Media-icmal 19.05.21

“Bizimyolinfo.az”  saytı “Gürcüstanda barışıq əldə olundu: Bizə qarşı daha nələr hazırlanır” sərlövhəli məqalədə mayın 16-da və 17-də Dmanisi rayonunda svanlarla azərbaycanlılar arasında baş vermiş qarşıdurmanın səbəb və nəticələri dəyərləndirilir.

Tərəflər arasında ağsaqqalların, din xadimlərinin vasitəçiliyilə barışıq yarandığı deyilir, amma bu, son sayılmır: “Əslində təhlükə tam sovuşubmu, bilmək olmaz. Ayıq-sayıq dayanmaqda fayda var”.

Həm də hadisələrə hazırda dünyanın ayrı-ayrı bölgələrində baş verən bu və ya digər çaplı qarşıdurmaların tərkib hissəsi kimi baxılır. Bu hadisələrin törənməsində bəzi güclərin rolu olduğu iddia edilir. Səbəb kimi də bir sıra beynəlxalq güclərin  maraqlarının toqquşması hesab olunur. “Yenə qeyd etməkdə fayda var ki, bu, son olmaya bilər. Savaşlar masa üzərində və gizli qapılar arxasında davam edir” deyə bu proseslərin hələ son nəticəyə çatmadığı bir daha vurğulanır.

“Redaktor.az”  saytı isə “Azərbaycanda banklarla bağlı vacib xəbər – yeniliklər edilə bilər” sərlövhəli məqalədə isə bankomatlar vasitəsilə pul nağdlaşdırılarkən müştəridən faiz tutulması dəyərləndirilir.

Məqalədə vurğulanır ki, Azərbaycanda bankomatlarda nağdlaşdırma əməliyyatı zamanı banklar müştərilərindən yüksək məbləğdə komissiya haqqı tutur, nağdlaşdırılmanın həcmi artdıqca komissiyanın məbləği də artır.

Amma Azərbaycandan fərqli olaraq qonşu Türkiyə və Gürcüstan artıq bu təcrübədən imtina edib.

İnkişaf etmiş ölkələrdə fərqli praktika olduğu üçün bəzi ölkələrdə banklar öz aralarında razılığa gələrək komissiya haqqı tutmurlar.

Türkiyədə bütün bankların birgə bankomatları olduğu diqqətə çatdırılır, ümumi sayılan bu bankomatlardan pul çıxararkən heç bir faiz tutulmur.

Artıq Gürcüstanda da banklar arasında bu sistemə keçidlə bağlı razılıq əldə olunub. Burada müştəri öz bankının bankomatından pul çıxararkən ondan, ümumiyyətlə, pul çıxılmır. Azərbaycanda da kommersiya bankları belə razılığa gələ bilərlər.

“Müsavat.com”  saytı “Turizmin qızıl qaydası- müştərini yolan batacaq”  sərlövhəli məqalədə turizm sahəsində uğur qazanmağın yolları barədə bəhs edilir.

Məqalədə vurğulanır ki, dünya ölkələri postpandemiya dövrü üçün yeni proqramlar, mexanizmlər hazırlayır, bəziləri turizm sahəsini prioritet seçirlər.

Belə hesab edilir ki, hazırda dünyada böyük bir turizm rəqabəti başlayıb.

Son illər Azərbaycanda da turizm sahəsinə böyük əhəmiyyət verildiyi, işğaldan azad edilmiş Qarabağda da turizm infrastrukturlarının qurulmasına başlanıldığı vurğulanr.

Həm də deyilir ki, Azərbaycanda  turizmin problemlərinin olması təkcə pandemiya ilə bağlı deyil, uzun illərdən bəri tənqid edilən anormal fəaliyyət prinsiplərinin nəticəsidir.

Bu sahədə turizm qurumları uğur qazanmaq istəyirlərsə, yanlış siyasətlərini dəyişməlidirlər: Yanlış siyasət deyəndə isə müştərilərə gecələmək, qidalanma, xidmət üçün dəyərindən qat-qat baha qiymətlərin təklif edilməsi nəzərdə tutulur.

Bu barədə uzun illərdir deyilir ki, anormal qaydalarla turizm mərkəzlərinin inkişafı mümkün deyil, indi buna əyani şahid olurlar.

Belə hesab edilir ki, Azərbaycanda turizmin normal inkişafı üçün Türkiyə və Gürcüstanın təcrübəsini öyrənmək yetərlidir.

“Modern.az”  saytı isə “Qərb ölkələri "Zəngəzur dəhlizi"nin tezliklə açılmasını istəyir” sərlövhəli məqalədə “Zəngəzur dəhlizi” layihəsinin reallaşdırıla bilməsini şərh edir.   

Deyilir ki, bu dəhlizin reallaşması üçün hüquqi əsası İkinci Qarabağ Müharibəsinin nəticəsi olaraq 2020-ci il noyabrın 10-da imzalanmış üçtərəfli və 2021-ci il yanvarın 11-də imzalanmış bəyanatlar yaradıb. Bəyanatda görə, kommunikasiyanın bərpasının 1 mart tarixindən reallaşacağı qeyd olunurdu, həmçinin bu dəhlizin açılmasında Qərb ölkələrinin də maraqlı olduqları deyilir.

Məqalədə vurğulanır ki, dəhlizin açılması Azərbaycan, Türkiyə, Rusiya, hətta Ermənistanın da maraqlarına xidmət edir, iqtisadi əlaqə coğrafiyasını daha da genişləndirir.

Vurğulanır ki, "Zəngəzur dəhlizi"ndə keçəcək dəmir yolunun Qərb üçün də önəmi böyükdür, belə ki, Misirin Süveyş kanalında baş verən gəmi qəzasının beynəlxalq yükdaşımalara vurduğu ziyan Avropanın "Zəngəzur dəhlizi"nin tezliklə açılmasına marağını artırıb. Ona görə də regional və beynəlxaq ölkələr üçün də bu yol ticarət dövriyyəsinin asanlaşmasına kömək edə biləcək.

Sadəcə, Avropa ölkələrindən gələn mesaj budur ki, əməkdaşlıq qarşılıqlı razılaşma və güzəştlər əsasında olsun, bütün tərəflər qazanc əldə etsin.