Media-icmal 08.06.20

Azərbaycanın təhlükəsizliyə töhfələri, Qarabağ problemi sahəsində vəziyyət, Neftçalada içməli su və suvarma su probleminin yaranması səbəbləri, korrupsiya və rüşvətə qarşı mübarizə və s. məsələlər medianın aparıcı mövzuları sırasındadır...

Təhlükəsizliyə töhfə verən ölkə

Rəsmi "Azərbaycan" qəzeti "Azərbaycan beynəlxalq aləmdə təhlükəsizliyə töhfə verən ölkələrdəndir" sərlövhəli  məqalədə bəhs olunan mövzu ilə bağlı deputat Vüqar Bayramovun dşüncələrinə yer verib. 

Müəllifə görə, Azərbaycan Avropanın enerji təhlükəsizliyinin formalaşmasına yaxından töhfə verir, odur ki, bu siyasət eyni zamanda regionda sülhün bərqərar olmasına dəstək kimi qiymətləndirilməlidir.

"Dövlətimizin başçısının rəhbərliyi ilə həyata keçirilən siyasətin məqsədi Azərbaycanın regional mövqeyinin daha da yaxşılaşdırılması, gücləndirilməsi, həmçinin ölkəmizin regional və qlobal proseslərdəki rolunun artmasına nail olmaqdan ibarətdir", V.Bayramov belə söyləyib.

Deputatın sözlərinə görə, Avropa Yenidənqurma və İnkişaf Bankı, eləcə də Asiya İnkişaf Bankının rəhbərləri ilə keçirilən görüşdə Azərbaycanda aparılan islahatlar, pandemiyayadək görülən işlər, eləcə də pandemiya dövründə həyata keçirilən tədbirlər yüksək qiymətləndirilib.

Müəllif hesab edir ki, bu, həm də Azərbaycanın regional və beynəlxalq aləmdə mövqeyinin daha da gücləndirilməsinə gətirib çıxarıb.

Deputat vurğulayır ki, Azərbaycan regionda aparıcı dövlətlərdən biri kimi beynəlxalq aləmdə təhlükəsizliyə töhfə verən ölkələrdən birinə çevrilib.

Qələbə alternativsizliyi

Azadlıq.info saytı "Biz Londonda məskunlaşırıq, ermənilər Qarabağda" sərlövhəli məqalədə müəllif Qarabağ problemilə bağlı vəziyyəti dəyərləndirir.

Müəllif deyir ki, hələlik xalqın ən böyük uğuru dövlət müsətqilliyini hələ saxlaya bilməsidir: “Təəssüf ki, hər dəfə müstəqilliyi itirəndə də, qazananda da torpaqlarımızın da bir hissəsi bizdən alınıb və geridönməz itkilərə məruz qalmışıq. İndi isə biz tariximizin məğlub millət və məğlub dövlət dönəmini yaşayırıq və bu, tariximizin ilk məğlubiyyəti deyil".

Müəllifə görə, məğlub olmağın səbəbi tarixin dərslərindən nəticə çıxara bilməməkdir: "Məğlubiyyəti dərk etməyib, yalnız özü üçün, ailəsi üçün yaşayanları vətən maraqlandırmaz, onların bir məqsədi var: bu vətənin malını, dövlətini, sərvətini talan edib keyf çəksinlər, üzləri daim gülsün…"

Yazı müəllifi vurğulayır ki, Azərbaycan nazirləri Londonda, Nyu-Yorkda məskunlaşır, ermənilər isə Qarabağda, elə fərq də budur.

Onun fikrincə, işğal dövrü bu qədər davam edirsə, deməli, bu məsələ ilə məşğul olmağa zaman ayrılmayıb və müəllifə görə, bu qədər susmaq xalqı təslimçiliyə aparmaqdır.

Müəllif hesab edir ki, çıxış yolu müharibə apararaq qalib gəlməkdir, bunun alternativi yoxdur.

Xəzər suyu Kürə qarışanda...            

"Marja.az"da isə "Azərbaycanda ilk dəfə dəniz suyu çaya qarışıb, kəndlər susuz qalıb" sərlövhəli məqalədə müəllif Neftçala rayonunda su problemi yaranmasını şərh edir.

"Əhalinin içməli su problemi yaranıb, əkin sahələrinin suvarılması dayandırılıb. Mal-qaranın suvarılmasında da ciddi problemlər yaranıb", deyə müəllif əlavə edir.

Müəllifin sözlərinə görə, Kürün deltasında ilk dəfə olaraq Xəzər dənizinin suyu çaya qarışıb, nəticədə Neftçala şəhəri də daxil olmaqla, Sübh, Qırmızı Şəfəq, 1-ci Mayak, 2-ci Mayak, Yenikənd, Bankə qəsəbəsi, Kürkənd, Şirvanlı, Uzunbabalı, Tatarməhlə kəndlərində içməli su problemi yaranıb. 

Müəllif deyir ki, rayonda məsələnin həllilə bağlı qərargah yaradılıb, əraziyə "Azərsu" ASC-nin 10-a yaxın xüsusi təyinatlı su maşını cəlb edilib.

Həmin maşınlar vasitəsilə şəhər, eləcə də sözügedən kənd əhalisinə içməli su verilir.

Məqalədə vurğulanır ki, Kür çayının suyu dəniz suyu qarışdığına görə şorlaşdığından əkin sahələrinin suvarılması dayandırılıb, elə mal-qaranın suvarılmasında da ciddi problemlər yaranıb.

Yazıda deyilir ki, hələlik Kürün aşağı axınında yaranmış vəziyyət nəzarətə götürülsə də, gərginlik davam edir və Mingəçevir su anbarından Kür çayına buraxılan suyun həcmi artırılmasa, mövcud vəziyyət qısa müddətdə aradan qaldırılmayacaq. 

Bu mübarizəni necə aparmalı?

"Müsavat.com" saytında "Prezidentin "məmur özbaşınalığı ilə bğlı hər bir siqnal araşdırılacaq" bəyanatının hədəfləri - şərhlər" sərlövhəli məqalədə Azərbaycanda korrupsiya və rüşvətə qarşı mübarizə şərh olunur.

Müəllif deyir ki, dövlət başçısı iyunun 3-də Ağcabədi rayonunda ASAN Həyat kompleksinin açılışında korrupsiya, rüşvətxorluğa qarşı mübarizə ilə bağlı minlərlə məktub aldığını, vətəndaşların bunu təqdir etdiyini söyləyib, buna ictimai nəzarət olmasını bir daha vurğulayıb.

Müəllifin sözlərinə görə, dövlət başçısı korrupsiyaya və rüşvətxorluğa qarşı mübarizədə də qalib gəlinəcəyini xüsusi qeyd edib.

İqtisadçı-ekspert isə deyir ki, təkcə korrupsiyaya bulaşmış hnasısa məmurların cəzalandırılması ilə kifayətlənmək olmaz: "Amma hələ ki, nəticənin yox, səbəblərin aradan qaldırılması üçün ciddi addımların atılmasına böyük ehtiyac var. Azərbaycanda korrupsiya sahəsində ən böyük problemlərdən biri büdcə korrupsiyasıdır. Büdcədən ayrılan vəsaitlərin normal xərclənməməsi var. Qeyri-şəffaflıq hökm sürür... Bu istiqamətdə qanunvericilik səviyyəsində dəyişikliklərə böyük ehtiyac var.

Ekspert burada hətta bir çox ölkələrin, o cümlədən qardaş Türkiəyinin təcrübəsindən istifadəni mümkün sayır: "Məsələn, Türkiyədə tenderlər canlı yayımda həyata keçirilir. Nəticədə insanlar şəffaf şəkildə mübarizə aparırlar. Əslində, bu, bir çox ölkələrin praktikasında var. Bizdə qanunvericilik səviyyəsində məsələlər həll olunmasa, korrupsiyanın özü ilə mübarizə aparmaq o qədər də effektli və məntiqli deyil.