Media-icmal

“Azərbaycan” qəzeti  “Prezident: 30 ilin əziyyəti, 30 ilin ümidsizliyi, 30 ilin əzabları xalqımızı sındırmadı, iradəmizə heç bir mənfi təsir göstərmədi” sərlövhəli məqalədə dövlət başçısı İlham Əliyevin bu gecə xalqa müraciətindən sitatlar verir. (http://www.azerbaijan-news.az/view-204026/prezident-30-ilin-eziyyeti-30-ilin-umidsizliyi-30-ilin-ezablari-xalqimizi-sindirmadi-irademize-hec-bir-menfi-tesir-). 

Ümumiyyətlə, qəzetin bugünkü sayında demək olar ki, bütün yazılar bu müraciət əsasında hazırlanıb.

“Bu, bizim hamımızın qələbəsidir, bütün Azərbaycan xalqının. Azərbaycan xalqı bir daha göstərdi ki, nə qədər böyük xalqdır, nə qədər vətənpərvər xalqdır, nə qədər dəmir iradəyə malik olan xalqdır. Dövlət başçısı xalqa müraciətində söyləyib.

Prezident vurğulayır ki, 30 ilin əziyyəti, 30 ilin ümidsizliyi, 30 ilin əzabları xalqı sındırmadı, iradəsinə heç bir mənfi təsir göstərmədi. 

Onun fikrincə, əksinə, xalq daha da bütövləşdi, daha da mətinləşdi, daha da gücləndi, özünü toparladı: “Dedik ki, artıq yetər, biz bu işğala dözməyəcəyik. Dedik ki, düşməni torpaqlarımızdan qovacağıq! Heç bir danışıqlar bizi maraqlandırmır”. 

İ.Əliyev deyib ki, son bir il ərzində danışıqlar haqqında, ümumiyyətlə, söhbət aparmır (1994-cü ildən bu yana ATƏT-in Minsk Qrupu formatındakı danışıqlar nəzərdə tutulur-red). 
“Azərbaycan xalqı bunu bilir. Mən müharibədən əvvəl deyəndə ki, “mən bilirəm nəyi nə vaxt etmək lazımdır, əminəm ki, xalqımızın mütləq əksəriyyəti başa düşürdü mən nəyi nəzərdə tuturam və səbrlə bu günü gözləyirdi, mənə inanırdı, prezident kimi, ali baş komandan kimi inanırdı, gözləyirdi və bu gün gəldi. Dedik yetər artıq, bu əsarət yetər! Bizim şəhərlərimiz əsarət altında nə qədər qalacaq?! Mənfur düşmən bizim təbiətimizi nə qədər murdarlayacaq, bizim torpağımızda gəzəcək, yeyəcək, içəcək, rəqs edəcək, bizi təhqir edəcək. Dedik ki, düşmənə yerini göstərəcəyik, düşməni torpaqlarımızdan qovacağıq və qovduq da!”, -bildirir.

“Müsavat.com” saytı “Ağdam, Kəlbəcər, Laçın qaytarılır, Naxçıvan blokadadan azad olunur.İmzalanan tarixi anlşamanın mahiyyəti barədə”  
(https://musavat.com/news/agdam-kelbecer-lacin-qaytarilir-naxcivan-blokadadan-azad-olunur-imzalanan-tarixi-anlasmanin-mahiyyeti-barede_752699.html) adlı yazıda sənədi dəyərləndirir.  

Bu gecə, yəni, noyabrın 10-da Azərbaycan prezidenti İlham Əliyev, Rusiya prezidenti Vladimir Putin, Ermənistan baş naziri Nikol Paşinyan arasında hərbi əməliyyatların dayandırılması, Ermənistan hərbi qüvvələrinin Azərbaycandan çıxarılmağa başlanılması barədə bəyanat imzalandı.  

Azərbaycan, Rusiya prezidentləri və Ermənistanın baş nazirinin birgə imzaladıqları bəyanat mahiyyət etibarilə Ermənistanın kapitulyasiyası kimi dəyərləndirilir. 

Müəllif deyir ki, haqqında bəhs olunan birgə bəyanatda Ermənistan öz üzərinə öhdəlik götürür ki, qarşıdan gələn 20 gün ərzində Azərbaycanın işğal altında olan Ağdam, Kəlbəcər və Laçın rayonlarından qoşunlarını çıxaracaq. “Nəticə etibarilə, qarşıdan gələn qış mövsümündə qan tökülmədən, itki verilmədən ərazi baxımdan böyük rayonlarımız da işğaldan azad olunur. Rusiya və Türkiyə sülhməramlılarının əraziyə gəlməsi Ermənistan qoşunlarının Azərbaycanın işğal olunmuş ərazilərindən çıxarılması ilə sinxron qaydada aparılır”.

Sənədə görə, Rusiya Silahlı Qüvvələri sülhməramlı statusda məhdud kontingentlə əraziyə yerləşdirilir. Sülhməramlıların yerləşmə müddəti 5 il müəyyən olunur.

Münqaişənin həlli prosesində Türkiyə də iştirak edir, belə ki, atəşkəs rejiminə nəzarət etmək üçün yaradılacaq birgə monitorinq missiyasında da fəal yer alacaq. “Bu həm də o deməkdir ki, Türkiyə hərbçilərinin prosesdə iştirakı ilə Azərbaycanın maraqlarının əleyhinə hər hansı addımın atılmasının qarşısı alınacaq”. 

Sənədə görə, Rusiya tərəfi Ermənistan ərazisi ilə Naxçıvan ilə dəhlizin yaradılmasını öz üzərinə götürür.

Müəllif vurğulayır ki, özü haqqında məğlubedilməzlik sindromu yaradan Ermənistan Silahlı Qüvvələri qısa müddətdə darmadağın edildi, bundan sonra Ermənistan Silahlı Qüvvələrinə, dövlət olaraq Ermənistana özünü bərpa etmək üçün illər lazım olacaq.

Müəllif vurğulayır ki, bu qələbə azərbaycanlılar haqqında məğlub xalq sindromunu sındırdı, xalqın inamını özünə qaytardı. 

Xatırladaq ki, Qarabağda hərbi əməliyyatlar sentyabrın 27-dən başlayıb. 44 gün davam edən hərbi əməliyyatlar çərçivəsində Azərbaycan Ordusu Ermənistanın 30 il ərzində qurduğu silahlı qüvvələrini darmadağın etdi, Cəbrayıl, Qubadlı, Zəngilan, Füzuli rayonlarını, Xocavənd rayonunun böyük hissəsini, Laçın rayonunun bir sıra kəndlərini işğaldan azad etdi. Ümumilikdə, hərbi kampaniya dövründə 5 şəhər, 4 qəsəbə, 286 kənd, çoxsaylı strateji yüksəkliklər işğaldan azad edildi.

“Mətbuat.az” saytı “Pandemiya sunami kimi iqtisadiyyatı cənginə alıb” açıqlama”  (https://metbuat.az/news/1393682/pandemiya-tsunami-kimi-iqtisadiyyati-cengine-alib.html) sərlövhəli məqalədə COVİD-19 pandemiyasının iqtisadiyyata vurduğu ziyan şərh edilir.  

Müəllif pandemiya nəticəsində Avropaya dəyən ziyanları yada salır, bununla yanaşı, Azərbaycanın da məruz qaldığı itkilər vurğulanır. 
Bu barədə Amaniya Comdirect Bankının baş ofisində maliyyə və investor əlaqələrinə nəzarət şöbəsində çalışan iqtisadçı-ekspert Murad Calalov danışır. 

İqtisadçı deyir ki, indiki vəziyyəti Azərbaycanla səciyyələndirib, demək olar ki, dünyanın hər yerində olduğu kimi pandemiya dalğası ölkə iqtisadiyyatından da yan keçməyib.

M.Calalov vurğulayır ki, birinci COVİD-19 dalğasının səbəbilə iqtisadiyyat 3,9% azalmışdı. Onun deməsinə görə, bu bəzi Avropa  ölkələrinin göstəricilərindən aşağıdır. İqtisadçı vurğulayıb ki, Azərbaycanda yoxsulluq səviyyəsi 5%, işsizlik səviyyəsi 7% civarındadır. M.Cəlalov bunu da əlavə edib ki, Azərbaycanın konvertasiya oluna bilən valyuta ehtiyatları xarici borcundan 6 dəfə çoxdur. 

.M.Cəlalov vurğulayır ki, pandemiyanın hələ ikinci dalğasından öncə  Azərbaycan Ermənistanın azğınlığına cavab olaraq müharibə vəziyyətinə düşüdü.

Onun fikrincə, yuxarıdakı göstəricilər də nəzərə alınsa demək olar ki, ölkə iqtisadiyyatı sarsılmaz, amma bu öz növbəsində iqtisadiyyata da təsirsiz ötüşməz.