Media-icmal 09.01.20

Sosial islahatların həyata keçirilməsi, gərginləşməkdə olan İran-ABŞ münasibətlərinin Azərbaycana təsiri, deputatın icazəsiz tikintilər məsələsinə münasibəti və s. məsələlər medianın aparıcı mövzularındandır…

Sosial islahatların əsas hədəfi - vətəndaş

“Azərbaycan” qəzeti “Uğurlarımız düşünülmüş siyasətin təzahürüdür” sərlövhəli məqalədə ötən ilin nailiyyətlərini dəyərləndirir.

Müəllif deyir ki, 2019-cu il dərin islahatlar, o cümlədən sosial və iqtisadi sahədə həyata keçirilən islahatlar ili oldu və Azərbaycan xalqı 2020-ci ilə xoş əhvali-ruhiyyə, böyük inam və ümidlərlə qədəm qoydu. “Bu hisslər, əlbəttə ki, dövlətin apardığı məqsədyönlü və uğurlu sosial-iqtisadi siyasətdən, ötən illərdə qazanılan nailiyyətlərdən qaynaqlanır”, deyə müəllif bu uğurların səbəblərini izah edir.

Yazıda vurğulanır ki, keçən il iqtisadiyyatda, o cümlədən qeyri-neft sektorunda bol məhsul əldə olundu, valyuta ehtiyatları artdı, Azərbaycan donor ölkə statusu qazandı və bütün bunlar düşünülmüş siyasətin təzahürüdür.

“Bu il də bu baxımdan çox yaddaqalan il olmuşdur. Çox geniş, hərtərəfli sosial paket təqdim edildi və bu sosial paket 4 milyon 200 min əhalini əhatə etdi. Bəzi müavinətlər 50 faiz, bəzi müavinətlər 100 faiz, yəni 2 dəfə artmışdır. Minimum əməkhaqqı 2 dəfə, minimum pensiya 70 faiz artmışdır. Minimum pensiyanın alıcılıq qabiliyyətinə görə biz bu gün MDB məkanında birinci yerdəyik. Bizim sosial siyasətimiz bir daha onu göstərir və mən dəfələrlə bəyan etmişəm ki, bizim siyasətimizin mərkəzində Azərbaycan vətəndaşı dayanır”, müəllif prezidentdən sitat gətirməklə bu islahatların mahiyyətini diqqətə çatdırır.

Müəllif əlavə edir ki, il ərzində 5 mindən çox məcburi köçkün və 800-ə yaxın şəhid ailəsi üçün evlərin, yaxud mənzillərin tikilməsi və s. dövlətin həm də daim öz vətəndaşının yanında olmasının göstəricisidir.

Məqalədə deyilir ki, keçən il ölkəyə rekord sayda, 3 milyondan çox turistin gəlməsi qeyri-neft sektorunun inkişafının təsdiqi faktlarından biridir, ötən 15 il ərzində ümumi uzunluğu 15 min kilometr olan yol çəkilib.

Daha sonra müəllif Azərbaycan qazını Avropaya nəql edəcək “Cənub qaz dəhlizi” barədə yazır və 2020-ci ildən etibarən bu kəmər vasitəsilə Avropanın Azərbaycan qazı alacağını bildirir.

Ölkədə əhali artımına toxunan müəllif hesab edir ki, əhali artımı dövlətin ardıcıl sosial siyasətinin nəticələrindən biridir.

Son olaraq isə müəllif deyir ki, ölkədə həyata keçirilən ardıcıl sosial-iqtisadi islahatlar həm də xalqın sabahına hesablanır, dünyaya gələn nəslin xoşbəxt gələcəyi üçün də böyük, genişmiqyaslı işlər görülür.

Bahalaşan neft, artan müharibə təhlükəsi

“Müsavat.com”da isə “Neftin bahalaşmasının xeyrindən çox ziyanı ola bilər - səbəb” sərlövhəli məqalə oxumaq olar.

Müəllif bölgədə İran-ABŞ münasibətlərinin gərginliyi, bu fonda neftin bahalaşması və bu münasibətlərin Azərbaycana mümkün təsirləri barədə neft sahəsi üzrə eskpert İlham Şabanla söhbətləşir.

Müəllif deyir ki, gərginləşən İran-ABŞ münasibətləri çərçivəsində bir tərəfdən müharibə ehtimalı artır, digər tərəfdən isə dünya bazarında neftin və qızılın qiyməti bahalaşır, artıq neftin qiyməti 7% bahalaşaraq 72 dolları ötüb, qızılın unsiyasının qiyməti 1,6% bahalaşma ilə 1576 dollar təşkil edir.

“Neft Araşdırmaları Mərkəzi”nin rəhbəri İlham Şaban “Yeni Müsavat”a deyir ki, bazarda hazırda qeyri-stabillikdir, səbəb isə siyasi gərginliyin qalmasıdır. “Bu gərginliyin nə zaman səngiyəcəyi məchuldur və nə bazar iştirakçılarına, nə də bu gərginlik iştirakçılarının özlərinə belə bəlli deyil… Yəni qlobal neft bazarı hazırda çalxalanmaqda davam edir və bu şəraitdə neft qiymətlərinin gün ərzində dəyişməsi adi hal olacaq”.

İ.Şaban bu fonda hesab edir ki, neft hasilatçısı olan Azərbaycan üçün bazarda qiymətlərin yüksəlməsi, əlbəttə, əlverişli görünür, amma bu il Azərbaycanda neft istehsalının bir qədər azalması gözlənilir: “Belə ki, hökumətin 2020-ci ilin dövlət büdcəsi sənədində verdiyi proqnoza əsasən, cari ildə Azərbaycanda 37 milyon 712,8 min ton neft hasil olunacaq ki, bu da 2019-cu ildəkindən (37 milyon 752,3 min ton) azdır.

Ekspertin sözlərinə görə, 2021-ci ildən Azərbaycanda neftin hasilatında artım gözlənilir: “Sənədə görə, həmin il ölkədə 38 milyon 246,2 min ton, 2022-ci ildə 38 milyon 520,6 min ton, 2023-cü ildə isə 38 milyon 634,4 min ton neft hasil ediləcək ki, bu da 2019-cu il üçün verilən proqnozla müqayisədə 2,3 faiz çoxdur. Bu il dövlət büdcəsində neftin dünya bazar qiyməti 55 dollardan hesablanıb”.

Amma, bununla yanaşı, İ.Şaban xəbərdarlıq edir ki, neftin qiymətinin Yaxın Şərqdə, xüsusilə də Azərbaycanın cənub qonşusu olan İranın cəlb olunduğu hərbi qarşıdurma və müharibə nəticəsində yüksəlməsi Azərbaycan üçün heç də yaxşı perspektiv vəd etmir.

“İranla ABŞ arasında başlaya biləcək müharibə Azərbaycanı çox ciddi qaçqın axını ilə üz-üzə qoya bilər. Bu isə neftin qiymətinin artmasından əldə olunacaq gəlirlərdən qat-qat yüksək həcmdə vəsaitlərin həmin qaçqınların saxlanmasına sərf olunması zərurətinin yaranacağı deməkdir...”, deyə Mərkəz rəhbəri xüsusi vurğulayır.

Hansısa icra başçıları nöqsana yol verirsə…

“Modern.az”da isə “Hansısa icra başçısı nöqsanlara yol verir” sərlövhəli məqalə diqqət çəkir.

Müəllif dövlət başçısı İlham Əliyevin Anar Quliyevi Dövlət Şəhərsalma və Arxitektura Komitəsinin sədri vəzifəsinə təyin etməsilə bğlı qəbul etdiyi zaman icra başçılarına daha bir xəbərdarlıq etdiyini vurğulayır.

Müəllifin sözlərinə görə, ölkə başçısı əvvəlki dövrlərdə şəhərsalma nöqsanlarına yol verilməsini də istisna etmir:

“Bakının müxtəlif yerlərində tarixi keçmişimizə zidd olan, heç bir memarlıq standartına uyğun olmayan yöndəmsiz və eybəcər binalar tikilirdi. O binalar elə tikilirdi ki, həm ümumi mənzərəyə ziyan vururdu, həm də orada heç bir şəhərsalma əmsalı nəzərdə tutulmurdu”.

V çağırış Milli Məclisin deputatı Vahid Əhmədov isə “modern.az-a deyib ki, Prezident tərəfindən icra başçılarına dəfələrlə xəbərdarlıq olub.

“Hələ Şəhərsalma və Arxitektura Komitəsinin sədri Samir Nuriyev olanda da belə xəbərdarlıq var idi. Sədr tərəfindən də bununla bağlı sərəncam imzalanmışdı. Dövlət başçısı göstəriş verdi ki, Komitənin icazəsi olmadan heç bir yerdə tikinti aparıla bilməz. Bütün işlər Komitəylə razılaşdırılmalıdır. İcra başçıları hazırda Komitə ilə razılaşdırma aparırlar”.

Keçmiş deputat deyir ki, bu yaxınlarda rayonların birində Komitədən icazə alınmadan tikintiyə icazə verilməməsinin şahidi olub.

Amma V.Əhmədov hansısa icra başçılarının nöqsanlara yol verməsini də istisna etmir.

“Məsələ müəyyən qədər nizamlanıb. Ola bilər hansısa icra başçısı nöqsanlara yol verir. Mənim aldığım məlumata görə, bizim regionda  - Qubada buna riayət olunur”, - deyə V.Əhəmədov deputat seçildiyi bölgədə bu sahədəki vəziyyəti dəyərləndirib.