Media-icmal 21.01.21

“Azərbaycan” qəzeti  “Azərbaycan xalqı şəhidlərin xatirəsini ehtiram və qürurla yad edir” sərlövhəli məqalədə 1990-cı il yanvarın 20-də baş vermiş hadisələrdə qurban getmiş şəhidlərin anım mərasimini ölkə vətəndaşlarının düşüncələrilə dəyərləndirir.

Müəllif  20 yanvar hadisələri şəhidlərinin xatirələrinin bütün ölkəboyu anıldığını deyir, eyni zamanda builki ziyarətə Qarabağda zəfərin qatıldığını da bildirir: “Azadlığa gedən yolda həyatlarını qurban verən Vətən övladları xalqımızın qəhrəmanlıq salnaməsinə yeni parlaq səhifə yazdılar. 20 yanvar tariximizin həm kədərli, həm də qürurlu səhifəsidir. 20 yanvar faciəsinin 31-ci ildönümü Qarabağ zəfərinin fonunda böyük qürur hissi ilə qeyd olunur”,-  deyə müəllif bildirir.

Vətəndaşların bu hadisələrlə bağlı ifadə tərzləri, deyimləri fərqli olsa da   mahiyyəti dəyişməz olaraq qalır ki, həmin gecə həyatlarını qurban verənlər azadlıq şəhidləridir, 2020-ci ildə 44 günlük Vətən Müharibəsində qazanılmış qələbə ilə  uzun müddət erməni işğalında qalmış topraqlar da azadlığına qovuşub.

İkinci Qarabağ Müharibəsinin qazilərindən biri isə deyir: “Qoy bütün şəhidlərimiz məzarlarında rahat uyusunlar, çünki həm onların qisası alındı, həm də Qarabağımız azad olundu”.

Həmin haidsələrin şahidi olmuş paytaxt sakini isə xüsusən gənclərə illər ötsə də, şəhid olmuş qəhrəmanları heç vaxt unutmamaq tövsiyəsi verir, 20 yanvar hadisələrini milli tarixin qürur və ləyaqət səhifəsi adlandırır.

Digər bir vətəndaş isə 44 gün çəkmiş Vətən Müharibəsində torpaqların erməni tapdağından azad olunması ilə bu il ziyarətdə Azərbaycan xalqının 20 yanvar şəhidləri önündə başını daha dik tutduğunu xüsusi vurğulayır.

“Yenisabah.az”  saytı  “Ekspert tələbələrin təhsil haqqı problemindən danışdı: İndi vəziyyət daha acınacaqlıdır” sərlövhəli məqalədə təhsil sahəsi üzrə ekspert Kamran Əsədov problemn mahiyyətini anladır.

Məqalədə deyilir ki, 2021-ci il yanvarın 11-dən ali və orta təhsil müəssisələrində imtahan sessiyası başlayıb, imtahanlar mövcud şərait daxilində yaxşı təşkil olunub, amma problem  təhsil haqqı ilə bağlıdır”.

Ekspert deyir ki, indi işsizliklə əlaqədar ödənilməyən təhsil haqları ilə bağlı problem yaranıb.

K.Əsədov vurğulayır ki, pandemiya səbəbindən çox sayda insan iş yerini itirib, gəlirləri ciddi şəkildə aşağı düşüb, eyni zamanda ekspert yada salır ki, bu şəxslərin ailə üzvləri təhsi alırlar

“Düzdür, sosial həssas ailə kateqoriyasına aid olanların təhsil haqqını ödəmək üçün 40 milyon manat dövlət vəsait ayrılmışdı və bu vəsaitdən 20 minə yaxın tələbənin 2020-ci ilin II (yaz) semestr və I (payız) semestrin təhsil haqları ödəndi. Bu kateqoriyaya aid olmayanlar isə kənarda qaldı”,- K.Əsədov bildirir.

K.Əsədov iddia edir ki, indi vəziyyət daha acınacaqlıdır, belə ki, ali və orta təhsil müəssisələri tələbələrdən təhsil haqlarını ödəməyi tələb edirlər, əks halda onları semestr imtahanına buraxmayacaqlarını bildirirlər: “Xüsusilə Azərbaycan Texniki Universiteti, Sumqayıt Dövlət Universitetindən bu tipli çoxsaylı şikayətlər daxil olur ki, tələbə təhsil haqqını tam şəkildə ödəməsə, imtahanlara buraxılmır”.

Ekspert  universitet rəhbərlərinə müraciətində mövcud sosial durumu nəzərə alaraq tələbələri imtahana buraxmağı tövsiyə edir.

“Redaktor.az” saytı isə “Vaksinasiya koronavirusun sonu deməkdir?” sərlövhəli məqalədə verilən suala Azərbaycan Həkimləri İctimai Birliyinin təsisçilərindən biri, həkim-radioloq Aydın Əliyevlə cavab axtarılır.

Məqalədə Azərbaycanda COVİD-19 pandemiyası əleyhinə vaksinasiya aparıldığı vurğulanır.

Elə bundan da irəli gələrək müəllif vaksinləşmə prosesilə virusa yoluxmanın  başa çatıb-çatmaması sualını gətirir.

Bununla bağlı açıqlama verən Aydın Əliyev bildirib ki, xəstəlikdən tam qorunmaq üçün 2-4 həftə sonra təkrar vaksinasiya aparılması lazımdır: “Təkrar vaksinasiyadan 2-3 həftə sonra orqanizmə xəstə şəxsdən aktiv virus keçsə də bədəndə yaranmış antitellər daxil olan aktiv virusları öldürə, inaktivləşdirməklə məhv edə bilir” deyə A.Əliyev vurğulayır. Ona görə önəmli məqamlardan biri də budur ki, hər iki vaksinasiyadan təqribən 2-3 həftə keçənə qədər yenə qorunmaq lazımdır ki, antitellər yaranana qədər orqanizmə aktiv viruslar daxil olmasın.

A.Əliyev hesab edir ki, vaksin pandemiyadan qurtulmağın yeganə yoludur, heç bir qorxusu, təhlükəsi yoxdur və bu elmin məhsuludur.

“Azpolitika.info.az” isə “İdarəçilikdə yeni qurum- Xüsusi nümayəndələr işğaldan azad edilən bölgələri necə idarə edəcəklər?” sərlövhəli məqalədə erməni işğalından azad edilmiş ərazilərdə idarəetmə formasını deputat Zahid Orucla dəyərləndirir.

Məsələnin mahiyyəti isə ondadır ki, prezident İham Əiyev azad edilmiş ərazilərdə idarə edilməsi üçün xüsusi nümayəndəliklər  yaradılması barədə fərman imzalayıb. Xüsusi nümayəndələr vəzifəyə prezident tərəfindən təyin edilir və azad edilir.

Deputata görə, adı çəkiən ərazilərdə fərqli idarəetmə siyasətinin tətbiq olunmasına zərurət var. Deputat hesab edir ki, həmin ərazilərdə elə idarəetmə forması tətbiq olunmalıdır ki, birinci, çevik olsun, ikinci, həyata keçirilən siyasətə nəzarəti təmin etsin, üçüncü ictimai-sosial ədalət bərqərar olunsun, yeni çağırışlara adekvat və vaxtında cavab versin.

Z.Oruc deyir ki, həmin rayonların icra hakimiyyətlərinin bunları həyata keçirə biləcəklərinə inam çox aşağı olub: “Bu mülahizələrin qarşısını almaq mümkün deyil. Sosial Tədqiqatlar Mərkəzi kimi icra hakimiyyətləri ilə bağlı sorğular aparılarkən bunlara münasibətin çox aşağı olduğunu görmüşük”.