Media-icmal 07.05.21

“Bizimyolinfo.az”  saytında yer alan “Camaat qərar gözləyirdi, bilmək istəyirik bayramdan sonra necə olacaq...”  sərlövhəli məqalədə həkim-farmakoloq Müşfiq Hüseynov Nazirlər Kabineti yanında Operativ Qərargahın mayın 6-da keçirilmiş brifinqinin mənasızlığını iddia edir.  

Hüseynova görə, bu brifinqdə  çıxış edən səhiyyə naziri səlahiyyətlərini müvəqqəti icra edən Teymur Musayev əhalinin gözlədiyi suallara cavab verməyib. 

“Camaat qərar gözləyirdi. Bilmək istəyirik ki, ayın 15-dən, bayramdan sonra necə olacaq? Mayın 15-dən sonra bütün növ ictimai nəqliyyatın hərəkəti, fitnes, sağlamlıq və idman zallarının, restoranların fəaliyyəti limitsiz və tam bərpa olunmalı idi. Bütün iş yerlərinin fəaliyyəti bərpa olunmalı, iyunun 1-i sərt karantin rejimi bitməlidir”, - farmakoloq bildirir.

O hesab edir ki, bütün əyləncə mərkəzləri, otellər və istirahət evləri açılmalı, çimərlik mövsümünün açılmasına maneələr olmamalı, 3 saat davamiyyətlə 60-80 nəfərlik toyların keçirilməsinə icazə verilməldir. Açıq havada maska taxılması məcburiyyəti aradan qaldırılmalıdır.     

“Modern.az” saytı isə “Şəhid ailələri və Qarabağ əlillərinə verilən mənzillər niyə “kupça”sızdır?” sərlövhəli məqalədə verilən suala cavab axtarılır.

Müəllif deyir ki, bu il Vətən Müharibəsi əlilləri və şəhid ailələrinin üzvlərinə bir neçə yaşayış kompleksindən 3000 mənzil verilməsi gözlənilir və eyni zamanda fərdi evlərin tikintisinə başlanılıb.

“ZƏFƏR” Şəhid Ailələrinə Dəstək İctimai Birliyinin sədri, şəhid komandir Raquf Orucovun xanımı Sevinc Orucova da deyir ki, mənzillərin “çıxarış”larının ailələrə verilməməsi narazılığa səbəb olub.

Milli Məclisin Əmək və sosial siyasət komitəsinin sədri Musa Quliyev isə deyir ki, çıxarışların verilməməsi mənzillərin özəlləşdirilərək satıla bilməsi ehtimalları ilə bağlıdır və deputat xatırladıb ki, 2009-ci ildə belə xoşagəlməz təcrübə olub.

Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyi isə deyir ki, qanunvericilikdə sosial və xüsusi təyinatlı yaşayış sahələrinin özəlləşdirilməsi nəzərdə tutulmayıb.

“Moderator.az” saytı isə “Çox təəssüf ki, pasientlərin hüquqlarının müdafiəsi haqqında qanun Milli Məclisdə “öldü”  sərlövhəli məqalədə səhiyyə sistemində pasientlərin hüquqlarının qorunmaması müzakirə edilir. 

Azad İstehlakçılar Birliyinin sədri Eyyub Hüseynov iddia edir ki, Mirqasımov adına Respublika Klinik Xəstəxanasında belə özbaşınalıqlar var və bu barədə şikayətlər alıblar.

Ekspert ayrı-ayrı vətəndaşlardan daxil olan şikayətlərə əsasən iddia edir ki, adı çəkilən xəstəxanada rüşvətin qarşısını almaq mümkün olmur, xəstələrə sayğısızlıq hökm sürür, hərc-mərclik sərhəd tanımır. 

Ekspertin daha bir iddiasına görə, ümumiyyətlə, səhiyyə sistemində vəziyyət çox acınacaqlıdır, özəl klinikalarda pul ödənişinə görə verilən qəbzlərin 90 faizi saxtadır.

Azad İstehlakçılar Birliyi sədrinin sözlərinə görə, ölkədə səhiyyəylə bağlı vəziyyət olduqca bərbad haldadır, pasient hüquqları qorunmaz vəziyyətdədir: “10  il bundan qabaq ölkədə pasientlərin hüquqlarının müdafiəsi haqqında qanun müzakirə olunub. Lakin çox təəssüflər olsun ki, o qanun Milli Məclisdə “öldü”.  

Ekspertin deməsinə görə, ölkədə fəaliyyət göstərən həkimlər əgər insan ölərsə, nə pulunu qaytarır, nə maddi, nə də peşəkarlıq məsuliyyədi daşıyırlar.

“Yenisabah.az” saytında isə “Ermənistan razı deyilsə, Zəngəzur dəhlizi açıla bilməz” - Lavrov nə demək istəyir?” sərlövhəli məqalədə politoloq Elxan Şahinoğlu Rusiyanın xarici işlər naziri Segey Lavrovun mayın 6-da Ermənistana səfərini şərh edir.

Amma politoloq hesab edir ki, bu səfərdə Lavrov Azərbaycanın mənafeləri baxımından müsbət heç bir fikir söyləməyib. Onun deməsinə görə, Lavrov İrəvandakı mətbuat konfransında “minalardan təmizləmə, dini və mədəni irsin qorunması istiqamətindəki səylərimiz azalmır” kimi ifadə işlədib, erməni tərəfin minalanmış sahələrlə bağlı xəritələri vermək istəməməsinə toxunmayıb.

Politoloq deyir ki, Lavrov erməni jurnalistlərdən birinin Zəngəzur dəhlizinin işə salınmasıyla bağlı sualına da belə cavab verib ki, kommunikasiya xətləri tərəflərin razılığı və qarşılıqlı faydalılıq əsasında açılmalıdır. “Yəni, Lavrovun məntiqindən çıxış etsək, əgər Ermənistan razı deyilsə, Zəngəzur dəhlizi açıla bilməz" deyə politoloq bu ifadəyə qiymət verir.