Media-icmal 10.11.2016

Milli  Şuranın vətəndaşlara təzyiqlərə etiraz mövqeyi, bankların vətəndaşları kütləvi olaraq məhkəməyə verməsi, “Bakinternet”in vətəndaşlara sayğısız davranışı, ölkənin bank sisteminin mövcud durumu bugünkü medianın aparıcı mövzusudur.

Milli Şura: Təhdid edən cəzalandırılsın         

“Azadlıqinfo” saytı Milli Şuranın Gözəl Bayramlı ilə bağlı bəyanatına yer verib. (http://www.azadliq.info/164597.html)

Bəyanat qurumun üzvü, Azərbaycan Xalq Cəbhəsi Partiyasının  sədr müavini Gözəl Bayramlının ünvanına bir müddət öncə olan təhdidlərdən və indiyə kimi tədbir görülməməsindən qaynaqlanıb.

Sənəddə xatırladılır ki, G.Bayramlı bu il oktyabrın 28-də açıq nömrəli telefon zəngilə kobud şəkildə hədələnərək təhdid edilib: “Ona açıq mətnlə öldürüləcəyi ilə bağlı xəbərdarlıq edilib və ondan siyasi fəaliyyətinə son qoyulması tələb edilib”.

Sənəddə deyilir ki, hadisə sosial şəbəkələrdə geniş rezonans doğursa da, mətbuat bu barədə dəfələrlə yazsa da hüquq-mühafizə orqanları buna diqqət yetirməyib: “Bunun əvəzində, Gözəl xanımın guya hansısa radikal dini cərəyanın təmsilçiləri tərəfindən ölümlə hədələnməsi görüntüsü yaratmaq istiqamətində uğursuz cəhdlər edilmiş, saxta Facebook profili yaradılaraq oradan G.Bayramlıya qarşı olan təhdidlər təkrarlanmışdır”.

Bəyantda vurğulanır ki, böyük ictimai təpki görən hüquq-mühafizə orqanları ancaq bir həftədən sonra G.Bayramlını  araşdırma üçün dəvət edib. Suraxanı Rayon Polis İdarəsində G.Bayramlını inandırmaq istəyiblər ki, həmin şəs onu yox, başqa bir şəxsi təhdid etmək istəyib.

Sənəddə vurğulanır ki, buna qədər G.Bayramlı “Nardaran məhbusları”nı müdafiə etdiyinə görə, DİN-in Mütəşəkkil Cinayətkarlığa Qarşı Mübarizə İdarəsində təhdidlərə məruz qalıb.

Sənəddə hakimiyyətdən ölkə müxalifətinə, vətəndaş cəmiyyətinə və Azərbaycan vətəndaşlarına qarşı istənilən qanunsuz addımlara son qoyulması, G.Bayramlıya qarşı bu cinayəti törədənlərin ifşa olunub cəzalandırılması tələb edilir.

Xalqı , vətəndaşı düşünən yoxdur

“Yeni Müsavat” qəzetində isə “Banklar vətəndaşları kütləvi şəkildə məhkəməyə verir”  (http://musavat.com/news/iqtisadiyyat/banklar-vetendashlari-kutlevi-shekilde-mehkemeye-verir_391335.html) sərlövhəli məqalə diqqət çəkir. 

  Müəllif deyir ki, banklar son aylar əhalini kütləvi şəkildə məhkəməyə verir, borclu vətəndaşlar isə özlərini müdafiə edə bilmədiklərindən əksər hallarda məhkəmələri uduzurlar: “DəmirBank”ın Ağsu filialı demək olar ki, rayon sakinlərinin böyük əksəriyyətini məhkəməyə verib. Hər gün keçirilən məhkəmə proseslərinin çoxunda bu bankın iddialarına baxılır. İnsanların sosial durumunun ağır olduğu bir zamanda maaş alan borcluların maaşlarından 50 faiz tutulur”.

Müəllif hesab edir ki, onsuz da ağır durumda yaşayan sakinlərin ailələrini nə ilə dolandıracaqları bankların və məhkəmələrin marağında deyil.

“Əksər hallarda vətəndaşlar özlərini müdafiə edə bilmirlər. İstənilən halda vətəndaşın banka borcu varsa, ödəniş etmirsə, bank məhkəməyə verib udacaq. Amma söhbət ondan gedir ki, hansı məbləği tələb edəcək?”. Bunu isə qəzetə ekspert Əkrəm Həsənov şərh edir.

Ekspert vurğulayır ki, məhkəməyə verilən vətəndaşlar əksər hallarda özlərini müdafiə etmirlər və bu səbəbdən də məhkəmədə məğlub olurlar: “Daha aktiv olanlar sahibkarlardır ki, özlərini məhkəmədə müdafiə edirlər və udurlar”.

Ekspert deyir ki, məhkəmə proseslərində iş adamlarının banklara qalib gəldikləri hallar var. Ə.Həsənov bunu da deyir ki, istənilən halda, bir sıra vətəndaşlar var ki, onların hətta məhkəməni udmaq şanslarıı olmasa belə, ən azı, məhkəmədə vaxtı udmaq kimi şansları var. Ə.Həsənov düşünür ki, bu, əslində vətəndaşın xeyrinədir, yəni, əksər hallarda vətəndaşın ödəniş qabiliyyəti yoxdursa maraqlı olur ki, icra halını optimal şəkildə uzatsın: “Bəzi hallarda vətəndaşın girovu varsa belə ona sərf edir ki, bu proses xeyli müddət çəksin, girovunun qiyməti düşsün və sonra özü həmin girovu əldə etsin. Sadəcə, təəssüf ki, vətəndaşlar bu imkanlardan əksər hallarda istifadə etmirlər”.

Alternativsizlik yekəxanalığı

“Bizim Yol” qəzeti isə “Dövlət İnternet provayderinin yeni qərarı kütləvi narazılığa səbəb oldu” sərlövhəli  (http://www.bizimyol.info/news/87398.html) sərlövhəli məqalədə müəllif  “Bakinternet” provayderin müştərilərə nəzakətdənkənar davranışını tənqid edir.

Müəllif İnternet xidmətləri bazarında bu qurumun inhisarçı mövqedə olduğunu deyir və yeni tətbiq etdiyi qaydaların  kütləvi narazılıq və panika doğurduğunu bildirir: “Provayder əhaliyə heç bir xəbərdarlıq etmədən son ödəmə tarixini hər ayın 5-nə təyin edib. Əvvəllər xidmət haqqını ayın 20-nə qədər ödəməyə adət etmiş abunəçilərin İnternet təchizatı qəfildən dayandırılıb”.

Müəllif deyir ki, əvvəllər hər ayın 10-15-i arasında abunəçilərə zəng edib ödəmə etməyəcəkləri halda bir neçə günə xidmətin dayandırılacağı barədə xəbərdarlıq edilirdi, amma nədənsə bu dəfə ayın ilk günlərində abunəçilərə zəng edib ödəmə tarixinin ayın 5-nə təyin edilməsi barədə xəbərdarlıq edilməyib: “Bəzi məlumatlara görə, “Bakinternet” abunəçilərə xidmətin kütləvi şəkildə dayandırılmasında maraqlı olub, xidmətin dayandırıldığı günlərin də haqqı abunəçilərdən alınıb və bu üzdən abunəçilər hesab edirlər ki, bu əməliyyatın arxasında hansısa bzines maraqları var”.

Məqalədə deyilir ki, İnternetə girişin sürəti aşağıdır və intensiv kəsintilər baş verir. Müəllif vurğulayır ki, paytaxtın bəzi ATS-lərində “Bakinternet” yeganə provayderdir və bu səbəbdən onlardan imtina etmək də olmur. Daha sonra müəllif abunəçilərə istinadən durumu belə anladır: “Bu provayderin inhisarçı mövqeyi Rabitə və Yüksək Texnologiyalar Nazirliyi tərəfindən himayə edilir. Məsələ burasındadır ki, “Bakinternet” dövlət provayderidir, Bakı Telefon Rabitəsi İstehsalat Birliyinin strukturudur və uzun sözün qısası, Rabitə Nazirliyinin özünündür”.

Müəllif hesab edir ki, “Bakinternet”lə bağlı Rabitə Nazirliyinə ünvanlanan şikayətlərin cavabsız qalması da nazirliyin bu məsələyə biznes maraqları prinsipindən yanaşmasının nəticəsidir.