Media-icmal 19.01.19

Özünüməşğulluq proqramının icrası, prezident fərmanına ekspert şərhi, Avropa-Azərbaycan münasibətləri və s. məsələlər bugünki (19 yanvar, 2018-ci il) medianın aparıcı mövzularındandır...

İqtisadi inkişaf təkanına dönəcək proqram

"Azərbaycan" qəzeti "Məşğulluq probleminin həllinin daha bir uğurlu yolu" sərlövhəli məqalədə əhalinin özünüməşğulluq proqramının əhəmiyyətini dəyərləndirir.

Müəllif əhalinin məşğulluq probleminin dövlətin diqqətində olduğunu deyir, 2018-ci ildə ölkədə 118 min daimi iş yerinin açılmasını, yeni iş yerləri əldə etmək üçün istehsal sahələrinin genişləndirməsini bu diqqətin göstəricisi adlandırır.

Yazıda vurğulanır ki, dövlət çətin durumda olan vətəndaşları özünüməşğulluq proqramı ilə dəstəkləyir, yaxşı şərait qurmaq imkanı verir, bu proqram vətəndaşlar üçün əlverişli qazanc formasıdır: "Belə ki, hər ailənin öz büdcəsi olur, bunun sayəsində də müəyyən iş qura bilirlər. Əlbəttə, dövlətin köməyi ilə", müəllif proqramın mahiyyətini ifadə edir.

Müəllif deyir ki, Nazirlər Kabinetinin 2018-ci ilin sosial-iqtisadi inkişafının yekunlarına həsr olunan iclasında da bu məsələ haqda danışılıb, bu proqramın il ərzində 6,5 dəfə genişləndiyi, 7267 nəfərin biznes planlarını uğurla müdafiə etdiyi, 5000-dən çox ailənin aktivlərlə təmin olunduğu və kiçik ailə təsərrüfatlarını yaratdıqları vurğulanıb.

Yazıda deyilir ki, qeyri-neft sektorunun kənd təsərrüfatı sahəsində özünüməşğulluğun inkişafı üçün geniş imkanlar var, kənd yerlərində çox ailələr heyvandarlıqla, quşçuluqla, arıçılıqla, bağçılıqla, tərəvəzçiliklə məşğul olur, dövlət onlara maddi dəstək verir.

Müəllifə görə, bu proqram bəzi vətəndaşları ələbaxımlıqdan çəkindirməklə yanaşı, həm də iqtisadi inkişafa təkan verəcək, xüsusilə regionlarda məşğulluq probleminin həllini sürətləndirəcək.

Məqalə müəllifi deyir ki, əgər hər il 6-7 min insan bu proqrama cəlb olunarsa, bir neçə ildən sonra sosial yardıma da ehtiyac qalmayacaq, insanlar öz halal zəhmətləri ilə pul qazanacaq, ailələrini saxlayacaqlar, proqram özü isə ölkə iqtisadiyyatının inkişaf amillərindən birinə çevriləcək.

Müəllif isə sonda məqaləni bu məsələ ilə bağlı dövlət başçısı İlham Əliyevdən sitat gətirməklə tamamlayır: "Bu il ən azı 7 min ailə bu proqramdan faydalanacaq. Bu gün onların arasında, əlbəttə ki, ünvanlı sosial yardım alanlar da var. Beləliklə, o kateqoriyadan olan insanlar dövlətin dəstəyi ilə artıq özləri pul qazanacaqlar, öz ailə büdcələrini quracaqlar. Özünüməşğulluq proqramının çox böyük sosial və iqtisadi faydası var".

Mənzilləri də ictimai nəzarətə götürülsün...

"Bizimyol.info.az" da isə "Məmurların mənzillərini də ictimai nəzarətə götürmək lazımdır" sərlövhəli məqalə oxumaq olar.

Sayt dövlət başçısı İlham Əliyevin idarəetmənin optimallaşdırılması və sturktur islahatları çərçivəsində dövlət qurumlarında xidməti avtomobillərdən istifadə ilə bağlı fərmanı haqda iqtisadçı-ekspert Rövşən Ağayevin şərhinə yer verib.

Ekspertin sözlərinə görə, fərmana əsasən xidməti maşınların sayının azalacağı görünür: "Bir müddət əvvəl 10 il ərzində dövlət büdcəsindən xidməti maşınlara sərf olunan xərclərin məbləğini paylaşmışdım və söhbət 700-800 mln. dollardan gedirdi", deyə R.Ağayev bu sahəyə xərclənən dövlət vəsaitlərinin məbləği barədə bildirir.

Bu fərmanı əsaslı sayan iqtisadçı deyir ki, amma məsələ məmurların təkcə xidməti maşınlarını deyil, şəxsi avtomobillərini, hələ üstəlik yaşadığı mənzilləri də ictimai nəzarətə götürməyə imkan verməlidir: "Söhbət bütün normal ölkələrdə olduğu kimi, vəzifəli şəxslərin gəlir və əmlak bəyannaməsi mexanizminin tətbiqindən gedir. Çünki, ayda 1500 manat maaşa qulluq edən məmurların hətta 30 min dollarlıq maşında gəzməsi, 70-80 min dollarlıq evdə yaşaması belə onun əliəyriliyinin ilk işartısıdır".

Ekspert vurğulayır ki, Azərbaycanda gəlir bəyannaməsilə bağlı qanun hələ 14 il əvvəl, 2015-ci ildə qəbul olunsa da, bu günə qədər bircə maddəsi belə işləməyib.

Ekspert həm də deyir ki, bu qanunda nəzərdə tutulandan fərqli olaraq, bütün məmur bəyannamaləri ictimaiyyət üçün açıq olmalı, hər kəsin, məmurların və seçkili rəsmilərin şəxsi qazancları, varidatı barədə xalqın xəbər tutmaq imkanı olmalıdır. "İslahat deyiriksə, real olanlardan biri məhz budur", deyə ekspert mövqeyini ifadə edir.

Xatırladaq ki, prezident İlham Əliyev bu günlərdə növbəti fərmanlardan birini imzalayıb. Həmin fərmana görə, mərkəzi və yerli icra hakimiyyəti orqanlarında, dövlət adından yaradılan publik hüquqi şəxslərdə və səhmlərinin (paylarının) nəzarət zərfi dövlətə məxsus olan hüquqi şəxslərdə xidməti nəqliyyat vasitələri ilə təmin edilməli vəzifələrin siyahısı ölkə prezidenti ilə razılaşdırılmalıdır.

Fərmanın 8.7.1-ci yarımbəndinə əsasən, müəyyən olunacaq siyahıdan kənarda qalan vəzifələrdə işləyən şəxslərə xidmət edən xidməti nəqliyyat vasitələri mərkəzi və yerli icra hakimiyyəti orqanlarının, dövlət adından yaradılan publik hüquqi şəxslərin və səhmlərinin (paylarının) nəzarət zərfi dövlətə məxsus olan hüquqi şəxslərin balanslarından çıxarılaraq özəlləşdirilməsi üçün Əmlak Məsələləri Dövlət Komitəsinə təqdim edilməsi təmin edilməlidir və nəticəsi barədə prezidentə məlumat verilməlidir.

Avropaya yaxınlaşdıran islahatlar zəruriliyi

"Yeni Müsavat"qəzetində isə "Bizi Avropaya yaxınlaşdıran islahatların aparılması zəruridir - Fazil Mustafa" sərlövhəli məqalə diqqət cəlb edir.

Müəllif yanvar ayının 21-də başlaycaq Avropa Şurası Parlament Assambleyasının qış sessiyası fonunda deputat Fazil Mustafa ilə Avropa Azərbaycan münaibətləri barədə söhbətləşir.

Müəllif sessiyaya gedəcək Azərbaycan nümayəndə heyəti, sessiya çərçivəsində müzakirə ediləcək məsələlərin əhatə dairəsi barədə məlumat verir.

F.Mustafa "Yeni Müsavat" qəzetinə öncə onu deyir ki, AŞPA-nın qış sessiyası gündəliyində Azərbaycanla bağlı hər hansı fundamental məsələnin ayrıca müzakirəsi yoxdur, amma müəyyən epizodlarda ölkə ilə bağlı da fikirlər səsləndirilə bilər.

Müəllifin bir neçə gün əvvəl Avropa Parlamentində Azərbaycana qarşı qətnamə qəbul edilməsi, belə halların olmaması üçün ölkə daxilində islahatların hansı istiqamətdə getməsi barədə sualına cavab olaraq F.Mustafa deyir ki, ölkə daxilində Azərbaycanı bütün sahələrdə Avropa standartlarına yaxınlaşdıran islahatların aparılmasını zəruri sayır: "İlk növbədə ölkədə məhkəmə ədalətinin real məzmun almasını, mülkiyyət qəsbçiliyinin qarşısının alınmasını və inhisarçılıq elementlərindən yaxa qurtarılmasını önə çəkərdim".

F.Mustafa müəllifin Azərbaycanla Avropa İttifaqı arasında bu il saziş imzalanmasının gözlənildiyini, amma bir sıra hallarda tərəflər arasında məhbuslarla bağlı problemlər yaşandığını deyir, bunu aradan qaldırmaq üçün böyük amnistiya, yaxud əfvin verilməsi istiqamətində addımlar gözləniləməsi ilə bağlı sualı da cavablandırır.

Deputat deyir ki, Avropa İttifaqı ilə əlaqələr Azərbaycan üçün yenə də prioritet siyasi kurs olaraq qalır və bundan sonra da qalmalıdır:

F.Mustafaya görə, söhbət yalnız bir dünya nəhəngi ilə hansısa formada əməkdaşlıq bağlarından deyil, bilavasitə faydalı modern dəyərlərin mənimsənilməsindən gedir: "Vaxtilə Avropaya qapalı sərhədlər əngəlinə görə çıxışımız olmayanda Rusiya mədəni mühitindən qazanılan dəyərlər nə dərəcədə bizim tərəqqimizə faydalı olmuşdursa, indi bu faydalılığı əlçatan Avropa dəyərlərindən mənimsəməyə çalışmalıyıq".

Deputat hesab edir ki, bu səbəbdən də Avropa İttifaqı ilə bağlanan hər bir sənədin mühüm önəmi var: "Çünki oldun dəyirmançı, çağır gəlsin dən, Koroğlu" deyimində olduğu kimi, əgər əməkdaşlıq üçün addımlar atmağı vacib hesab ediriksə, o halda hər hansı bəhanələrə də rəvac verməmək barədə ciddi düşünməliyik. Mən də bu cür bəhanələrə nöqtə qoyacaq humanist addımın atılmasını çox arzulayıram".