![Açiq mənbələrdən foto.](https://turan.az/resized/750/500/resize/media/2020/main/070800028490.jpg)
Açiq mənbələrdən foto.
Koronavirus pandemiyasına qarşı mübarizə, Böyükşor gölündən qalxan iy-qoxunun səbəbləri, pandemiya ilə mübarizədə məsələnin sosial cəhətinə baxış və s. məsələlər medianın aparıcı mövzusu olaraq qalmaqdadır...
Əgər əməl olunsa...
"Azərbaycan" qəzeti "İnsanların sağlamlığı bütün vəzifələrin fövqündə dayanır" sərlövhəli məqalədə ölkədə koronavirus pandemiyasına qarşı mübarizəni dəyərləndirir.
Müəllifə görə, hazırda respublikanın 45 xəstəxanasında koronavirus xəstələri müalicə alırlar, bununla yanaşı, 2000 çarpayılıq 10 modul tipli xəstəxananın quraşdırılmasına başlanılıb, onlardan 5-i artıq istifadəyə verilib, ən müasir standartlara cavab verən laboratoriyalar alınıb.
Müəllifə görə, fevral ayında ölkədə cəmi 6 laboratoriya olsa da, indi 29 laboratoriya fəaliyyət göstərir.
Məqalə müəllifi virusla mübarizənin həm də vətəndaşların məsələsi olduğunu deyərək, hesab edir ki, hər bir vətəndaş ilk növbədə özünü qorusa, yoluxma olmaz və beləliklə, koronavirus təhlükəsi bir o qədər tez aradan qaldırılar.
Amma müəllif yada salır ki, son zamanlar yoluxma sayının artması karantin rejimi qaydalarının pozulmasının nəticəsidir, tələblərə düzgün riayət olunsaydı, sərt karantin rejiminin uzadılmasına da gərək qalmazdı: "Ciddi səylərə baxmayaraq, pandemiyanın qarşısını almaq və ya onu əsaslı şəkildə lokallaşdırmaq mümkün olmayıb. Ona görə karantin rejimi dünyanın hər yerində ya uzadılır, ya da yumşalmadan sonra yenidən tətbiq olunur".
Məqalə müəllifi deyir ki, xoşagəlməz halların baş verməsinə baxmayaraq, bütövlükdə Azərbaycan cəmiyyəti koronavirusun yayılmasının qarşısını almaq üçün həyata keçirilən məhdudiyyət tədbirlərini anlayışla qarşılayır.
Müəllifə görə, ölkədə aparılan kompleks tədbirlər öz səmərəli nəticəsini verəcək və pandemiya ilə mübarizədə müsbətə doğru nəticələr əldə olunacaq.
Müəyyən olunsa, məsuliyyət yaradacaq
"Yenisabah.az" saytı "Bakıdakı üfunət iyinin səbəbi məlum oldu" sərlövhəli məqalədə son günlər paytaxt səmasında kəskin iy-qoxu yaranmasının səbəblərini araşdırır.
Müəllif deyir ki, iyulun 5-i və 6-sı paytaxtın bəzi rayonlarında yayılmış iy-qoxu mənbəyinin Böyük Şor gölü olması müəyyən edilib və buna Ekologiya və Təbii Sərvətlər Nazirliyinin Dövlət Ekoloji Təhlükəsizlik Xidməti də münasibət bildirib.
Xidmətin açıqlamasına görə, Nazirliyin müvafiq qurumları su və hava nümunələri götürərək analizlər aparıb: "İlkin nəticələrə görə, Böyükşor gölündə ionun və bəzi maddələrin miqdarı normadan artıqdır.
Amma açıqlamada ilkin olaraq belə hesab edilir ki, üç gün öncə "Sobsan" boya fabrikində olan güclü yanğının söndürülməsi zamanı kimyəvi maddələrlə qarışan onlarla ton suyun birbaşa Böyükşor gölünə axıdılması da bunun sbəblərindən biri ola bilər.
Nazirlik bildirir ki, aparılan araşdırmaların və kimyəvi-bioloji analizlərin nəticəsi məlum olduqdan sonra yekun rəy ictimaiyyətə açıqlanacaq.
Nazirlikdən deyilib ki, təqribən 10 il əvvəl bu göl ekoloji fəlakət zonası elan edilmişdi, son illər keçirilən tədbirlər ekoloji baıxmdan gölü təmizləmişdi: "Amma boya fabrikində baş verən yanğının söndürülməsi zamanı gölün suyuna kimyəvi maddələrin qarışdığı sübut olunarsa, onun təmizlənməsi üçün tədbirlər görüləcək. Həmçinin müəyyən məsuliyyət məsələsi də ortaya çıxacaq".
Cərimələr çıxış yolu deyil
"Redaktor.az" saytında yer alan "Koronavirus sürətlə yayılır: Nəyi səhv etdik? – bizi gözləyən təhlükə" sərlövhəli məqalədə müəllif pandemiya ilə mübarizədə hansı səhvlərin olması barədə sosioloq Əhməd Qəşəmoğlu ilə söhbətləşir.
Koronavirus pandemiyasının ölkədə belə geniş yayılmasından danışan sosioloq deyir ki, bu mübarizə təkcə tibbi yox, həm də sosioloji məsələdir: "Əgər vaxtında düzgün işlər aparılsaydı, vəziyyət bu həddə gəlib çıxmazdı".
Ə.Qəşəmoğlu əlavə edir ki, ölkədə ilk dəfə karantin tətbiq olunduqda ancaq rejimin qadağalarından danışıldı, əhalini buna hazırlamaqdan danışılmadı, bu sahədə hər hansı tədbir görülmədi.
Eləcə də, sosioloq hesab edir ki, hazırlıq olmadan yumşalmaya keçmək (bu il mayın sonunda bəzi qadağaların ləğv olunması nəzərdə tutulur - red.) əsas səhv idi.
O, bütün ölkə üzrə təşqivat qruplarının yaradılmasının və elmi metodlarla təbliğatların aparılmasının vacib olduğunu bildirib.
Ə.Qəşəmoğluna görə, burada insanları virusa yoluxmadan qoruya bilən maska taxılması, sosial məsafə gözlənilməsi, gigiyena qaydalarına əməl olunması təbliğ və təşviq edilməlidir: "Amma hər bir halda əlimizdə olan kadrları bu sahəyə cəlb etməli, maarifləndirmə işlərinə start verilməliyik. Əks halda gec olacaq".
Ə.Qəşəmoğlu hesab edir ki, qaydalara əməl olunması üçün cərimələrin artırılması çıxış yolu deyil, insanları psixoloji və mənəvi olaraq buna hazır etmək daha vacibdir.
Rəy yaz