanətlərin tam sığortalanması məsələsi müzakirə edilir.

“Martın 4-dən etibarən hansısa bank bağlansa, yəni lisenziyası ləğv olunsa və ya müflis elan olunsa, bu halda hər bir fiziki şəxsə bir bankda əmanəti üzrə müəyyən olunmuş milli valyutada 10 faiz, xarici valyutada 2,5 faiz həddindən yuxarı deyilsə, ona 30 min manat kompensasiya ödəniləcək”. Bunu  “Bizimyol.info”ya bank üzrə ekspert Əkrəm Həsənov "Əmanətlərin tam sığortalanması" haqqında qanunun müddətinin bitməsinə münasibət bildirərkən deyib.

Ekspert vurğulayıb ki, “Əmanətlərin tam sığortalanması haqqında” qanun 2016-cı il martın 4-dən qüvvəyə minmiş və müddət 2019-cu ildə yenidən 1 il uzadılmışdı: “Bu dəfə “Əmanətlərin tam sığortalanması haqqında” qanunun müddəti uzadılmadı. Ona görə də artıq həmin qanun qüvvədə deyil. Hazırda 2006-cı ildə qəbul edilmiş “Əmanətlərin sığortalanması haqqında” qanun yenidən qüvvəyə minib.

Ölkədə bağlanmış bankların təcrübəsinə istinad edən ekspert  deyir ki, kompensasiya edilməyən məbləğdən başqa əmanətlərin cüzi hissəsinin adətən qaytarılma ehtimalı olur, çünki bağlanmış bankları elə müflislik həddinə çatdırılıblar ki, orada pul yoxdur.

Ə.Həsənova görə, digər tərəfdən bankların ləğvedicisi olan Əmanətlərin Sığortalanması Fondu bu prosesi o qədər qanunsuz və qeyri-şəffaf aparır ki, oradan kiməsə hansısa məbləğin çatma ehtimalı çox azdır.

Ekspert deyir ki, bəzi əmanətçilərin “Əmanətlərin tam sığortalanması haqqında” qanun qüvvədə olduğu müddətdə əmanət qoyduğu üçün əmanətinin tam sığortalanması kimi düşüncələri səhvdir, müəyyən olnmuş faiz həddini keçən əmanətlər sığortalanmayıb.

“Azadlıqinfo”da isə “Təriflənmək üçün təyyarə jesti” sərlövhəli məqalədə hakimiyyətin fəaliyyətinə münasibət ifadə edilib.

Müəllif iddia edir ki, YAP hakimiyyətinin xarici siyasəti “bizi tərifləyin” tələbi üzərində qurulub, amma “bizi” deyəndə dövləti deyil, hakimiyyətin yuxarı pilləsi nəzərdə tutulur və məhz bu məqsədə yüz milyonlarla dollar xərclənib.

Müəllifə görə, iqtidarın müxtəlif ölkələrdən tapdıqları sorğu şirkətləri, lobbiçiliklə məşğul olan ekspert qrupları Azərbaycanda yalançı inkişafdan dəm vurmaq, olmayan islahatlardan danışmaq üçündür..

Müəllif əlavə edir ki, bu iqtidar dövlət manfeyinə heç zaman pul xərcləmək istəməyib, yadlara isə sərvət bağışlayıblar.

Müəllif  iqtidar nümayəndələrinin İtaliya səfərinə və burada müqavilələr imzalanmasıan diqqət çəkərək deyir ki, yenə də mümkün olan hər yerdən “afərin” almaq istəyi idi, İtaliyadan təyyarə almaqda da məqsəd bu ölkədən tərif yağışı təmin etmək və bu tərifləri daxili auditoriyaya “səpmək”dir.

Müəllif iddia edir ki, İtaliya jestinin əsas səbəbi də şəxsi mənafe ilə bağlıdır və iqtidar istənilən bədxərcliyə hazırdır ki, əl uzada biləcəkləri ünvan olsun.

Müəllifin daha bir iddiasına görə, ən əsas məqam budur ki, bu iqtidar xalqın sevgisini qazanmaq üçün heç bir addım atmır.

“Redaktor.az” isə “Koronavirus: Azərbaycanda inanılmaz fırıldaq - maska niyə bahalaşıb?” sərlövhəli məqalədə koronavirusdan qoruyucu vasitələrin yoxa çıxması səbəbləri müzakirə edilir.

Müəllif deyir ki, bu virusun ölkədə mövcudluğunu əks etdirən ilk xəbərlərdən sonra apteklərdə tibbi maska və spirtin qiymət artdı, ardınca virusdan qorunmaqda faydalı hesab olunan, insanların daha çox almaq fikrinə düşə biləcəyi sarımsaq bahalaşdı.

İqtisadçı ekspert Natiq Cəfərli isə deyir ki, gigiyenik məhsullar, məsələn, tibbi maskaların qiyməti dövlətin tənzimlədiyi növlərə aid deyil.

Onun fikrincə, əgər apteklər satdıqları dövriyyədən düzgün vergi verirlərsə belə halda, pozuntu yoxdur, belə ki, qiymət artırmaqla gəlirlər artırılırsa həmin gəlirdən vergi verilməlidir.

Ekspertə görə, amma kartel sövdələşməsi varsa bu, cinayətdir və antiinhisar qurumları buna qarşı mübarizə aparmalıdır: “Qiymətin baha olmasında heç bir cinayət tərkibi yoxdur. Yeganə məsələ həmin artıq gəlirdən verginin verilib-verilməməsidir. Buna da ciddi şəkildə nəzarət olunmalıdır ki, vergidən yayınma halları baş verməsin.

N.Cəfərli vurğulayır ki, əgər eyni bir məhsulu ölkəyə 3 şirkət gətirirsə və öz aralarında qiyməti qaldırırlarsa, bu, qanun pozuntusudur. Buna qarşı mübarizə aparmaq olar.

İqtisadçı hesab edir ki,süni qiymət artımının qarşısını almağın ən effektiv üsulu rəqabətli mühitin yaradılmasıdır və böyük rəqabətli mühitlərdə, sistemlərdə süni qiymət artımı mümkün deyil.