Media-icmal 11.12.20

"Azərbaycan" qəzeti  "Azərbaycan Prezidenti: Biz bölgədə yeni bir işbirliyi platformasını yaratmalıyıq, bu, çoxtərəfli platforma ola bilər"

sərlövhəli məqalədə Azərbaycan Prezidenti İlham Əliyevin və Türkiyə Prezidenti Ərdoğanın mediaya birgə bəyanatında Azərbaycan-Türkiyə birliyinin bölgə üçün əhəmiyyətinə dair hissəni diqqət mərkəzinə çəkir.  

Birgə bəyanatda deyilir ki, bu gün Türkiyə ilə Azərbaycan birliyi təkcə bu iki xalq üçün deyil, bölgə üçün, dünya üçün çox böyük önəm daşıyır. Vurğulanır ki, bu dövlətlərin siyasəti əməkdaşlığa, ölkələr arasında işbirliyinə hesablanıb.

Birgə bəyanatda bölgədə yeni bir işbirliyi platformasının yaradılması irəli sürülür, bunun çoxtərəfli platforma ola biləcəyi qeyd edilir, habelə işbirliyi platformasında iştirak edən bütün bölgə ölkələrinin bundan ancaq faydalana biləcəyi vurğulanır.

Birgə bəyanatda ənənəvi Türkiyə-Azərbaycan-Gürcüstan, Azərbaycan-Rusiya-İran, Türkiyə-Rusiya-İran işbirliyinin olduğu xatırladılır. Həm də deyilir ki, bütün bu işbirliyi platformalarını ümumiləşdirib vahid platforma kimi təqdim edə bilərlər.

Hətta Ermənistanın belə bu platformadan kənarda qala bilməməsinə işarə edilir ki, Ermənistan rəhbərliyi müharibədən düzgün nəticələr çıxararsa və öz əsassız iddialarından əl çəkərsə və gələcəyə baxarsa, o zaman onların da bu platformada yeri ola bilər. "Biz buna açığıq və müharibədən sonra Azərbaycanın mövqeyi və verilən bəyanatlar bunu deməyə əsas verir. Biz bu səhifəni bağlamalıyıq, biz bu ədavətə son qoymalıyıq", - deyə bəyanatda bildirilir.

"Bizimyol.info.az" saytı "Bundan sonra Azərbaycanda ordu quruculuğunda yeni yol başlayacaq" sərlövhəli məqalədə dekabrın 10-da Bakının Azadlıq meydanında keçirilmiş Zəfər Paradını dəyərləndirir.

Deputat Sabir Rstəmxanlı hesab edir ki, Müstəqil Azərbaycan Ordusunun tərcümeyi-halında Zəfər Paradı unudulmayacaq gündür, nadir hadisədir. 

Deputat vurğulayır ki, Zəfər Paradının çox böyük siyasi, mənəvi və hərbi əhəmiyyəti var, Zəfər Paradında qalib Ordunun keçidini və məğlub düşmənin qənimət kimi ələ keçirilən hərbi texnikasını gördük.

S.Rüstəmxanlı əlavə edir ki, paradda çıxış edən Azərbaycan və Türkiyənin dövlət başçıları dünyaya çox önəmli mesajlar verdilər, Azərbaycan və Türkiyə xalqının eyni xalq olduğunu dünyaya bəyan etdilər.

Deputat bildirir ki, Vətən müharibəsində Türkiyənin böyük rolu oldu və Azərbaycana Türkiyə tərəfindən siyasi və mənəvi dəstək verildi.

O yada salıb ki, Azərbaycan hərbiçiləri Türkiyədə təhsil aldılar və birgə təlimlərdə iştirak Ordunun güclənməsində böyük əhəmiyyətə malik oldu.

Deputatın sözlərinə görə, bundan sonra Azərbaycanın ordu quruculuğunda yeni mərhələ başlayır, Azərbaycan və Türkiyə inteqrasiya istiqamətində fəaliyyətləri genişləndirəcəklər.

"Müsavat.com"  saytı isə "Koronvirus bəlası davam edir: evdə müalicə alanlar bu problemlərlə üzləşirlər" sərlövhəli məqalədə koronavirus infeksiyası ilə bağlı evdə müalicə alan insanların üzləşdirkləri problemləri diqqətə çatdırır.

Bu virusa yoluxaraq evdə müalicə alan şəxslər baxımsızlıqdan şikayət edirlər. Məqalədə vurğulanır ki, bu şəxslərin bir problemi odur ki, testləri pozitiv olduğu üçün ərzaq almaq üçün evdən kənara çıxa bilmirlər, bunu edəcək kimsələri də yoxdur.

Daha bir problem xəstəxanadan heç bir dərman ala bilməmələridir. Bu şəxslərin sözlərinə görə, xəstəxanalar, poliklinikalar xəstə çoxluğu ilə bağlı dərman çatdırmağın mümkün olmadığını deyirlər, hərarətləri yüksək olduğu üçün testdən keçmək istəsələr də, qarşı tərəf test üçün alətlərinin qurtardığı cavabı verir.

Müəllif vurğulayır ki, bu virusa qarşı mübarizənin ən effektiv yolu sərt karantin rejimi və vaksinlərin tətbiqidir, hələlik əksər ölkələr Çində istehsal olunan "Biontech", "Pfizer" vaksinlərini alıblar.

Hələlik qəti qərar yoxdur, Azərbaycanda da bundan istifadə olunub-olunmayacağı məlum deyil.

"Open.az" saytı "Azərbaycan da Rusiyadan ixrac mallarına qadağalar tətbiq etməlidir" sərlövhəli məqalədə Rusiyanın Azərbaycandan alma, pomidor ixracına qadağa qoymasını müzakirə edir.

İqtisadçı-alim Qubad İbadoğlu müqayisə apararaq deyir ki, 2015-ci ildə rus təyyarəsini vurandan sonra Türkiyəyə tətbiq edilən embarqo indi başqa formada Azərbaycana yönəlib. İqtisadçı vurğulayır ki, bəzi şəxslər Rusiyanın bu addımının siyasi mahiyyəti olmadığını iddia etsələr də, bu məsələdə siyasət başlıca rol oynayır.

Alim bunu onunla izah edir ki, Azərbaycan üçün xüsusilə də neft gəlirlərinin azaldığı dövrdə pomidor çox əhəmiyyətli ixrac məhsuludur.

Q.İbadoğlu deyir ki, 2020-ci ilin 10 ayı ərzində Azərbaycanın pomidor və alma ixracından qazancı 200 milyon dollar ətrafındadır. "Odur ki, Rusiyanın Azərbaycanda pomidor və alma idxalına qoyduğu qadağaya texniki məsələ kimi yanaşmaq düzgün deyildir".

Alim təklif edir ki, Rusiya bazarından asılılığı aradan qaldırmaq üçün alma və pomidor ixraçı şaxələndirilsin. Azərbayan Qida Təhlükəsizliyi Agentliyi Rusiyanın Rosselxoznadzor təşkilatı ilə ixrac məhsullarının bazarın tələblərinə uyğunlaşdırılması problemini həll etməyə çalışsın. Embarqo davamlı olarsa, onda Azərbaycan da adekvat qərar qəbul edərək Rusiyadan ixrac mallarına qadağalar tətbiq etməlidir.