Media-icmal 16.11.18

Azərbaycanda tolerantlıq ənənələri, bəzi qanun layihələrinə təkliflər, şəhid ailələrinin deputatlara müraciəti və s. məsələlər bugünkü (16 noyabr 2018-ci il) medianın aparıcı mövzularındandır...

Azərbaycan tolerantlığı

"Azərbaycan" qəzeti "Tolerantlığın Azərbaycan modeli" sərlövhəli məqalədə ölkədə tolerantlığın vəziyyətini dəyərləndirir.

Müəllif xatırladır ki, 16 noyabr UNESCO-nun 50 illiyi şərəfinə 1995-ci ildən dünyada Beynəlxalq Tolerantlıq Günü kimi qeyd olunur.

Müəllif hesab edir ki, bu günün təsis olunması bütün dinlərin və xalqların nümayəndələrini bir-birinin dəyərlərinə ehtiram şəraitində yaşamaq məqsədi daşıyır və bu, Azərbaycanda da qeyd olunur.

Yazı müəllifinə görə, xüsusən son onilliklərdə dünyanın müxtəlif yerlərində milli və dini zəmində baş verən qarşıdurmalar, Beynəlxalq Tolerantlıq Gününun təsis edilməsinə səbəb olub.

Məqalə müəllifi deyir ki, heç də hər kəs birgə yaşadığı digər millətin mədəniyyətinə, dininə və s. mənəvi dəyərinə hörmət etmək istəmir, bu da qanlı hadisələrə səbəb olur.

"Azərbaycanda isə vəziyyət fərqlidir, lakin bu fərqli mühit yeni yaranmayıb. Bu mənada ölkəmizi fərqləndirən cəhət ilk növbədə ondan ibarətdir ki, tarix boyu bu coğrafiyada yaşayan bütün dinlərin və etnosların təmsilçiləri bir-birlərinin mədəni və mənəvi baxışlarına sayğı göstəriblər", deyə yazı müəllifi bəhs olunan sahədə Azərbaycandakı vəziyyətin qısa icmalını verir.

Müəllifə görə, Azərbaycanda tolerantlıq ənənəsinin əsası hələ qədim dövrlərdən qoyulub, bu coğrafiyada hər zaman başqa xalqlara və dinlərə sayğı ilə yanaşılıb.

Məqalə müəllifi deyir ki, çağdaş zamanda bu münasibət daha da dərinləşib və nəticədə milli və dini tolerantlığın Azərbaycan modeli formalaşıb və bu, 1993-cü ildə Heydər Əliyevin hakimiyyətə qayıdışından sonra mümkün olub.

Müəllif vurğulayır ki, son 15 ildə Azərbaycanın bir dövlət kimi sürətli inkişaf yolu keçib, dünyaya tanınınb, bu tanınmada tolerantlığın Azərbaycan nümunəsinin öz yeri var.

Müəllif deyir ki, Prezident İlham Əliyev də bu dəyərə toxunaraq, dinlər və məzhəblər arasında dostluq və dözümlülük münasibətlərinin alternativi olmadığını bildirirb: "Bu gün dünyada tolerantlıq örnəyi kimi tanınan Azərbaycan sivilizasiyalararası dialoqun, beynəlxalq sülh və təhlükəsizliyin təmin olunması istiqamətində ardıcıl olaraq zəruri təşəbbüs və çağırışlarla çıxış edir. Son illər ölkəmizdə beynəlxalq humanitar forumların, dünya dini liderlərinin sammitlərinin keçirilməsi, Beynəlxalq Tolerantlıq Gününün böyük məmnuniyyət hissi ilə ayrı-ayrı konfessiyaların nümayəndələrinin iştirakı ilə qeyd olunması, bəşəriyyəti narahat edən qlobal problemlər ətrafında birgə müzakirələrin aparılması bunun bariz nümunəsidir".

Müəllif hesab edir ki, Azərbaycandakı tolerantlıq mühiti bundan sonra daha da möhkəmlənəcək və ölkəmizin yüksəlişinə özünün layiqli töhfəsini verəcək.

Deputat: Bunu etmək olmaz

"Strateq.az"da isə "Deputat Qüdrət Həsənquliyevdən tələb: "Bu, Konstitusiyanın ruhuna ziddir, bunu etmək olmaz" sərlövhəli məqalə oxumaq olar.

Yazıda deputatın "Milli Məclisin daxili nizamnaməsi", "Deputatın statusu haqqında", "Milli Məclisin deputatının etik davranış qaydaları haqqında" qanun layihələrinə edilən dəyişikliklərin müzakirəsi zamanı fikirlərinə yer verilib.

Q.Həsənquliyev diqqəti bu qanun layihələrində deputatın həm başqasının əvəzinə səs verməyə, həm də etik davranış qaydasını kobud formada pozmasına görə mandatdan məhrum olunması üzərinə gətirirərək, burada Konstitusiya müddəasının pozulduğunu bildirir: "2016-cı ildə biz Konstitusiyaya əlavə və dəyişikliklər etdik və bu müddəaları Konstitusiyaya daxil elədik. Amma bu gün qüvvədə olan Konstitusiyada qeyd olunmayıb ki, etik davranış qaydasının kobud formada pozulması, yaxud başqasının əvəzinə səsvermə mütləq intizam məsuliyyəti yaradır", deyə fikrini əsaslandırır.

Deputat deyir ki, başqasının əvəzinə səsvermə səsvermənin nəticələrinin saxtalaşdırılması cəhdidir, etik davranış qaydasının kobud şəkildə pozlulması isə yenə də Cinayət Məcəlləsində "cəmiyyətə açıq formada hörmətsizlikdə ifadə olunan qərəzli hərəkətlər" kimi ifadə edilir: "Hər iki əməl Cinayət Məsəlləsi ilə təqib olunan əməldir və hər iki əməl intizam məsuliyyəti kimi yox, cinayət hüququ qaydasında təqib edilə bilər", deyə deputat bildirib.

Deputata görə, belə olan halda cinayət işi başlanır, toxunulmazlıq hüququ aradan qaldırılır, sonunda məhkəmənin qanuni qüvvəyə minmiş qərarından sonra deputat mandatdan məhrum olunmalıdır və bunu həm də Konstitusiyanın fəlsəfəsi tələb edir.

Elə buna görə Q.Həsənquliyev etik davranış qaydalarını pozan deputatın mandatdan məhrum olunması addımının doğruluğunu şühbhə altına alır və deyir: "Ona görə də, bu gün əvvəlcə hakimlərin intizam məsuliyyətinə cəlb edilməklə vəzifəsindən kənarlaşdırılması praktikasını biz tətbiq elədik, indi də artıq deputatlara bunu tətbiq edirik. Bu, hakimiyyətin bölgüsü prinsipinə, bizim Konstitusiyanın əsas ruhuna ziddir. O baxımdan, mən hesab edirəm ki, biz bu müddəanı daxil edə bilmərik".

"Oxu az" saytında isə "Qənirə Paşayeva telekanallardan narazılıq etdi" sərlövəhli məqalə diqqət cəlb edir.

Məqalədə deputat Qənirə Paşayevanın 2019-cu il üçün dövlət büdcəsinin müzakirəsi zamanı Milli Məclisin plenar iclasındakı çıxışında parlament rəhbərliyini və hökumət üzlərini şəhid ailələrini narahat edən məsələlərə diqqət yetirməyə çağırış olan düşüncələrinə yer verilib.

Belə ki, prezident fərmanı ilə 1992-97-ci illərdə Azərbaycanın ərazi bütövlüyü uğrunda üzvləri həlak olmuş ailələrə 11 min manat birədəflik müavinət ödənilməlidir, amma ailələr bu məsələdə problem olduğunu deyərək, dövlət və kökumət orqanlarına müraciət edirlər. Noyabrın 15-də isə növbəti dəfə Milli Məclis önünə toplanıblar.

"Onlar cənab prezidentdən çox razılıq edirlər. Lakin bu gün onların istədikləri budur: biz də bu vəsaiti almaq istəyirik. Bəziləri deyir almışıq, amma o zamanın şərtlərində həmin vəsaitin dəyəri çox aşağı idi, amma bu gün bu vəsaitin onların həyatı üçün çox önəmli olduğunu deyir və onlara da verilməsini xahiş edirlər.

Bəzi ailələr isə həmin vəsaiti almadıqlarını, onlarla bağlı bir anlaşılmazlığın olduğunu deyirlər, bəziləri isə şəhid ailələri arasında heç bir fərqin qoyulmamasını söyləyirlər. İstəkləri cənab prezidentin şəhid ailələri üçün ayırdığı birdəfəlik ödəmənin onlara da verilməsidir və bu məsələnin həll olunmasını xahiş edirlər", deyə deputat bildirib.

Eyni zamanda, deputat şəhid ailələrinin bir toplantısından bəzi qüvvələrin Azərbaycan əleyhinə istifadə edə biləcəyi xəbərdarlığı edib və bu məsələyə diqqətin artırılmasını istəyib.

Q.Paşayevanın sözlərinə görə, şəhid ailələri deputatlardan hökumət üzvlərinə bu məsələnin müsbət həll olunması üçün təkrar müraciət edilməsini xahiş edirlər.