Media-icmal 16.05.2021

“Yenisabah.az” saytı “Azərbaycanda hansı nazirliklər ləğv olunacaq?”sərlövhəli məqalədə (https://yenisabah.az/azerbaycanda-hansi-nazirlikler-legv-olunacaq-91434) verilmiş suala cavab axtarılır. Müəllifin deməsinə görə, bu sualın ortaya gəlməsinə səbəb bəzi ekspertlərin Azərbaycanda  dövlət idarəetmə aparatının çox “şişmiş” olması iddiaları ilə bağlıdır.

Müəllifə görə, hazırda Azərbaycanda 17 nazirlik, 7 dövlət xidməti fəaliyyət göstərir. Müəllif müqayisə üçün deyir ki, Almaniyada 11, Gürcüstanda isə 12 nazirlik var.

Müəllif əlavə edir ki, son illər idarəetmədə bəzi dəyişikliklər olsa da paralelçilik, bir-birini təkrar edən dövlət qurumları hələ də fəlaiyyətdədir.

İqtisadçı-ekspert Qubad İbadoğluna görə isə dövlət idarəetməsində maliyyə səmərəliliyi, vətəndaşlara xidmət baxımından  şəffaflıq və məmnunluğu təmin edəcək yeni bir sistemin yaradılmasına ehtiyac var.

O hesab edir ki, Azərbaycanda nazirliklərin sayı 11-ə qədər azaldılmalıdır.

“Sfera.az” saytı isə “Ermənistan parlamentinin bəyanatı ilə bağlı açıqlama: “Bu şikayətlərin nəticəsi olmayacaq” (https://sfera.az/ermenistan-parlamentinin-beyanati-ile-bagli-aiqlama-bu-sikayetlerin-neticesi-olmayacaq/) sərlövhəli məqalədə Ermənistan-Azərbaycan sərhəddindəki gərginlik və Ermənistan  parlamentinin Azərbaycana qarşı qəbul etdiyi birgə bəyanatı dəyərləndirilir.

         Müəllif deyir ki, parlament bu sənədi “Ermənistanın suveren ərazilərinə Azərbaycanın “təcavüzü” iddiası ilə bağlı qəbul edib.  

         Politoloq Məhəmməd Əsədullazadə isə parlamentin bu bəyanatının Azərbaycan-Ermənistan münasibətlərini daha da kəskinləşdirəcəyi düşüncəsindədir. O hesab edir ki, Azərbaycan Ermənistan ərazisinə “təcavüz” etməyib, əksinə Ermənistanla dövlət sərhəddini müəyyənləşdirir, erməni tərəf isə bundan narahatdır.

         Məhəmməd Əsədullazadə deyir ki, elə bu narahatlıqdan irəli gələrək Ermənistan Kollektiv Təhlükəsizlik Müqaviləsi Təşkilatına, Rusiyaya, Avropa İttifaqına şikayət edir, amma bu şikayətlərin nəticəsi olmayacaq. 

         Politoloqa görə, bu sənədin qəbul olunması daxili auditoriyaya hesablanmış addımdır.

Onun deməsinə görə, sərhədlərin müəyyən olunması ilə bağlı təxribatlar Ermənistanda iyun ayında gözlənilən seçkidən öncə də, sonra da baş verə bilər. Məhəmməd Əsədullazadə hesab edir ki, sərhədlərin demilitasiyanın əleyhinə çıxması Ermənistanın ziyanına işləyəcək.

“Müsavat.com”  saytı isə “Zabratın yolları Qəzza zolağna oxşayır, bələdiyyə isə deyir ki,...” sərlövhəli məqalədə Zabrat-2 qəsəbəsinin sosial problemlərindən bəhs edilir.  (https://musavat.com/news/zabratin-yollari-qezza-zolagina-oxsayir-belediyye-ise-deyir-ki-reportaj-fotolar_799973.html).

         Müəllif deyir ki, Bakının Sabunçu rayonu Zabrat-2 qəsəbəsinin Məmmədyarov küçəsinin sakinləri istifadə etdikləri yolun bərbad vəziyyətdə olmasından, nə qədər müraciət etsələr də xeyri olmamasından şikayətçidirlər.

Sakinlər bu yolun vəziyyətini Fələstinin hazırda müharibə gedən Qəzza zolağındakı yolların vəziyyətinə bənzədirlər.

Onların deməsinə görə, nə qədər müraciət etsələr də xeyri yoxdur, magistral yoldan bir az aralı olsalar da yolları ucqar dağ kəndinin yollarına oxşayır.

“Məmmədyarov küçəsi baxımsızlıqdan dağılıb, qışda gölməçələr yaranır, ümumiyyətlə, ilin bütün günlərində keçilməz olur, avtomobillər təmir sexlərində qalırlar”, - sakinlər problemi təsvir edirlər.

Qəsəbə sakinləri iddia edirlər ki, Sabunçu rayon bələdiyyəsinə müraciət etsələr də onlardan məhəllənin yollarının asfaltı üçün maddi vəsait istənilib.

Sakinlər deyirlər ki, Bakıətrafı qəsəbələrin, məhəllədaxili yolların asfaltlanması üçün dövlət proqramı var, büdcədən vəsait ayrılır, bu  küçəyə uzağı 2 maşın asfalt lazımdır, amma əncam çəkilmir. Onlara görə, belə vəiyyətin yaranması məmur laqeydliyinin nəticəsidir.