Media-icmal 18.01.21

Azərbaycanın Cənubi Qafqazda nəqliyyat-kommunikasiya layihələri, Rusiya sülhməramlılarının Azərbaycanın suverenliyini pozması qayğıları,  teatrların fəaliyyətinə icazə verilməməsi ilə bağlı narazılıqlar və s. məsələlər medianın aparıcı mövzuları sırasındadır...

"Azərbaycan" qəzeti  "Azərbaycanın zəfəri regionun iqtisadi inkişafı üçün yeni perspektivlər yaradır" sərlövhəli məqalədə bu il yanvarın 11-də Moskvada keçirilmiş Azərbaycan, Ermənistan və Rusiya dövlət başçılarının üçtərəfli görüşünü və onun nəticələrini dəyərləndirir.

Müəllifə görə, görüşün nəticəsi olaraq regional nəqliyyat –kommunikasiya  sisteminin bərpası ilə bağlı iqtisadi razılaşma imzalandı, bu sistem tam işə düşdükdə Ermənistan Gümrü-Naxçıvan-Mehri-Bakı və İcevan-Qazax-Bakı istiqamətlərində Azərbaycanın nəqliyyat imkanlarından istifadə etməklə öz ticarət dövriyyəsinin 25-30 faizini təşkil edən Rusiya ilə əlaqə yarada bilər.

Əgər ermənilər Qarsdan Gümrüyə dəmiryolu çəkmək istəsələr, xarici mənbələrin hesablamalarına görə, bütövlükdə Qars-Gümrü-Naxçıvan-Mehri-Bakı marşrutu üçün təxmini 434 milyon ABŞ dolları xərcləmək lazımdır.

Qarsdan Naxçıvana və Naxçıvandan Mehri dəhlizi üzərindən Zəngilana planlaşdırılan dəmiryolu xətti həmin layihəni tamamlayır.

Müəllif deyir ki, Ermənistanın Azərbaycan və Türkiyə dəmiryolu xətlərinin inteqrasiyasına qoşulmaq imkanları rəsmi Yerevanın yürüdə biləcəyi rasional siyasətdən asılıdır.

İqtisadçılar isə bildirirlər ki, faktiki olaraq Azərbaycan Aralıq dənizi hövzəsi ilə Xəzər hövzəsinin böyük İpək yolu və "Şimal-Cənub dəhlizi" üzrə daha bir inteqrasiyasına rəvac verir.

Beləliklə, Orta Asiya və Avropa, Türkiyə və Rusiya, İran və Avropa, Türkiyə və Orta Asiya arasında yeni nəqliyyat imkanları yaranır.

"Azpolitika.info.az" saytı isə "Rusiya sülhməramlıları Azərbaycanın suverenliyini pozurlar - narazılıq artır" sərlövhəli məqalədə Rusiyanın Qarabağdakı sülhməramlı qüvvələrinin fəaliyyətini dəyərləndirir.

Müəllif vurğulayır ki, Türkiyə xarici işlər naziri Mövlud Çavuşoğlu ilk növbədə Qarabağdakı Rusiya sülhməramlılarının statusuna dair anlaşmanın imzalanmasını vacib sayır.

M.Çavuşoğluna görə, əsas məsələ Rusiya sülhməramlılarının Laçın dəhlizindən keçidlərə icazə vermək roludur: "Halbuki bunun üçün Azərbaycandan da icazə alınmalıdır. Qarabağ Azərbaycan torpağıdır. Sabah hansısa status-kvo təyin olunsa belə, yenə Azərbaycan sərhədləri daxilində olacaq. Siz sülhməramlı olaraq varsınız, kimlərin gedib-gələcəyi barədə qərar verməyin məsuliyyəti sizdə deyil", deyə M.Çavuşoğlu bildirir.

M.Çavuşoğlu deyir ki, bunun Azərbaycandan icazəsiz edilməməli olduğu Rusiya rəsmilərinin diqqətinə çatdırılıb.

Azəbaycanın politoloqlarına görə, Türkiyə nazirinin bu bəyanatı mövcud problemləri əks etdirir: "Doğrudan da Rusiya sülhməramlıları Qarabağda mandatdankənar fəaliyyət göstərir ki, bu da Azərbaycanın suverenliyini pozur. Laçın dəhlizində Azərbaycan Ordusunun, gömrük və sərhəd qoşunlarının yerləşdirilməsi, giriş-çıxışa nəzarət etməsi vacibdir", deyə politoloqlar problemə diqqət çəkirlər.

"Müsavat.com" saytı "Status "gorbagor" oldu, bəs Moskva üçün, iki fərqli rəy" sərlövhəli məqalədə Rusiyanın Dağlıq Qarabağın status məsələsini yenidən gündəmə gətirə bilməsi ehtimalını dəyərləndirir.

Müəllif yada salır ki, RF Prezidenti Putin "status" məsələsini yeşiyin uzaq küncünə atıb və V.Putindən sitat gətirir: "Bu məsələ gələcək hakimiyyətlərin və proses iştirakçılarının işidir".

Deputat Razi Nurullayevə görə, Azərbaycan üçün Qarabağın statusu məsələsi zibil qutusuna atılıb: "Mənə elə gəlir ki, istər bu il, istər gələn il, istərsə də on il sonra bu məsələ qaldırılacaqsa, Ermənistanla Azərbaycan arasında uzunmüddətli sülhə və stabilliyə nail olmaq mümkün olmayacaq", deyə deputat bildirir.

Onun fikrincə, əgər Rusiya Azərbaycanla Ermənistan arasında münaqişənin həllini istəyirsə, status məsələsini birdəfəlik zibil yeşiyinə tullamalıdır, əksinə, yenə də Qarabağ kartını əlində saxlayaraq, regionda bundan bir riçaq kimi istifadə etmək istəyəcəksə, o zaman artıq bu, qəbuledilməz olacaq.

Politoloq Əziz Əlibəyli isə hesab edir ki, Dağlıq Qarabağın statusu ilə bağlı Putinin dediyi ifadə ermənilərə təsəllidən başqa bir şey deyil və bu məsələ bağlanıb.

Politoloqa görə, həm də V.Putin "status məsələsi"ndən danışmaqla ABŞ-Fransa ikilisinin  Qafqaza gələ bilməsini aradan qaldırmaq üçün status ifadəsindən əbədi imtina etdi.

"Moderator.az" saytında isə "Aktyorlardan Operativ Qərargaha "üsyan": "Bəs bizim səsimizə kim səs verəcək...?" sərlövhəli məqalədə teatrların bərpa olunmamasına etiraz münasibəti ifadə edilir.

Əməkdar artist, Bakı Uşaq və Gənclər Teatrının direktoru İntiqam Soltan hazırki durumda teatrların fəaliyyətinin dayandırılmasını absurd hesab edir.

Aktyorun fikrincə, belə bəzi hallarda teatra adi bir şey kimi baxılır, unudurlar ki, teatr həyat məktəbidir, maarifləndirmə ocağıdır: "...bu qərarlar teatra yaxın olmayan insanlar tərəfindən verilir", deyə aktyor səbəbi göstərir… Bu qərarlar teatrlara deyil, cəmiyyətimizə, milli, öyündüyümüz türk mədəniyyətinə zərbə vurmaqdan başqa bir şey deyil", deyə İ.Soltan vurğulayır.

Əməkdar artist, rejissor Nicat Kazımov isə teatrlarda  məşq prosesinin bərpa olunmasını zəruri hesab edir.

O, həmçinin əlavə edir ki, Nazirlər Kabinetində bu qərarları verən şəxslərdən xahiş etmək olar ki, teatrları da nəzərə alsınlar: "Məşq prosesinə icazə versinlər. Teatrların hazırki durumu sadəcə dözülməzdir. Çox istərdim ki, ən azından tamaşaların məşq prosesi bərpa olunsun".