Media-icmal 18.08.20

Karantin rejiminin yumşaldılmasının səbəbləri, uşaqpulu ətrafında və yeni tədris ilinin təşkili ilə bağlı müzakirələr və s. medianın aparıcı mövzuları sırasındadır.

“Azərbaycan” qəzeti  “Azərbaycanda normal həyata keçid sürətlənib” sərlövhəli məqalədə müəllif COVİD-19 pandemiyası ilə bağlı ölkədəki vəziyyəti dəyərləndirir.

Müəllif deyir ki, dünya ölkələri kimi Azərbaycan da imkanlarını COVID-19-a qarşı səfərbər edib, dövlət sanitar-epidemioloji vəziyyətin nəzarət altında saxlanılması üçün tədbirləri davam etdirir.

Müəllif əlavə edir ki, səhiyyə sisteminin pandemiya şəraitinə uyğunlaşdırılması, tibbi vəsaitlərlə təchizat, modul tipli xəstəxanaların istifadəyə verilməsi, ən müasir laboratoriyaların quraşdırılması və s. pandemiyaya qarşı uğurlu mübarizəyə imkan yaradıb.

Hazırda koronavirusa yoluxan 31 mindən çox vətəndaşımız müalicə olunaraq sağalıb, virusun erkən aşkarlanması üçün aparılan testlər sürətləndirilib, bu həftədən isə seroloji testlərin keçirilməsinə başlanılacaq.

“Layihəyə Bakı şəhərindən başlanılacaq və 1500-ə yaxın şəxs tədqiqata cəlb olunacaq. Daha sonra bunun Sumqayıt və Gəncə şəhərlərində həyata keçirilməsi nəzərdə tutulur”.

Müəllifin deməsinə görə, son zamanlar gündəlik yoluxma halında ardıcıl kəskin azalma müşahidə olunur, iyul ayının əvvəlində gündəlik 500-dən çox yoluxma qeydə alınırdısa, hazırda yoluxan insanların sayı 100, hətta ondan da aşağı olur.

Odur ki, bu müsbət dinamika nəzərə alınaraq sərtləşdirilmiş karantin rejimində yumşalmalar tətbiq olunur, belə ki, avqustun 5-dən SMS icazə sistemi ləğv edildi, çimərliklər açıldı, qeyri-ərzaq sahələrinin fəaliyyətinə icazə verildi. Bu gündən isə ictimai iaşə obyektlərində müştərilərə açıq hava şəraitində karantin qaydalarının gözlənilməsilə xidmətə icazə verilir.

Müəlif  son olaraq qapalı yerlərdə maskadan istifadə edilməsi, sosial məsafənin saxlanılması, şəxsi gigiyena qaydalarına riayət olunmasının normal həyata dönüşü daha da sürətləndirə biləcəyini vurğulayır.

“Yenisabah.az”  “Uşaqpulu ilə bağlı mühüm qərar veriləcək” sərlövhəli məqalədə isə müəllif ətrafında müzakirələr gedən məsələ barəsində deputat Vahid Əhmədovla söhbətləşir.

Deputatın deməsinə görə, Azərbaycanda uşaqpulunun verilməsi ilə bağlı müzakirələr reallaşa bilər.

V.Əhmədov əlavə edib ki, hazırda bu məsələ Milli Məclisdə müzakirə mərhələsindədir: "Belə bir fikir var ki, ünvanlı dövlət sosial yardımı və digər yardımlar verilir. Ona görə də, uşaqpulu verilməsə də olar, Amma elə müavinətlər var ki, onları verməmək də olar, uşaqpulu isə mütləq verilməlidir”.

Deputat deyir ki, ünvanlı dövlət sosial yardımı bütün ehtiyacı olan ailələri əhatə etmir, bununla bağlı müəyyən çatışmazlıqlar var, ünvanlı sosial yardımın verilməsi ilə bağlı insanlardan çoxlu şikayətlər daxil olur.

V.Əhmədov vurğulayıb ki, artıq uşaqpulunun verilməsi ilə bağlı Milli Məclisdə komissiya yaradılılb: "Biz həmişə bu məsələni gündəmdə saxlamışıq. Çalışacağıq ki, uşaqpulu ilə bağlı müzakirələr müsbət həllini tapsın. Amma bu, təkcə bizimlə bağlı olan məsələ də deyil”.

Deputata görə, uşaqpulu məsələsi ilə bağlı Əmək və Əhalinin Sosial Müdafiəsi Nazirliyi də hesablamalar aparır. Onlar aztəminatlı ailələrdə uşaqlara verilən yardımları əsas gətirirlər: “Ünvanlı yardımın verilməsi yaxşıdır, amma nəzərə almaq lazımdır ki, ünvanlı yardım birinə düşür, birinə düşmür. Biz rayonlarda qəbulda olanda da bunu görürük ki, ünvanlı yardımı ala bilməyən, amma ehtiyacı olan nə qədər ailələr var".

V.Əhmədov uşaqpulunun verilməsində yaş məsələsinin müzakirə olunduğunu bildirib. O deyib ki, bəzi təkliflərdə uşaq pulunun əvvəlcə 7-8 yaşadək, sonra 17-18 yaşınadək verilməsi müzakirə olunur: "Bu, dövlətin büdcəsindən, imkanından asılı olan məsələdir", - deputat əlavə edib.

“Arqument.az ”  saytı “Yeni təhsil nazirindən dərslər barədə açıqlama” sərlövhəli məqalədə yeni tədris ilinin təşkili məsələsinə toxunulur.

Müəllif deyir ki, tədrisin necə təşkili, yəni, distant, yoxsa ənənəvi şəkildə keçirilməsi barədə hələ qərar yoxdur.

Hətta təhsil naziri Emin Əmrullayev avqustun 17-də Milli Məclisin Elm və Təhsil Komitəsi üzvlərinin iştirakı ilə keçirilən onlayn konfransda da bu barədə bildirib: “Hazırda üzləşdiyimiz vəziyyət kifayət qədər mürəkkəbdir", - nazir qeyd edib.

Müəllifə görə, təhsil naziri Emin Əmrullayev vurğulayıb ki, ölkə rəhbərliyinin bu dövrdə diqqət yetirdiyi əsas məsələ ilk növbədə insanların sağlamlığının qorunmasıdır.

E.Əmrullayev nazirlik tərəfindən normal şəkildə təhsilə davam ediləcəyi təqdirdə COVİD-19-a yoluxma sürəti ilə bağlı araşdırmaların nəticələri barədə məlumat verib.

Nazir təhsil adi qaydada, ənənəvi şəkildə davam edərsə, insanların hərəkətlilik səviyyəsinin nəzərə alınmasının vacibliyini vurğulayıb.

Üstəlik, nazir əlavə edib ki, bunun müəyyən risklər yarada biləcəyi də istisna deyil.

E.Əmrullayev növbəti tədris ili üçün təhsil müəssisələrinin fəaliyyətinin bərpası ilə bağlı Təhsil İnstitutunun verdiyi təklifləri də diqqətə çatdlrlb.

Onun deməsinə görə, "yaşıl”, "sarı”, "narıncı” və "qırmızı” zonalarda təhsilin bütün davamiyyət formaları barədə araşdırmalar aparılıb və təkliflər verilib. 

Xatırladaq ki, COVİD-19 pandemiyası ilə bağlı Azərbaycann tədris sistemində fəaliyyət 2020-ci ilin martından dayandırılıb, ali, orta və orta ixtisas məktəblərdə, kolleclərdə  dərslər keçirilmir. Dərslər televiziya vasitəsilə yayımlanmağa başlayıb.