Media-icmal 18.12.18

Azərbaycanın yol infrastrukturu, ölkədə AES tikintisinə ehtiyac olub-olmaması, yeni il ərəfəsi ərzaq mallarının bahalaşması ehtimalı və s. məsələlər bugünki (18 dekabr, 2018-ci il) medianın aparıcı mövzularındandır...

MDB-nin ən yaxşı yolları

"Azərbaycan"qəzeti "Dünyada 34-cü, MDB-də birinci" sərlövhəli məqalədə Azərbaycanda yol infrastrukturunun inkişafını dəyərləndirir.

Yazı müəllifi Azərbaycanı rahat və müasir dünya standartlarına cavab verən avtomobil magistralları, körpüləri, yol qovşaqları, keçidlər ölkəsi adlandıraraq deyir ki, Dünya İqtisadi Forumunun "Qlobal Rəqabətlilik Hesabatı"na görə, ölkə yolların keyfiyyət indeksinə görə dünyada 34-cü, postsovet məkanında isə birincidir: "Azərbaycanın dünyanın 140 ölkəsi arasında yol infrastrukturunun keyfiyyət indeksi üzrə 34-cü pilləyə yüksəlməsi sıradan bir fakt deyil. Bu, Prezident İlham Əliyevin rəhbərliyi ilə ölkəmizdə aparılan yenidənqurma tədbirlərinin və onun tərkib hissəsi olan yol infrastrukturunun təkmilləşdirilməsinin nəticəsidir", deyə müəllif əldə edilən nəticəni dəyərləndirir.

Müəllif deyir ki, Azərbaycanda 2018-ci ildə də yol tikintisi sahəsində bir sıra layihələr icra edilib, ilin əvvəlində ən azı 600 kəndi birləşdirəcək 2000 km-dən çox avtomobil yolu çəkilməsi nəzərdə tutulurdu.

Müəllifin sözlərinə görə, həmin çərçivədə uzunluğu 452,1 km olan respublika əhəmiyyətli 12, Bakı şəhəri üzrə uzunluğu 107,8 km olan 13 və uzunluğu 1534,9 km olan 67 kəndlərarası avtomobil yolları və 2 körpü bərpa olunub: "Bütün bunlar isə 702 yaşayış məntəqəsində yaşayan 2,7 milyon nəfər əhalinin 2050 km rahat avtomobil yollarından istifadə etməsi deməkdir".

Müəllif cari ilin 9 ayı ərzində ölkənin 23 rayonunda 54 layihənin icra olunduğunu, 12 ölkə əhəmiyyətli, 37 kəndlərarası avtomobil yollarının tikinti və yenidən qurulmasının başa çatdırıldığını, bu dövrdə ümumi istifadədə olan 9 körpünün də təmir edildiyini bildirir.

Məqalə müəllifi deyir ki, bütün bu quruculuq sahəsində Azərbaycanın dəmir yolları kimi avtomobil yolları da beynəlxalq əhəmiyyətli qovşağa çevrilir.

Bunun üçün beynəlxalq əhəmiyyətli "Şimal-Cənub" dəmir yolu ilə yanaşı, magistral avtomobil yollarının tikintisi və yenidən qurulması da sürətlənir. Artıq bu istiqamətdə Bakı-Quba-Rusiya Federasiyası ilə dövlət sərhədi yeni avtomobil yolunun tikintisinə start verilib.

"Azərbaycan enerji bazarına girmək" təklifi

"Yeni Müsavat" qəzetində "Əli Məsimli: Azərbaycanın AES-ə ehtiyacı yoxdur" sərlövhəli məqalə oxumaq olar.

Müəllif bu günlərdə Rusiyanın "Rosatom" dövlət şirkətinin Azərbaycanda Atom Elektrik Stansiyası (AES) tikintisi də daxil olmaqla, nüvə enerjisindən dinc məqsədlərlə istifadə sahəsində əməkdaşlıq təklifi barədə deputat, Milli Məclisin İqtisadi siyasət, sənaye və sahibkarlıq komitəsinin üzvü Əli Məsimli ilə söhbətləşir.

Ə.Məsimli deyir ki, Azərbaycanda AES tikilməsi səyləri hələ sovet dönəmində də olub, amma bu və ya digər səbəb üzündən baş tutmayıb, indiki halda isə Rusiyanın təklifi qazanc və strateji səmərə əldə etmək məqsədi güdür.

Deputata görə, bu tikinti kifayət qədər bahalı tikintidir, indiki halda bunun Azərbaycana neçəyə başa gələcəyini söyləmək çox çətindir, bu, reaktorun gücündən, alınan avadanlıqların keyfiyyətindən və s. asılıdır: "Bir reaktorun dəyəri 2-5 miyard dollar arasında dəyişə bilir. Rusiyanın Belarusda tikmək istədiyi AES-in dəyəri 6 milyard dollar dəyərləndirilir, digər xərclərlə birlikdə isə bu rəqəm 9 milyard dollara da qalxa bilər. AES Özbəkistana 11 milyard dollara başa gələcək, amma şərtlər tam açıqlanmır. Rusiyanın Türkiyədə tikdiyi AES-in dəyəri 20-22 milyard dollar arasında dəyərləndirilir və s.".

Ə.Məsimli 2011-ci ildə Yaponiyadakı zəlzələdən sonra Fuksişima AES-də sızma ilə bağlı dünyanın AES tikintisindən geri çəkildiyini söyləyib.

Azərbaycanda belə bir tikintinin nə dərəcədə zəruri olmasına gəlincə, deputat hesab edir ki, buna zərurət yoxdur.

Deputat bunu ölkənin kifayət qədər karbohidrogen ehtiyatlarına, bərpa olunan enerjidən istifadə imkanlarına malik olması ilə əsaslandırır: "Azərbaycanda 6 trilyon kubmetr qaz və 4 milyard ton neft ehtiyatı var. İndiyə qədər dünya bazarına çıxarılan neftin həcmi 482 milyon ton olub".

Digər tərəfdən, Ə.Məsimli deyir ki, AES-ə texnoloji, tullantıların xaric edilməsi və s.sahələrdə xidmət göstərə biləcək ölkələrə müraciət etmək onlardan asılı vəziyyət yaradacağı üçün hazırda Azərbaycanda AES inşasına ehtiyac yoxdur.

Ə.Məsimli hesab edir ki, bu yolla həm də Rusiya Azərbaycanın energetika bazarına girə bilər, üstəlik, bu enerji növünün fəlakətlərindən sığortalanma halı, hələ ki, yoxdur.

Qiymət bir dəfə qalxdımı...

"Moderator.az" da isə "Bayram öncəsi qiymət artımları obyektiv yox, subyektiv amillərdən qaynaqlanır" sərlövhəli məqalə diqqət çəkir.

Müəllif yeni il bayramının yaxınlaşması ilə ərzaq mallarının qiymətlərinin bahalaşa biləcəyi ehtimallarının artdığını bildirir.

Elə bundan da irəli gələrək, bu ehtimalın nə dərəcədə reallığa uyğun ola bilməsi barədə müəllif Milli Məclisin deputatı Vahid Əhmədovun düşüncələrinə yer verir.

"Moderator.az"a açıqlamasında deputat diqqəti belə məqama yönəldir ki, bayram qabağı qiymətlərin bahalaşması bundan əvvəllər də baş verib.

"Bayram öncəsi qiymət artımı, demək olar ki, həmişə müşahidə olunur. Novruz bayramında da, Yeni ildə də bu cür qiymət artımları olur. Bu, obyektiv yox, subyektiv səbəblərdən qaynaqlanan bir haldır".

V.Əhmədov deyir ki, sahibkarlar imkan olan kimi qiymətləri qaldırırlar və bu qiymətlər bayramdan sonra da aşağı düşmür, burada məsələnin maraqlı tərəfi də elə budur.

Deputat hesab edir ki, bu həm də onun nəticəsidir ki, qiymət tənzimlənməsi bir növ xaotik şəkildə həyata keçirilir.

V.Əhmədov vurğulayır ki, bazar iqtsiadiyyatında qiymətlər tənzimlənmir, müəyyən strateji əhəmiyyətli məhsulların qiymətləri istisna olmaqla, qalan məhsulların qiymətini bazar müəyyən edir.

Amma deputata görə, müəyyən qədər də olsa, bu sahəyə diqqəti artırmaq lazımdır: "Xüsusilə ərzaq, geyim, dərman məhsullarının qiymətinə nəzarət etmək lazımdır ki, burada qiymət artımı obyektiv olsun. Təəssüf ki, bu gün subyektiv amillərdən doğan qiymət artımı var", deyə V.Əhmədov bildirir.