Media-icmal 11.09.20

“Azərbaycan” qəzeti  “Postpandemiya dövrü: yeni çağırışlar” sərlövhəli məqalədə ölkədə pandemiya ilə bağlı yaranan yeni situasiyanı təhlil edir.

Müəllifə görə, bu virus bəzi qüvvələrin müəyyən məqsədlər üçün düşünüb reallaşdırdığı qlobal layihədir.

Müəllif əlavə edir ki, bu virusa yoluxanların və ölənlərin sayı milyonlarla, dünya iqtisadiyyatının itkiləri isə milyardlarla ölçülür.

Yazıda vurğulanır ki, artıq pandemiyadan öncəki duruma qayıda bilməyəcəyik, çünki yeni çağırışlar fərqli yaşam və düşüncə tərzinin, daha mükəmməl qaydaların gündəmə gəlməsini qaçılmaz edib.

“Biz yenə onlara arxa çevirsək, reallıqlarla hesablaşmasaq və zamanında qəti tədbirləri görməsək, indikindən daha çətin vəziyyətə düşə bilərik və daha ağır fəlakətlərlə üzləşərik”.

Müəllifə görə, mövcud xəstəxanaların, mehmanxanaların bu virusa yoluxanların müalicəsi üçün ayrılması, yenilərinin tikilməsi, müasir laboratoriyaların qurulması, avadanlıqların alınaraq ölkəyə gətirilməsi və biznesə geniş dəstək layihələri, sahibkarlara vergi güzəştlərinin tətbiqi və s. yeni çağırışların bir hissəsidir.

Onun fikrincə, indi dövlət qulluqçularından daha çox məsuliyyət tələb edilməsi də həmin çağırışlardan biridir, kadr islahatında ciddiyyət əsas məsələyə dönür.

Müəllifə görə, islahatların dayanmaması, məhz kadr islahatının nəticəsidir. 

Yazıda deyilir ki, eyni zamanda vətəndaş nəzarətinin gücləndirilməsi çağırışları da belə çağırışlardan biridir. 

Müəllif  ölkədə vəzifəli şəxslərin cəzalandırılmasının dövlətçilik ənənələrinin  gücləmndirilməsi üçün edildiyini vurğulayır. 

Son olaraq müəllif deyir ki, postpandemiya dövründə o ölkələr irəli çıxacaq ki, mükəmməl idarəetmə sistemlərinə malik olsun, dövlət mənafeyi öndə olsun.

“Yeni sabah.az” “Deputat nazirliyi sərt tənqid etdi” sərlövhəli məqalədə deputat Vüqar Bayramovun parlamentdə Əmək və Əhalinin Sosial Müdafiəsi Nazirliyini tənqid etməsini gündəmə daşıyır.

Deputat deyir ki, əlilliyin təyinatındakı çətinliklərlə bağlı ünvanlanan sorğular ən çox edilən müraciətlər sırasındadır, proses elektronlaşsa da çox vaxt böyük əksəriyyətə imtina cavabı verilir.

Onun deməsinə görə, Füzuli rayonunda bu ilin 8 ayında uşaqlara əlilliyin təyin edilməsi barədə göndərilən 139 müraciətin 99-na birinci mərhələdə imtina cavabı gəlib.

V.Bayramovun deməsinə görə, əlillik dərəcəsi almaq istəyən yaşı 18-dən çox olan 152 vətəndaşın 116-ı imtina ilə kifayətlənib: “Bu o deməkdir ki, ümumi müraciətlərin 74 faizinə elektron müraciətdən sonra imtina cavabı verilib”.

Müraciətlər göstərir ki, əlillik almaq hüquqi olan xeyli sayda vətəndaş süni maneələr səbəbindən bunu ala bilmir.

Deputat vurğulayıb ki, tibbi-sosial ekspert komissiyaları tərəfindən qiymətləndirmənin, eləcə də kütləvi imtinanın hansı meyarlar ilə həyata keçirildiyi bəlli deyil:

Bu səbəbdən deputat sorğuları nəzərə alaraq, məsələnin araşdırılması və əlillik almaq hüququ olan vətəndaşlara bu imkanların verilməsini təmin edəcək şəffaf və ədalətli mexanizmin formalaşdırılması ilə bağlı Nazirlər Kabinetinə müraciət edib.

“Sfera.az” saytı isə “Azərbaycandakı rusdilli məktəblər bağlansın?” mövzusunu  gündəmə gətirir, bu məsələdə ekspertlər iki hissəyə bölünüb.

Deputat  Anar İskəndərov deyir ki, rusdilli məktəblərə meyl artır deyə, nə süni şəkildə genişləndirmək, nə də inzibati şəkildə onların qarşısını almaq olmaz.

A.İskəndərov əlavə edir ki, Konstitusiya var və burada göstərilir ki, dövlət dili Azərbaycan dilidir. “Dövlət dilinə də hörmətlə yanaşmalıyıq, təhsil birmənalı olaraq Azərbaycan dilində olmalıdır. Dünya dillərini sevmək və ona hörmət etmək öz dilindən imtina etmək demək deyil. Məktəblər də belədir. Azərbaycan dilli məktəblərin sayının çox olmasına böyük ehtiyac var”.

Təhsil sahəsi üzrə ekspert  Məlahət Mürşüdlü deyir ki, yabançı ölkələrin Azərbaycanda  məktəblərini maliyyələşdirməyə borclu deyilik.

“Beynəlxalq müqavilələr əsasında başqa dillərdə də məktəb açılırsa bu məktəblərdə də Azərbaycan dili, tarixi, ədəbiyyatı, coğrafiyası fənn olaraq tədris edilir. Rusdilli məktəblər dövlətimizin vəsaiti hesabına maliyyələşdirilir”.

M. Mürşüdlü bu qənaətdədir ki, rusdilli məktəblərin çox olması və dövlət vəsaiti hesabına yaradılması yanlış addımdır: “Dərd orasındadır ki, həmin məktəblərdə tədris proqramında, dərsliklərdə uşaqlara rus ədəbiyyatı, tarixi, coğrafiyası öyrədilir. Bu, nə deməkdir, sovet dönəmində yaşayırıq?”