Media-icmal 22.01.21

"Mətbuat.az" saytı "Məktəblərdə tədris hansı formada bərpa olunacaq" sərlövhəli məqalədə ənənəvi tədrisin bərpası mümkünlüyünü  təhsil eksperti Kamran Əsədovla müzakirəyə çıxarır.   

Müəllif deyir ki, COVİD-19 pandemiyası ilə bağlı Azərbaycanda da ənənəvi təhsil tədrisi distant təhsillə əvəz edilib, amma son vaxtlar yoluxmanın azalması, virusa qarşı peyvəndlənməyə başlanması şəraitində ənənəvi təhsilə keçid ehtimalı artır və bununla bağlı yanvarın 22-də təhsil naziri Emin Əmrullayevin iştirakı ilə brifinq keçirilməsi gözlənilir.

Ekspert K.Əsədov isə deyir ki, məktəblər keçən il sentyabrın 15-də olduğu hibrid formada açıla bilər: "Hesab edirəm ki, qarşıda duran iki məsələ həllini tapacaq. Birinci, orta məktəblərdə tədrisin yenidən bərpası, ikinci isə məktəblərdə məktəb daxili qiymətləndirmə".

Onun fikrincə, ilk yarım il üzrə daxili qiymətləndirmə həyata keçirilməyəcək, çünki 1.6 milyon şagirdi qısa müddətdə bu prosesə cəlb etmək mümkün deyil. Ekspertə görə, ikinci yarım ildə məktəbdaxili qiymətləndirmə həyata keçiriləcək və bu, yekun qiymət olacaq.

Onun sözlərinə görə, yanvarın 22-dəki brifinqdə ali, orta ixtisas və peşə təhsili müəssisslərinin də qismən və mərhələli şəkildə açılması ilə bağlı qərar ola bilər.   

Ekspert ümumiyyətlə bütün kurslar üzrə tədrisin bərpa oluna bilməsini mümkün sayır.

"Moderator.az" saytı isə "Harada görsənib ki, 50 minlik bir etnik qrupa xüsusi status verilsin?" sərlövhəli məqalədə 44 günlük İkinci Qarabağ müharibəsindən sonra bir sıra dünya ölkələrinin Qarabağda yaşayan ermənilərə status verilməsilə bağlı yayılan fikirlərini təhlükəsizlik məsələləri üzrə eskpert İlham İsmayılla müzakirə edir.

İ.İsmayıl deyir ki, müharibədən sonra Qarabağda yaranmış vəziyyət haqqında ABŞ, Rusiya, Fransa başda olmaqla, bir çox ölkələrin siyasətçiləri, analitikləri belə dəyərləndirmələr aparır, təhlillər edir, bölgədə baş verəcək siyasi gedişlər haqqında proqnozlar verirlər.

Ekspertə görə, üstəlik Rusiya sülhməramlıların Qarabağa daxil olmasından sonra perspektiv proseslərin  qələbə çalmış dövlətin istəyi əsasında inkişaf edəcəyinə şübhə ilə yanaşır, əksinə, beynəlxalq aləmin təzyiqi ilə Qarabağın erməni icmasına müstəqilliyə bərabər status veriləcəyinin mümkünlüyünü istisna etmirlər.   

İ.İsmayıl vurğulayır ki, Ermənistan rəhbərliyi də belə bir mövqe oqrtaya qoyur: "Harada görsənib ki, 50 minlik bir etnik qrupa xüsusi status verilsin?

Azərbaycanda ermənilərin sayından çox olan və kompakt yaşayan etnik millətlər var, hamıya statusmu verilməlidir və status birdir: Azərbaycan Respublikasının vətəndaşı"

Ekspert hesab edir ki, bu gedişlə Rusiya sülhməramlıları və sabah ortaya çıxacaq Minsk Qrupu Qarabağ bölgəsində indiki status-kvonu yaxın bir neçə il də saxlamağa çalışacaqlar, odur ki, bu siyasəti pozmaq üçün çox iş görülməlidir.

"Müsavat.com" saytı "Natiq Cəfərli Azərbaycanla Türkmənistan arasında imzalanan müqavilədən danışdı" sərlövəhli məqalədə bu il yanvarın 21-də Azərbaycanla Türkmənistan arasında imzalanmış "Dostluq" yatağının işlənməsilə bağlı anlaşma memorandumunu iqtisadçı-ekspert Natiq Cəfərli ilə dəyərləndirir.

N.Cəfərliyə görə, iqtisadi səmərəsi ilə yanaşı, bu anlaşmanın siyasi və tarixi əhəmiyyəti də var: "Azərbaycanla Türkmənistan arasında bu gün imzalanan müqavilə, bizim "Kəpəz", türkmənlərin isə "Sərdar" adlandırdığı neft-qaz yatağının "Dostluq" adı ilə istismara açılması çox böyük hadisədir.

Bu müqavilə yeni yaranmaqda olan de-fakto ittifaqların növbəti de-jure təzahürü, Bakı-Ankara-London əməkdaşlığının regionda daha bir uğurudur", deyə N.Cəfərli vurğulayıb.

Ekpertin sözlərinə görə, bu anlaşmanın baş tutumasnda Avropa Birliyinin də böyük rolu oldu, son illərdə AB-nin Enerji Komissarı Aşğabada dəfələrlə səfər etmişdi.

N.Cəfərli deyir ki, AB üçün türkmən qazının Azərbaycan üzərindən Avropaya çatdırılması həmişə prioritet olub: "Buna maneə isə həmişə Şimaldan gəlirdi, indi Rusiyanı "Şimal-Axını-2" layihəsində ciddi "sıxaraq" Xəzərdə maneçilik etməməyə məcbur edirlər - çox maraqlı və çoxpilləli "oyun" qurulub".

Ekspert vurğulayır ki, Türkmənistan qazının TANAP-TAP yolu indi daha aydın görünür, belə ki, bu gün imzalanan müqavilənin təməli bir il əvvəl, 2020-ci ilin yanvarında qoyulmuşdu və qısa zaman kəsimində həyata keçməsi çox yaxşı oldu.