Media-icmal 08.12.17

Şəkinin UNESCO-nun "Yaradıcı şəhərlər şəbəkəsi" siyahısına daxil edilməsi, hakimiyyətin Avropa İttifaqına münasibəti və ölkədə ədalət mühakiməsi sisteminin fəaliyyəti bugünkü (08 dekabr. 2017-ci il) mdianın aparıcı mövzularındandır ...

Şəki "UNESCO-nun siyahısında

"Azərbaycan" qəzeti "UNESCO Şəkini seçdi" sərlövəhli məqalədə (http://www.azerbaijan-news.az/index.php?mod=3&id=135537) Şəki şəhərinin UNESCO-nun "Yaradıcı şəhərlər şəbəkəsi" siyahısına daxil edilməsini dəyərləndirir.

Müəllif deyir ki, Şəki şəhər rəhbərliyi şəhərin adının UNESCO-nun "Yaradıcı şəhərlər şəbəkəsi" siyahısına daxil edilməsini çox mühüm hadisə kimi diqqətə çatdırıb.

Müəllif deyir ki, UNESCO-nun baş direktoru İrina Bokovanın qərarı ilə "Yaradıcı şəhərlər şəbəkəsi" siyahısına 44 ölkədən 64 şəhər daxil edilib: "Şəbəkənin yaradılmasında məqsəd xalq tətbiqi sənətinin daha da inkişaf etdirilməsi, həmçinin şəhərlərin turizm potensialının genişləndirilməsi, beynəlxalq səviyyədə tanıdılması və davamlı sosial-iqtisadi inkişafa nail olmaqdır. Bu baxımdan UNESCO-nun bu qərarını xalq sənətkarlığının inkişafında yeni mərhələnin başlanğıcı saymaq olar".

Müəllifə görə, bu hadisə həm də Şəkinin beynəlxalq səviyyədə tanıdılması üçün atılan növbəti uğurlu addımlardan biridir və təşkilatın bu qərarı son illər Azərbaycanda mədəni irsin qorunması və dünyaya tanıdılması istiqamətində aparılan məqsədyönlü işin məntiqi nəticəsidir.

Müəllif hesab edir ki, Şəki şəhərinin belə bir mötəbər təşkilatın siyahısına salınması heç də təsadüfi deyil və Şəkidə tarixən sənət və sənətkarlığın yüksək səviyyədə inkişaf etməsinin göstəricisidir.

Müəllif vurğulayır ki, dəmirçilik, misgərlik, dulusçuluq, papaqçılıq, şəbəkə, ağac üzərində oyma, ipəkçilik və digər istehsal sahələri Şəki sənət məbədinin başlıca sütunlarını təşkil edib.

Yazı müəllifi deyir ki, tarixi sənət sahələrinin qorunması, unudulmaqda olan bir çox sənət növlərinin bərpası, turizmin inkişafı baxımından belə tədbirlərin böyük əhəmiyyəti var: "Sevindirici haldır ki, ölkəmizdə mədəni irsin qorunub saxlanılmasına, xalqımızın zəngin mədəniyyətinin təbliğinə dövlət səviyyəsində yetərincə diqqət yetirilir. Prezident İlham Əliyevin müvafiq fərman və sərəncamları da mədəni irsin qorunub saxlanılması baxımından böyük əhəmiyyətə malikdir.

Məhz prezident İlham Əliyevin, birinci vitse-prezident, UNESCO-nun və ISESCO-nun xoşməramlı səfiri Mehriban xanım Əliyevanın diqqət və qayğısının nəticəsidir ki, muğamımız, aşıq sənətimiz və Novruz bayramı UNESCO-nun qeyri-maddi mədəni irs siyahısına daxil edilib".

Müəllif vurğulayır ki, beynəlxalq qurumun verdiyi bu status Şəki üçün yeni mərhələnin başlanğıcı olacaq, sənət və sənət növləri daha geniş miqyasda inkişaf edəcək, turistlərin buralara olan marağı daha da artacaq.

Ədalətdən uzaq "ədalətli mühakimə" sistemi

"Novoye Vremya" qəzeti "Vəkillik olduğu kimi qalır" sərlövhəli məqalədə (http://novoye-vremya.com/w113702/.../#.WioJy0pl_IU) ölkədə ədalətli mühakimə institutunun durumunu dəyərləndirir.

Müəllif ölkədə vəkillik institutunun ağır durumda olmasının səbəbini bütünlükdə hüquq-mühafizə sistemindəki mövcud durumla əlaqəli olduğunu deyir.

Müəllifə görə, bir sıra tanınmış vəkillərin qurumdan çıxarılması, bu institutun məhkəmələrdə nümayəndəlik fəaliyyətinin məhdudlaşdırılmasını dəstəkləməsi də həmin ağır durumun törəməsidir.

Bundan da irəli gələrək müəllif bir konfransla və ya rəhbərliyin dəyişməsilə bu institutda mütərəqqi dəyişiklik olacağını mümkünsüz hesab edir.

"Müsbət dəyişikliyin olması hakimlərin fəaliyyətində ən azı iki məqamın dəyişməsinə bağlıdır. Birincisi, hakimlərin savadlılığı keyfiyyət etibarilə dəyişməldir, ikincisi, hüquqazidd hərəkətlərinə görə hakimlərin cəzalandırılmasında şəffaf sistem yoxdur".

Digər tərəfdən, müəllif deyir ki, istintaq prosesində müdafiə tərəfinin, yəni, vəkillik hüququ ilk andan pozulur. Belə ki, vəkil istintaq materialları ilə ancaq ibtidai istintaq başa çatandan sonra tanış ola bilir və vəkilin sübut toplamaq hüququ yoxdur.

Müəllifə görə, daha bir problem qarşı tərəf sübutlar təqdim edə bilmədiyi üçün məhkəmənin ittihamçı tərəfin sübutları ilə hadisəni qiymətləndirməsidir.

"Beləliklə, hakim ancaq prokuror və vəkil sübutlar təqdim etdikdə ədalətli hökm çıxara bilər. İndkiki halda müdafiə tərəfi bu imkana malik deyil. Digər tərəfdən, hakimin özündən yuxarı bir neçə instansiyadan (məhkəmə sədri, Kollegiya və s.)güclü şəkildə asılılığı müstəqil olmasına və ədalətli qərar çıxarmasına mane olur".

Müəllif məhkəmə sistemində hakimlərin məhkəmə sədri ilə münasibətdə tabeçilik məqamlarını anormal sayaraq aradan qaldırılmasını zəruri adlandırır.

Həm də müəllif hesab edir ki, şəxs hakim təyin edildikdən bu mövqeyi tərk edənə kimi varidatı, qazancı nəzarət alıtnda olmalıdır ki, korrupsiya hallarına yol verilməsin.

Vəkillik institutunun fəaliyyətinə toxunan müəllif deyir ki, hazırda ölkədə vəkil olmağa maraq azdır və bu, bir tərəfdən, əksər hallarda məhkəmə sisteminin ancaq ittiham tərəfini haqlı sayması, digər tərəfdən isə vəkillik əməyinin dövlət tərəfindən yetərincə dəyərləndirilməməsidir.

Müəllif vurğulayır ki, həm də müstəqil vəkillərin bəzi işlərdə ittiham tərəfini ifşa erdikdə Vəkillər Kollegiyası tərəfindən təzyiqə məruz qalması kimi hal var.

Müəllif Vəkillər Kollegiyası tərəfindən vəkillərə qarşı intizam cəzalarının narahatlıq doğurduğunu xüsusi vurğulayır.

Yazı müəllifi deyir ki, prokurorun, məhkəmənin, ya Penitensiar Xidmətin şikayəti kifayət edir ki, vəkil ədalətli mövqeyinə görə cəzalandırılsın.

"Belə davranış, məhkəmələrin hökumətin mənafeyinə maneəsiz qərar çıxarması, işləri Avropa İnsan Haqları Məhkməsinə hazırlayan vəkilləri qorxutmaq, siyasi fəalları müdafiəsiz qoymaq məqsədi güdür".

Müəllifə görə, Vəkillər Kollegiyasına alternativ olmadığı üçün vəkillik fəaliyyəti inhisara alınıb, odur ki, vəkillərə təzyiq çox asan olub.

Odur ki, bütünlüklə ədalət mühakiməsi sistemində islahatlar olmadan vəkillik institutu sahəsində islahat olması, sadəcə, gülüş doğurur.

Demokratiyanı söyənlər, avtokratizmi öyənlər

"Azadlıqinfo.az" saytında "Və ya, Novruz Məmmədov hansı "klub"ları xoşlayır?" (https://www.azadliq.info/208319.html) sərlövhəli məqalə diqqət çəkir.

Müəllif məqaləyə səbəb kimi son vaxtlar rəsmi Bakı təmsilçilərinin Avropa İttifaqını tənqid hədəfi seçməsini göstərir.

Müəllif deyir ki, prezidentin xarici siyasət məsələləri üzrə köməkçisi Novruz Məmmədov mətbuata açıqlama verərək Avropa İttifaqını "xristian klubu" adlandırıb, Azərbaycana qarşı ədalətsiz mövqedə ittiham edir, ölkə ictimaiyyətinin bundan narahat olduğunu bildirir.

Müəllif isə deyir ki, YAP hakimiyyəti 24 ildir ki, demokratiyanı söyür, avtoritarizmi isə öyür, bu rejimin avtoritarizmə sevgisi o qədər böyükdür ki, hətta Azərbaycanın 20 faiz ərazisinin işğalına "yaşıl işıq" yandıran Rusiya önündə təzim etməkdən çəkinmir.

Müəllif bu il noyabrın 24-də Brüsseldə keçirilən "Şərq Tərəfdaşlığı" ölkələrinin sammitində Avropa İtiifaqı ilə saziş imzalanmamasını hakimiyyətin ədalətə, azadlığa, demokratiyaya nifrətinin göstəricisi adlandırır: "Təbii ki, bu qədər rüsvayçı mövqedən sonra beynəlxalq aləmin önündə limitin bitdiyi bir dövrdə yeganə çıxış yolu kimi Avropanı söyməyə start veriblər, amma yenə də bütün ittihamları bumeranq effekti verib".

Müəllif deyir ki, N.Məmmədov Aİ-ni Azərbaycan ərazilərinin işğalına göz yummaqda, islamofobiyanı qızışdırmaqda, radikalizmi, terrorizmi, separatizmi dəstəkləməkdə ittiham edir.

Müəllif isə rəsmi Bakı təmsilçisinə bunun əksini sübut edərək Avropa Parlamentinin Azərbaycanın ərazi bütövlüyünü dəstəkləyən iki qətnamə qəbul etdiyini, Almaniya Bundestaqının işğal faktını tanıdığını, BMT-nin bu məsələyə dair 4 qətnaməsinin olduğunu, ABŞ-ın 22 ştatının Xocalı soyqırımını tanıdığını bildirir.

Yazı müəllifi N.Məmmədova da xatırladır ki, strateji müttəfiq saydıqları Rusiya qondarma erməni soyqırımını tanıyıb və bu gün də 20 faiz ərazinin işğalda qalması üçün Ermənistana ən yüksək səviyyədə dəstək göstərir: "Bu fonda heç bir hökumət nümayəndəsi Rusiyanın ermənipərəstliyinə mövqe bildirməyə cəsarət etmir və təkcə bu fakt göstərir ki, Azərbaycan hakimiyyətinin demokratik dünya ilə düşmənçiliyi Qarabağ məsələsinə görə, milli maraqlara görə deyil".

Digər tərəfdən, müəllif rəsmi Bakıya deyir ki, Avropa qurumları əgər bu qədər anti-Azərbaycan mövqelidirsə, birdəfəlik əlaqələri kəsin, Avropa qurumlarından milyonlarla kreditlər və yardımlar almayın.

Müəllif rəsmi Bakı təmsilçisinin dediklərinin əsassızlığını hakimiyyət nümayəndələrinin müalicə, istirahət, övladlarının təhsillərinin, var- dövlətlərinin, ölkə ticarətinin 48 faizinin Avropa ilə bağlı olması arqument və faktları ilə sübut edir.

Müəllif hakimiyyətin "xristian klubu" arqumentiylə ortaya çıxmasını absurd sayaraq bunu bunu rəsmi Bakının siyasətinin tərkib hissəsi olan tolerantlığa belə qeyri-səmimi olması kimi dəyərləndirir.

Müəllif bütün bu tənqdilərin mahiyyətini Azərbaycan hakimiyyətinin demokratların deyil, avtoritarların sırasında addımlamaq istəməsinin nəticəsi hesab edir və normal idarəçilik, xalq sevgisi, dövlət maraqları bu komandanın təfəkkürünə yaddır.