Media-icmal 20.06.2016

Müəllifə görə, islahatların nəticəsi...

“Azərbaycan” qəzeti Azərbaycanın BMT-nin İqtisadi və Sosial Şurasına üzv seçilməsinə həsr olunan məqalə ilə çıxış edib.

Məqalə müəllifinə görə, bunun bir səbəbi iqtisadi yüksəliş və sosial rifah halına görə Azərbaycanın öncül ölkələrdən olması, sosial-iqtisadi inkişaf göstəriciləridirsə, digər səbəb demokratik ənənələrin cəmiyyət tərəfindən əxz olunaraq Azərbaycanın “Avropa ailəsi”nin nüfuzlu üzvü kimi tanınmasıdır.

Müəllifin düşüncəsinə görə, ölkədə yürüdülən siyasət bu nəticəyə gətirib.  “Prezident İlham Əliyevin müasir dünya reallıqlarını düzgün qiymətləndirməsi, qlobal proseslərə xalqın mənafeyinə uyğun nüfuz etmək bacarığı, respublikanı qısa zamanda güclü dövlətə çevirməsi onun həm daxildə, həm də ölkə hüdudlarından kənarda siyasi dəstək almasına ciddi zəmin yaradıb”. 

Müəllifə görə, ölkədə güclü iqtisadi islahatlar gedir və buna görə də 189 ölkə arasında dünyada 63-cü yeri tutur. Müəllif bunu da iddia edir ki, Azərbaycan rəqabət qabiliyyətliliyi baxımından hətta “Böyük-20-lik” ölkələrinin 8-ni qabaqlayır. Son vaxtlar xarici iş adamları bir yana, hətta yerli iş adamlarının xarici ölkələrə sərmayə yatırmaları haqda ekspertlərin açıqlamalarına baxmayaraq, müəllif Azərbaycanın xarici sərmayə üçün maraqlı ölkə kimi qalmaqda davam  etdiyini bidlirir.

Müəllif deyir ki, Azərbaycanın regionda sülh, sabitlik və iqtisadi əməkdaşlıq təşəbbüslərini fəal dəstəkləməsi fonunda BMT-nin İqtisadi və Sosial Şurasına  (ECOSOC)  seçilməsi ölkənin sosial-iqtisadi sahədə əldə etdiyi uğurlara beynəlxalq ictimaiyyətin verdiyi yüksək qiymətdir. Xatırladaq ki, Azərbaycan yalnız 2003-2005-ci illərdə ECOSOC üzvü olub.

Bütünlükdə isə bu quruma üzv seçilmək belə dəyərləndirilir: “Azərbaycanın növbəti dəfə ECOSOC-un üzvü olması bütövlükdə müasir tariximizin ən əlamətdar, qürur doğuran hadisələrindən biri kimi yadda qalacaq”.

Bu Qərb, bu da Rusiya: dost kim, düşmən kim?

“Azadlıq” qəzeti Qarabağ münaqişəsi fonunda Azərbaycanın Qərb və Rusiya ilə münasibətlərinə dair “ABŞ 1.3 milyardlıq yardım edib, bəs Rusiya?”  sərlövhəli məqalə ilə çıxış edib.

Müəllif  buna səbəb kimi rəsmi Bakının Qarabağ məsələsinə bağlı ictimai rəydə  Qərbi daim düşmən, Rusiyanı isə dost kimi təqdim etməsini göstərir. 

Bu günlərdə Tərtərə səfər edən ABŞ səfiri Robert Sekuta jurnalistlərə 1993-cü ildən bu yana ABŞ-ın Azərbaycana yardımlarının həcminin 1.3 milyon dollar olduğunu bildirib. Müəllif bu istiqamətdə ABŞ-ın 22 ştatının Xocalı soyqırımını tanımasını da vurğulayaraq hakimiyyəti Qərblə geniş münasibət müstəvisi qurmamaqda tənqid edir. “Hakimiyyət dünyanın ən nüfuzlu dövlət qurumlarının birmənalı dəstəyinfən yararlanmaq əvəzinə dəstək verənləri düşmən kimi təqdim edib, onlara qarşı təbliğat aparıb. Amma Azərbaycanın faciələrinə müəlliflik etmiş Rusiyanın tərəfini tutub və bu ölkəyə sədaqət nümayiş etdirib”. Müəllif Qərbin Azərbayacana dəstəyinə münasibətindən sonra Rusiyanın Azərbaycana münasibətinə mövqe ifadə edir: “Adekvat addımları Rusiya atıbmı? Bu ölkənin məcburi köçkünlərə yardımı, Qarabağ məsələsində birmənalı dəstəyi olubmu? Əlbəttə ki yox. Əksinə, düşməni maddi, mənəvi, hərbi, siyasi baxımdan birmənalı dəstəkləyib, erməni soyqırımını tanıyıb və s”.

Müəllifə görə, rəsmi Bakının Rusiya ilə dost olmasının səbəbi ondan demokratikləşmə tələbinin olmamasıdır; “Pulu verən, ədalətli mövqe sərgiləyən ölkələrlə düşmənçilik edib, düşmənlə dostlaşmaq xəyanət deməkdir. Çünki hökumətimiz demokratiya, şəffaflıq, ədalət ilə də düşməndir. Rusiya isə hakimiyyətdən bu dəyərlərlə dost olmağı tələb etmir ”.        

Danışıqlar  ətrafında müəmma artır  

“Yeni Müsavat” qəzeti isə Qarabağ münaqişəsinin  həllilə bu gün Sankt-Peterburqda gözlənilən Azərbaycan və Ermənistan dövlət başçıları İlham Əliyev və Serj Sarkisyanın  görüşü barədə təhlillə çıxış edib. Məqalədə bu görüşə o qədər də nikbin yanaşma yoxdur və buna səbəb kimi təəşəbbüsün Rusiyadan gəlməsi göstərilir: “Bu dəfəki görüş 16 may Vyana görüşünün və o çərçivədə əldə edilmiş ilkin anlaşmanın davamı olmaya da bilər. Belə görünür ki, Rusiya sırf özünün atəşkəsə nəzarət mexanizmini təklif edə bilər”. 

Ekspertlərin fikrincə, Rusiya bu görüşə “Kazan formulu” ilə gəlir, bu isə ilkin mərhələdə Qarabağ ətrafında 5, yaxud 6 rayonun qaytarılması deməkdir.

Ekspertlər regionda emosiyaların yüksək olduğunu xatırladır, müharibə başladığı halda onu 2-5 apreldə olduğu kimi dayandırmağın asan olmayacağını vurğulayırlar.

Digər  tərəfdənsə ekspertlər dövlət başçısı İlham Əliyevin bəyanatanı  xatırladırlar: “Vasitəçilər də başa düşməlidirlər ki, bu münaqişə dondurulmuş deyil, aprel döyüşləri Ermənistan rəhbərliyinə yaxşı dərs oldu. Azərbaycan qazandığıü üstünlüyü heç vaxt əldən verməyəcək”.