Media-icmal 12.12.19

Azərbaycanla Rusiya arasındakı yükdaşımaların həcmi, “Gülçülük” qəsəbəsinin sosial problemləri ətrafında müzakirələr, dəm qazından boğulmaların səbəbləri və s. məsələlər medianın aparıcı mövzuları sırasındadır.

Yükdaşımalar artır

“Azərbaycan” qəzeti “Azərbaycan və Rusiya arasında yükdaşımaların həcmi 31 faiz artıb” sərlövhəli məqalədə Rusiya ilə Azərbaycan arasında yükdaşımaların həcmini dəyərləndirir.

Müəllif deyir ki, Azərbaycan Dəmir Yolları” QSC-nin sədri Cavid Qurbanov bu rəqəmi “Rusiya Dəmir Yolları” ASC-nin İdarə Heyətinin yekun iclasındakı çıxışı zamanı deyib.

Müəllif əlavə edir ki, C.Qurbanov  “Rusiya Dəmir Yolları” ASC dəmir yolları şirkətlərinin dünya üçlüyünə daxil olduğunu, Şəqlə Qərbi birləşdirən, ən uzun və tamamilə elektrikləşdirilmiş 9200 kilometrlik Transsibir magistralının bunun əyani göstəricisi olduğunu xüsusi vurğulayıb.

Yazı müəllifi deyir ki, iki ölkə arasında nəqliyyat, o cümlədən dəmir yolu sahəsində də geniş əməkdaşlıq əlaqələri mövcuddur.

Müəllifə görə, Rusiya və Azərbaycan dəmir yolları beynəlxalq qurumlar çərçivəsində, o cümlədən Dəmir Yolları Əməkdaşlıq Təşkilatında ikitərəfli və çoxtərəfli formatlarda, eləcə də bir neçə tranzit nəqliyyat dəhlizinin genişləndirilməsində birgə fəaliyyət göstərir.

Məqalədə vurğulanır ki, hər iki ölkə dəmiryolçularının Yalama-Samur sərhəd-keçid məntəqəsindəki əlaqələndirilmiş işi nəticəsində yük daşımalarında müsbət dinamika müşahidə olunur. “Bu ilin yanvar-oktyabr aylarında yükdaşımaların həcmi 1,4 milyon tona yüksəlib, bu da keçən ilin müvafiq dövrü ilə müqayisədə 31 faiz çoxdur” .

Yazıda diqqətə  çatdırılır ki, “Şimal-Cənub” və “Şərq-Qərb” nəqliyyat dəhlizlərinin Bakı-Tbilisi-Qars (BTQ) dəmir yolu xətti vasitəsilə daha da inkişaf etdirilməsi üçün hər iki ölkənin dəmir yolları mütəxəssisləri əməkdaşlıq edirlər.

Müəllifin deməsinə görə, C.Qurbanov, həmçinin Transsibir magistralının potensialı ilə BTQ-nin “Şərq-Qərb” formatındakı imkanları arasında sinergiya layihəsi haqqında danışıb, bu layihə ilə bağlı hər iki ölkənin dövlət başçılarından tövsiyələr alındığını bildirib.

Müəllifin vurğulamasına görə, C.Qurbanov tərəflərin birgə fəaliyyəti hər iki ölkənin dəmir yollarında tranzit daşımalarının ciddi artımına, nəqliyyat və logistika infranstrukturundan səmərəli istifadəyə səbəb olacağını söyləyib.

Bu qəsəbə hara aiddir?

“Oxu.az”da isə “Bakıda “yiyəsi çıxmayan” qəsəbənin bitməyən su dərdi” sərlövhəli məqalə oxumaq olar.

Müəllif diqqəti Bakının Suraxanı rayonunun Binə qəsəbəsindəki, “Südçülük sovxozu” adlanan ərazidə yaşayan minlərlə sakinin şirin su və yolsuzluq kimi sosial problemlərinə yönəldir.   

Müəllifin deməsinə görə, qəsəbənin uzun illər əvvəl salınmasına baxmayaraq, ərazidə nə su xətti, nə də asvalt yol var.

“Uşaqlar məktəbə suyun içi ilə gedib-gəlir, yaşlı insanların bu yolu gedə bilmir, dəfələrlə yıxılaraq suyun içində qalanlar olub. Uzun illərdir ya pul verib su alırlar, ya da quyu suyu içirlər. Hətta sudan zəhərlənən uşaqlar da olub”, müəlliflər qəsəbə sakinlərinə istinadən bildirir.

Müəllifin deməsinə görə, qəsəbənin dərdi bununla da bitmir, belə ki, buradakı vətəndaşlar hansı inzibati rayonun tabeçiliyində yaşadıqlarından da xəbərsizdirlər.

Yazı müəllifi əlavə edir ki, sakinlər komunal ödənişləri Xəzər rayonuna, digər ödənişləri isə Suraxanı rayonuna ödəyirlər mövcud vəziyyətlə bağlı vətəndaşlar hər iki icra orqanına müraciət etsələr də, heç bir nəticəsi olmayıb. 

Sakinlərə istinadən müəllif deyir ki, problemlərlə bağlı onların müraciətlərinə Suraxanı rayon icra nümayəndələrindən aşağıdakı məzmunda cavab alıblar: “Gedin, hara şikayət edirsiz, edin, nə vaxt pul ayrılacaq, onda problemləri həll edəcəyik”.  

Müəllif deyir ki, Suraxanı rayon icra hakimiyyəti sözügedən u ərazinin Suraxanı rayonu ərazisinə aid  olmadığını  bildirib, Xəzər Rayon İcra hakimiyyəti isə ümumiyyətlə cavab verməyib.   

Müəllif vurğulayır ki, ərazinin tam olaraq hansı rayonun balansında olduğunu öyrənmək üçün Əmlak məsələləri üzrə Dövlət Komitəsilə əlaqə saxlanılıb: “Buradan bildirdilər ki, inzibati ərazi bölgüsünə görə, südçülük sovxozu adlanan ərazi faktiki olaraq Suraxanı rayonunun inzibati ərazisidir”.

Müəllifə görə, aydın olan isə odur ki, məsul icra qurumları nəinki sakinlərin problemləri ilə maraqlanmır, hətta rayonun inzibati sərhədlərini də bilmirlər.  

Bu boğulmaların səbəbi nə?

Yeni Sabah.az”da isə “O vəziyyətdə nəfəs alan 7-30 dəqiqəyə ölər” -məsuliyyətsizliyimiz ucbatından yaşanan faciələr” sərlövhəli məqalə diqqəti çəkir.

Müəllif hər il qış fəslində dəm qazının ölkədə boğulmalara və ölümlərə səbəb olması barədə bu sahədə ekspert Nüsrət Qasımovla söhbətləşir.

Müəllif əlavə edir ki, hər il qışda Azərbaycanda, xüsusilə də Bakıda dəm qazından boğulma halları yaşanır və statistikaya əsasən ilin əvvəlindən bu günə kimi dəm qazından zəhərlənmə ilə bağlı 152 nəfərin xəstəxanalara qəbul olunduqlarını bildirir.

Nüsrət Qasımov isə “yeni sabah”a bildirir ki, zəhərlənmələr ən çox da cihazların düzgün quraşdırılmamasından və yararsız cihazlardan istifadə olunmasından qaynaqlanır.

“Onun da əsas səbəbi məsuliyyətsizlik, diqqətsizlik, qazdan təhlükəsiz istifadə etmə qaydalarına məhəl qoymamaq hallarıdır. Digər səbəbi isə bacaların təmizliyinə nəzarət edilməməsidir. “Ceyran peçləri, rus peçləri - bunlar primitiv cihazlardır və istifadəsi çoxdan qadağa olunmalıdır. Çox təəsüflər olsun ki, bugünkü gündə 800 minə qədər belə cihaz var”.

Müəllif deyir ki, ekspert evlərə verilən qazın zəhərli olması barədə əhali arasında yayılan söz-söhbətləri əsassız adlandırır və hesab edir ki, belə hallar bütün bu standartları gözləməməkdən irəli gəlir.

N.Qasımov daha bir məqama toxunaraq deyir ki, bu ölüm halları mətbuatda müzakirəsi olunmalı, maarfiləndirici tədbirlər yer almalıdır.

Ekspertə görə, müzakirələrdə bu ölüm hallarının baş verməsi, səbəbin harada olması müəyyən edilməlidir.

N.Qasımov deyir ki, bunun səbəbləri araşdırılmalıdır ki, bunu günahkarı ustadırsa həmin usta, hansısa rəsmi və ya qeyri-rəsmi qurumdursa həmin qurumun cavabdeh nümayəndələri qanun qarşısında cavab verməlidir.

“İnsanı Allah yaşamaq üçün yaradıb. Bu hansı səbəbdən ölüb?, Ustalardırmı bunun günahkarı? Dolanışıq dərdindən hərə əlinə bir çemodan alıb deyir ki, mən ustayam. Ustanın lisenziyası, sertifikatı olmalıdır.  Qazdan təhlükəsiz şəkildə cihazların quraşdırıması üçün o, imtahan verməlidir, Bizim ölkədə bunların heç birinə riayət olunmur.  Ona görə də belə zəhərlənmə halları çox olur”, ekspert belə deyir.