Media-icmal

Ölkədə elektrik enerjisi istehsalının gücləndirilməsi, tələbilərin kirayə ev qayğıları, leş ətlərinin istehlak şəbəkəsinə daxil ola bilməsinin fəsadları və s. məsələlər bugünkü (14 may. 2019-cu il) medianın aparıcı mövzularındandır.

İdxaldan ixracatçıya çevrilən sahə

"Azərbaycan" qəzeti "Azərbaycan elektrik enerjisinin idxalçısından ixracatçısına çevrilib" (http://www.azerbaijan-news.az/view-173891/azerbaycan-elektrik-enerjisinin-idxalcisindan-ixracatcisina-cevrilib) sərlövhəli məqalədə ölkənin elektrik enerjisi sahəsindəki inkişafını dəyərləndirir.

Müəllif deyir ki, müstəqilliyin bərpasından sonra Azərbaycanda nəhəng infrastruktur layihələri icra edilən sahələrdən biri də elektrik enerjisi sahəsi idi ki, əhalini dayanıqlı elektrik enerjisi ilə təmin etməyi hədəfləyirdi: "Məqsədə çatmaq üçün ötən dövrdə ölkə üzrə 31 yeni elektrik stansiyası inşa olunub ki, bunun da sayəsində 2500 meqavatlıq yeni güc yaranıb. İri su elektrik stansiyaları ilə yanaşı, bölgələrdə kiçik çaylar üzərində də elektrik stansiyaları inşa edilib. Həmin obyektlər bölgədə elektrik enerjisinin təminatını yaxşılaşdırmaqla bərabər torpaqların suvarılmasına da töhfə verir".

Müəllif əlavə edir ki, başqa sahələrlə birgə Azərbaycanda elektrik enerjisinin gücünün artırılması, dayanıqlığının təmin olunaraq ölkənin hər bir guşəsinə çatdırılması üçün mükəmməl infrastruktur yaradılıb: "Bunun nəticəsidir ki, indi biz özümüzü elektrik enerjisi ilə tam təmin etməklə bərabər onu həm də böyük həcmdə ixrac edirik. Təkcə ötən il enerji ixracından 10 milyon dollar vəsait əldə olunub.

Prezident İlham Əliyev bu il sentyabrın 5-də Bakıda "Şimal-2" elektrik stansiyasının istismara verilməsi mərasimində iştirak edib".

Daha sonra müəllif məqalədə haqqında bəhs edilən stansiyanın yaradılmasının tarixi, fəaliyyəti, istismardan çıxarılması barədə məlumat verir və 2011-ci ildə "Şimal-2" elektrik stansiyasının təməlinin qoyulduğunu bildirir.

Məqalə müəllifi həmçinin stansiyanın tikintisi, enerji istehsalı üçün Yaponiyanın "Mitsubishi" şirkətinin istehsalı olan 138 MVt gücündə buxar, 267 MVt gücündə qaz turbinləri, 560 MVA gücündə elektrik generatoru və onların köməkçi sistemlərin quraşdırıldığını bildirir.

Müəllif deyir ki, yeni elektrik stansiyası 57,4 faiz faydalı iş əmsalına malikdir ki, bu, Cənubi Qafqaz regionunda ən yüksək faydalı iş əmsalı deməkdir və elektrik stansiyası il ərzində 32,2 milyard KVts elektrik enerjisi istehsal edəcək.

Yazıda vurğulanır ki, istismar edilən və istismara yeni verilən "Şimal-1" və "Şimal-2" elektrik stansiyalarının bir üstünlüyü də ətraf mühitə mənfi təsir

göstərməməsidir ki, bu məqsədlə stansiyada xüsusi ekoloji monitorinq sistemi, sənaye tullantılarının və çirkab suların təmizlənməsi, digər qurğular inşa edilib.

Yazının sonunda isə oxuyuruq: "Bütün bunlar isə ümumilikdə ölkəmizin iqtisadi potensialının möhkəmləndirilməsi istiqamətində dövlət tərəfindən atılan addımların ardıcıl və məqsədyönlü şəkildə davam etdiyini göstərir".

Tələbələrin icarə ev "problemləri"

"Yeni Sabah.az"da isə "Hansı universitetin tələbələri daha çox kirayə ödəməli olacaq?-araşdırma" sərlövhəli (https://yenisabah.az/hansi-universitetin-telebeleri-daha-cox-kiraye-odemeli-olacaq) məqalə diqqəti çəkir.

Müəllif yeni tədris ilinin başlanması ərəfəsində olduğu üçün tələbələrin paytaxta axınının müşahidə olunduğunu deyərək Bakıda kirayə mənzillərin qiymətləri barədə araşdırmasını təqdim edir.

Yazı müəllifinin deməsinə görə, tələbələrin çoxu avqust ayından kirayə ev axtarışına çıxırlar, amma belə evlərin bahalılığı və şəraitsizliyi səbəbilə ev tapmaq işi dərslərin başladığı günə qədər uzana bilir.

Müəllif bunu da əlavə edir ki, ötən illərdə də müşahidə olunduğu kimi, avqustun sonu, sentyabrın əvəllərində ev sahibləri qiymətləri artırırlar və evlər baha olduğu üçün bir neçə tələbə birləşərək bir mənzil kirayələyirlər.

Müəllif əmlak alqı-satqısı ilə məşğul olanlara istinadən ən çox mənzil axtaranların Bakı Dövlət, İqtisad, Sənaye və Neft, Tibb universitetlərinin tələbələrinin olduğunu bildirir.

Müəllif deyir ki, Bakı Dövlət Universiteti və bir sıra digər ali məktəblərin yerləşdiyi metronun "Elmlər Akademiyası" stansiyası yaxnlığındakı evlərin qiymətlərilə maraqlanıb: "Demək olar ki, bütün birotaqlı mənzillər 350, ikiotaqlılar 450-500, üçotaqlı mənzillər isə 500 manat və daha yuxarı qiymətədir.

Məqalədə vurğulanır ki, Neft və Sənaye Universitetinin yerləşdiyi metronun "28 May" stansiyası ətrafdakı mənzillərdə birotaqlı olmaqla 350 manatdan başlayır, ikiotaqlılar 500-550 manata təqdim edilir, üçotaqlılar isə 600 manata və daha yüksək qiymətə icarəyə verilir.

Müəllifin deməsinə görə, İqtisad Universitetinin yerləşdiyi "Gənclik" və "İçərişəhər" metrostansiyaları yaxınlığındakı binalarda mənzil kirayələmək daha baha başa gəlir.

Məqalə müəllifi deyir ki, metronun "Gənclik" stansiyası yaxınlığında birotaqlı ev 400 manata, ikiotaqlı 400-450 manata icarəyə verilir.

Müəllifə görə, metronun "İçərişəhər" stansiyası yaxınlığındakı mənzillər tələbələr üçün xəyaldır, belə ki, burada ikiotaqlı evlərin icarə qiyməti 600 manatdan başlayır, üçotaqlı mənzil isə 800 manata icarəyə verilir və bundan aşağı qiymət yoxdur.

. Müəllif bunu da diqqətə çatdırır ki, tələbələrin daha çox üstünlük verdikləri həyət evlərində şərait xeyli pis olsa da mənzillərlə müqayisədə 50-100 manat daha ucuz verilir.

Müəllif vurğulayır ki, paytaxt mərkəzindən uzaqlaşdıqca ucuz evlər tapmaq şansı da artır, amma nəqliyyat tıxaclarını, dərsə gecikmə ehtimalalrını nəzərə alan tələbələr ali mktəbdən uzaq olan evlərin əlvrişli olmadığını düşünürlər.

Belə şəbəkələr adətən kimlərinsə himayəsində olur

"Yeni müsavat" qəzetində isə "Dövlət qurumları səfərbər oldu: Dövriyyədəki tonlarla leş əti haralarda qarşımıza çıxa bilər?" sərlövhəli məqalə oxumaq olar. (https://musavat.com/news/dovlet-qurumlari-seferber-oldudovriyyedeki-tonlarla-les-eti-haralarda-qarsimiza-cixa-biler_641825.html) .

Müəllif bu günlərdə Abşeronda mütəşəkkil dəstəyə məxsus anbarlardan satış üçün nəzərdə tutulan 40 ton mənşəyi məlum olmayan, yararsız, ölü heyvan ətinin aşkar edildiyini, bu şəbəkəyə məxsus 8 nəfərin həbs olunduğunu bildirir.

Müəllif bu ətlərin istehlak bazarına daxil ola bilməsi və fəsadları barədə doktor Adil Qeybulla ilə söhbətləşir.

Leş ətinin və mənşəyi bəlli olmayan, saxlanma şəraiti düzdün olmayan ətlərin qəbulu insan orqanizmində ciddi fəsadlar yaradır. Bunu isə "Yeni Müsavat"a tibb elmləri doktoru A. Qeybulla bildirib.

Onun sözlərinə görə, bu gün istər kolbasa istehsalında, istərsə də, konservləşdirilmiş ət məhsullarının istehsalında mənşəyi bilinməyən, yararsız halda olan ət məhsullarından istifadə edilir: "Həmçinin istehlak müddəti bitmiş ət məhsulları yenidən işlənilir. Belə şayiələr də gəzir ki, Azərbaycana idxal olunan ətin əksər hissəsi musson yağışlarında ölən heyvanların ətidir. İstər ölkəyə idxal olunan, istərsə də, istehsal olunan ət və ət məhsullarının keyfiyyət parametrləri haqqında yüksək danışmaq çətindir. Daim eşidirik ki, dönərdən zəhərlənmə oldu, ictimai iaşə müəssisələrində kütləvi zəhərlənmə oldu. Deməli, həmin ərzaq məhsullarının istehsalı, daşınması, saxlanılması, utilizasiyası və bütövlükdə dövriyyəsi proseslərinin pozulması ilə bağlıdır".

A.Qeybulla hesab edir ki, belə leş şəbəkələri adətən kimlərinsə himayəsində olur: "Lakin bəzən son anda hansısa şəkildə onların cinayət əməli aşkarlanır, kimlərsə cəzalanır. Ancaq şəbəkə fəaliyyətinə bəzən davam edir.

Təəssüflər olsun ki, ölkədə ət və ət məhsullarının baytarlıq nəzarətindən keçməsi formal xarakter daşıyır. Ətin üzərinə möhür vurulsa da, tərkibi yoxlanılmır. Ona görə son vaxtlar ölkədə bruselyoz, qarayara kimi xəstəliklər artır, hətta bəzən ölümlə nəticələnir. Bu cür ətlərin qəbulu insanlarda müxtəlif

xəstəliklərə, o cümlədən zoonoz infeksiyalarına səbəb olur. Bruselyoz, Sibir xorası, toksoplazmoz kimi problemlərə gətirib çıxarır".