Media-icmal 06.06.2016

Bakıdan fəallıq çağırışı 

Deputat Bəxtiyar Sadıxov baş redaktoru olduğu “Azərbaycan” qəzetində “Hamımızın bir vətəni var: Onun adı Azərbaycandır!” sərlövhəli məqalə ilə çıxış edib.

Məqalənin mahiyyəti xarici ölkələrdəki Azərbaycan diasporlarını yaşadıqları ölkələrdə Azərbaycan həqiqətlərini əks etdirən İnternet resurslar yaratmağa təşviq etməkdir. Müəllif bu yöndə fəallığın sosial sifariş olduğunu belə izah edir: “İnternetin inkişafı, insanların sosial şəbəkələrdə geniş fikir mübadiləsi aparmaları bu sahəni həm də siyasi fikir mübarizəsi meydanına çevirmişdir. Dünya erməniliyi ölkəmizə qarşı böhtan kampaniyasında bu amildən geniş istifadə edir. Cənab İlham Əliyev diqqəti bu sahəyə, eyni zamanda, ideoloji mübarizədə olan boşluqlara və qarşıda duran vəzifələrə yönəltdi. Azərbaycan dövlətinin geniş imkanları olduğu məqamda belə vəziyyətin yolverilməzliyini diqqətə çatdırdı, lazımi kömək göstəriləcəyini bildirdi”.

Daha sonra məqalədə sosial şəbəkələrdə, xarici ölkələrdə İnternet resursrlardan istifadə yönündə ermənilərin daha fəal olduqları vurğulanır. Müəllif hazırkı şəraitdə informasiyanın təkcə xəbər nəqli olmadığı, həm də ictimai rəy formalaşdıran bir vasitə olduğuna toxunur və bildirir: “XXI əsr həm də informasiya müharibəsi əsridir. Cəbhə bölgəsində qazanılan uğurlar, müharibə haqqında həqiqətlər dünya ictimaiyyətinə vaxtında və olduğu kimi çatdırılmalıdır.

Cənab İlham Əliyev bu vəzifəni birinci dərəcəli vəzifə kimi xarakterizə etdi”.

Son olaraq müəllif məqaləni aşağıdakı nikbin notlarla bitirir: “İnanırıq ki, getdikcə güclənən Azərbaycan diasporu güclü Azərbaycanın beynəlxalq nüfuzunun daha da yüksəlməsində, ona qarşı ədalətsiz hərəkətlərin qarşısının alınmasında bundan sonra da öz təsirli sözünü söyləyib, qəti mövqeyini ortaya qoyacaqdır”.

Azərbaycan hökumətinin missiyası

“Azadlıq” qəzeti Prezdiemt Administrasiyasının rəhbəri Ramiz Mehdiyevin antiqərb ruhlu “Güclü Azərbaycan dövləti qloballaşma şəraitində milli ideyanın təcəssümü kimi” sərlövhəli məqaləsini şərh edir. Müəllifə görə, R.Mehdiyevin bu məqaləsi heç də hakimiyyətdə “antiqərbçi”lərin mövqeyi deyil, yeridilən ümumi siyasətin tərkib hissəsidir.

  Məqalədə R.Mehdiyevin Qərbin maliyyə institutlarının  milli iqtisadiyyatları çökdürməsi, əhalinin sosial durumunu pisləşdirməsi tezisinə cavab olaraq deyilir: “Bütün bunları həyata keçirmək üçün Qərbin institutlarına ehtiyac yoxdur. Çünki mövcud hakimiyyət uzun illər ərzində bu “missiya”nı yerinə yetirib. Yəni, ölkəni indikindən də pis duruma salmaq mümkündür?”.

Müəllif Azərbaycan iqtisadiyyatının neftdən asılı olduğunu, neft erasının da bitdiyini, bütün iqtisadi sahələrin məmurların inhisarında olmasını, bütün iqtisadi göstəricilərin geriyə getdiyini qeyd edir. Müəllif yazır: “Keçən il ilə müqayisədə bu ilin 4 ayı ərzində qeyri-neft sektoruna sərmayə qoyuluşu 73%, kənd təsərrüfatına isə sərmayə qoyuluşu 4 dəfə azalıb. 1994-cü ildə adambaşına 9 dollar olan borc indi adambaşına 750 dollara qalxıb”.

Müəllifin düşüncəsinə görə, ölkə iqtisadiyyatına elə zərbə vurulub ki, Qərb institutlarının böyük planlar qurmasına ehtiyac qalmayıb və hətta Qərb istəsəydi belə iqtisadiyyatı bu qədər tez çökdürə, milli valyutanı 100% devalvasiyaya uğrada bilməzdi, amma Azərbaycan hökuməti bunu bacardı.

Müəllifə görə, sosial durum daha faciəvidir. 2,5 milyon nəfər kredit borcu ödəyir, işsizlik, yoxsulluq sürətlə artır, intiharlar çoxalır. Bütün bu faktoloji baxışdan sonra müəllif ümumiləşdirmə apararaq yazır: “Bir sözlə, R.Mehdiyevin böyük məqaləsində təsvir etdiyi “əjdaha”dan qorxmaq lazım deyil, çünki ölkəmizdə o əjdahanın yeyəcəyi bir şey qalmayıb. Bizim qorxduğumuz başımıza gəlib, odur ki, R.Mehdiyev yeni arqument tapmalıdır”.

Bu, mümkünsüzdür

Ekspert Natiq Cəfərli isə Dünya azərbaycanlılarının bu günlərdə başa çatan IV qurultayında dövlət başçısı İlham Əliyevin xaricdəki azərbaycanlı iş adamlarına Azərbaycana investisiya qoymaq çağırışını “Yeni Müsavat” qəzetinə şərh edir.

Ekspert çağırışı normal dəyərləndirsə də ölkədə münbit investisiya qoymaq mühitinin olmadığı qənaətindədir: “Sadəcə, Azərbaycan hökuməti anlamalıdır ki, hər bir investorun bir ölkəyə gəlməzdən öncə maraqlandığı bir neçə məsələ var. Bu, mülkiyyət toxunulmazlığı, məhkəmə hakimiyyətinin durumudur və s. Azərbaycan Avropa İnsan Haqları Məhkəməsində ən çox mülkiyyət hüququnun pozulması ilə bağlı iş alan ölkələr sırasındadır”.

Daha sonra N.Cəfərli vaxtilə Azərbaycanda iş adamları kimi fəaliyyət göstərmiş Paolo Pərviz, Hüseyn Arabulun taleyini xatırladır. Vergidən yayınma adı ilə Azərbaycanın 100-ə qədər iş adamını İnterpolun axtarışına verdiyini vurğulayır. “Belə bir şəraitdə ölkənin imici belə formalaşıbsa, reytinq agentlikləri ölkənin reytinqini son iki ildə xeyli aşağı salıbsa, bir çağırışla bura investor cəlb etmək çox çətin məsələdir və hətta demək olar ki, mümkünsüzdür”.