Media-icmal 20.05.20

Ölkədə ərzaq təhlükəsizliyinin təmin olunması, məhkəmə sisteminin fəaliyyəti, bank sisteminin çətinlikləri, xüsusi karantin rejiminin yumşaldılmasına baxış və s. məsələlər medianın aparıcı mövzuları sırasındadır.

Rəsmi “Azərbaycan” qəzeti “Aqrar sahənin inkişafı ərzaq təhlükəsizliyini təmin edir” sərlövhəli məqalədə ölkədə aqrar sahənin inkişafını dəyərləndirir.

Hər bir ölkənin inkişafında həyata keçirilən islahatların mühüm rol oynadığını deyən müəllif son 16 ildə Azərbaycanda aparılan iqtisadi islahatların ölkənin sürətli inkişafını təmin edən başlıca faktor olduğunu bildirir.

Müəllifin deməsinə görə, nüfuzlu beynəlxalq qurumlar Azərbaycanı dünyanın 10 ən islahatçı ölkəsindən biri kimi dəyərləndirir.

Yazı müəllifi əlavə edir ki, islahatlar sosial-iqtisadi sferanın bütün sahələrini əhatə edir, məqsəd isə ölkənin hərtərəfli inkişafına nail olmaqdır.

Müəllif vurğulayır ki, ərzaq təhlükəsizliyi ilə birbaşa bağlı olduğu üçün islahatların geniş tətbiq edildiyi sahələrdən biri də aqrar sektordur.

Müəllifə görə, aqrar sektor əhatə etdiyi coğrafiyaya və məşğul əhalinin sayına görə də xüsusi çəkiyə malik olduğu üçün kənd təsərrüfatının inkişafı, bu səbəbdən də əhəmiyyətlidir. Bu sektor eyni zamanda sənayenin bir çox sahələri üçün xammal bazası rolu oynayır.

Məqalədə deyilir ki, siyasi rəqabətdən irəli gələrək bir tərəfdən artıq dünyada ərzaq ixracı sanksiya alətinə çevrildiyi, digər tərəfdən dünya əhalisinin sayı artdığı üçün ərzaq təhlükəsizliyi strateji əhəmiyyət kəsb edir.

Yazı müəllifinin deməsinə görə, Azərbaycanda aqrar sahənin inkişafına xüsusi önəm verilir, kənd təsərrüfatında çalışan fermerlər torpaq vergisindən savayı bütün növ vergilərdən azad edilib, onlara dövlət tərəfindən subsidiyalar ödənilir, onlar güzəştli şərtlərlə kreditlər əldə edə bilirlər.

Sonda isə müəllif yazır: “Bu bir daha sübut edir ki, prezident İlham Əliyevin rəhbərliyi ilə aparılan aqrar islahatlar uğurlu olub. Bunun sayəsində ölkənin ərzaq təhlükəsizliyi təmin edilib, üstəlik, xarici bazara məhsul çıxarılaraq valyuta əldə etmək imkanı yaranıb”.

“Modern.az”da yer alan “Azərbaycanda 7 hakimin fəaliyyətinə xitam verilib” sərlövhəli məqalədə ölkədə məhkəmələrin fəaliyyəti müzakirə edilir.

 Müəllif  Məhkəmə-Hüquq Şurasına istinadən son bir ildə 50-dən çox məhkəmədə monitorinqlərin aparıldığını, aşkar edilən pozuntuların 150-dən artıq hakim və məhkəmə sədrinin diqqətinə çatdırıldığını bildirir.

Müəllifin deməsinə görə, yol verilmiş süründürməçilik, sui-istifadə, vətəndaşların haqlı narazılığını doğuran digər pozuntulara, eləcə də korrupsiya əməllərinə şərait yaradan hallara görə ötən il 48 hakim intizam məsuliyyətinə cəlb edilib, 2 nəfərin səlahiyyətlərinə xitam verilib, 7 nəfər vəzifədən azad edilib, son aylarda isə Ali Məhkəmənin 5 hakimi aşağı işə keçirilib, 7 hakimin səlahiyyətinə xitam verilib: “Süründürməçilik, sui-istifadə hallarının, qeyri-prosessual münasibətlərin yolverilməzliyi qeyd edilərək hakim adına və nüfuzuna xələl gətirən halların qarşısının alınması üzrə qəti tədbirlərin görüləcəyi bildirilib”.

“Marja.az”da dərc olunan "Bizi mürəkkəb il gözləyir, proqnoz vermək çətindir" sərlövhəli məqalədə müəllif "Yelo Bank"ın İdarə Heyətinin sədri Nikoloz Şurqaia ilə Azərbaycanın bank sistemindəki vəziyyətlə bağlı söhbətləşir.

Pandemiya şəraitində bank sektorunun hansı çətinliklərlə üzləşəcəyi barədə bank rəhbəri deyir: “Birmənalı şəkildə deyə bilərəm ki, təsir neqativdir. Birinci çətinlik əməkdaşlarımızın və müştərilərimizin fiziki təhlükəsizliyi ilə bağlıdır.

İkinci çətinlik - likvidlik və risklərin idarə olunması, üçüncü çətinlik gəlirliliyin azalması ilə əlaqədardır, çünki bank xidmətlərinə tələbat azalır. Dördüncü çətinlik  kreditlərin keyfiyyətilə bağlıdır.

Onun sözlərinə görə, virus əhalinin və biznesin bir hissəsinin ödəniş qabiliyyətinə mənfi təsir etdi.

Bununla belə, bank rəhbəri böhranın faydaları olduğunu deyərək iddia edir ki, hər bir böhran yeni imkanlara yol açır, böhran bank sektorunda rəqəmsal texnologiyaların tətbiqini sürətləndirəcək.

O, deyir ki, texnologiyalara ciddi investisiya yatırılır, hökumət və bank sektoru bundan sonra da texnologiyaların tətbiqini dəstəkləyəcək.

Bank rəhbərinin sözlərinə görə, bəzi ölkələrdə fiziki olaraq filiala sahib olmayan rəqəmsal banklar mövcuddur, ümid edirik ki, Azərbaycanda da bu cür imkan olacaq: “Kimsə etiraz edə bilər ki, bu, iş yerlərinin azalmasına səbəb ola bilər, elələrilə qismən razılaşa bilərəm, lakin iqtisadiyyatın transformasiyası daha çox iş yerinin yaradılmasına səbəb olacaq.

“Azpolitika.info”da yer alan “Nədən itisadiyyatı pis günə qoydular?”  “Və nədən karantin hər yerdə ləğv edilir!?” sərlövhəli məqalədə iqtisadçı-ekspert Natiq Cəfərli xüsusi karantin reiminin yumşaldılması ilə bağlı tərəddüdlərini ifadə edir.

Müəllifin deməsinə görə, Azərbaycanda xüsusi karantin rejiminin yumşaldılması ilə bağlı birmənalı fikir yoxdur və N.Cəfərli mövcud durumla bağlı tərəddüdləri olduğunu dilə gətirib.

Onun fikrincə, hansı ölkənin karantin tədbirlərinin məntiqsiz olduğunu etiraf edərək ilk olaraq öz vətəndaşlarından üzr istəyəcəyi sual yaradır: “Əgər bu virusun yayılma sürəti deyilən kimidirsə (hər yoluxan, azı 7-10 nəfərə virus yaydığı deyilir) o zaman indi karantin tədbirlərinin azaldılmasının mənası nədir? Yəni, hər bir şəhərdə 10 nəfər virus daşıyıcısı kimi qalacaqsa və karantin olmayacaqsa, həndəsi silsilə ilə həmin şəhərdə bir aydan sonra hamı yoluxacaq axı? Belədirsə, nədən karantin hər yerdə ləğv edilir? Yox, virusla yaşamaq mümkün idisə karantin tədbirlərilə dünya iqtisadiyyatını pis günə qoyaraq nə səbəblə karantin rejiminə keçdilər?   

N.Cəfərli deyir ki, iki ay öncə bütün dünyada karantinin tətbiq edilməsinə səbəb xəstə sayının sürətlə artmamasına, səhiyyə sisteminin gərginlikdən qurtarmasına, reanimasiyada yerlərin tez dolmamasına hesablanmışdı.

Ekspert virusin yerində, xəstə sayının çox  olduğunu, dərmanı, vaksini olmadığını deyərək sual edir: “O zaman niyə karantin hər yerdə yumşaldılır? O zaman bu işin məntiqi nədir? Düşündükcə daha çox cavabsız suallar yaranır”.