![Media-icmal 23.04.19](https://turan.az/resized/750/500/resize/media/2019/main/042300018370.jpg)
"Formula-1" yarışlarına son hazırlıqlar, hüquqi şəxslərin problemli kreditlərinin ödənilə bilməsi mümkünlüyü ətrafında müzakirələr, sahibsiz heyvanların paytaxt küçələrindən yığışdırılması və s. məsələlər bugünki (23 aprel 2019-cu il) medianın aparıcı mövzularındandır...
Sürət yarışına iki gün qaldı
"Azərbaycan" qəzeti "500 milyondan çox insan Azərbaycanı izləyəcək" sərlövhəli məqalədə "Formula-1" Azərbaycan "Qran-pri" yarışlarına son hazırlığı və onun ölkə həyatında əhəmiyyətini dəyərləndirir.
Müəllif deyir ki, Azərbaycan bir çox beynəlxalq musiqi və idman yarışlarına ev sahibliyi edib, hazırda isə artıq 4 ildir dünyanın bir nömrəli avtomobil yarışına - "Formula-1"ə ev sahibliyi edir.
Yarışların aprelin 26-28-də keçiriləcəyini vurğulayan müəllif bu müddətdə "Formula-1" Azərbaycan Qran-prisini 500 milyondan çox tamaşaçının izləyəcəyini deyərək, bunu dünyanın diqqətinin yenidən Azərbaycana yönəlməsi adlandırır.
Müəllif deyir ki, bu yarışların dünyada kifayət qədər azarkeşləri var, bunu nəzərə alan Bakı Şəhər Halqası (BŞH) tamaşaçıların yarışı canlı və təhlükəsiz izləmələrinə hər cür imkan yaradıb, BŞH-nin müxtəlif yerlərində tribunalar quraşdırılıb.
Müəllifin sözlərinə görə, dünyanın ən böyük informasiya holdinqləri, eləcə də 100-dən çox ölkənin xəbər agentlikləri bu yarışlarla bağlı xəbərləri dünyaya yayacaq.
"Bakıda sadəcə möhtəşəm yarış keçirilməyəcək, həmçinin bu tədbir vasitəsilə paytaxtımız və ümumilikdə milli mədəniyyətimiz dünya ictimaiyyətinə təbliğ ediləcək. Azərbaycanın dünyada daha geniş səviyyədə tanıdılmasında bu tədbirin əhəmiyyəti çox böyükdür", müəllif bu yarışların idmandan kənar əhəmiyyətini diqqətə çatdırır.
Müəllifə görə, sürət həvəskarlarını möhtəşəm yarış gözləyir, yarışların keçirildiyi şəhər treki BŞH adlanır, 20 müxtəlif çətin döngəli və 6 km-lik uzunluğu ilə 51 dövrədə başa çatacaq.
Məqalə müəllifinin sözlərinə görə, yarış marşrutu elə seçilib ki, izləyicilər tarixi Bakı ilə modern Bakını vəhdətdə görə biləcəklər.
Müəllif deyir ki, layihənin müəllifi bütün müasir "Formula-1" treklerinin memarı olan Herman Tilkedir, ümumilikdə 30 minə yaxın tamaşaçı eyni anda yarışı tribunalardan canlı izləyə biləcək, start və finiş xətti "Azadlıq" meydanında olacaq.
Daha sonra müəllif marşrutdakı döngələr, onların özünəməxsus xüsusiyyətləri barədə məlumat verir, sonda isə oxuyuruq: "Beləliklə, yalnız Cənubi Qafqazın deyil, Avropanın tolerantlıq, sülh və inkişaf mərkəzlərindən biri kimi tanınan Azərbaycan "Formula-1" ilə uğur estafetini növbəti dəfə layiqincə davam etdirəcək".
Sahibkarların da kredit problemi gündəmə gəlir
"Yeni Sabah.az"da isə "Sahibkarların kreditlərilə bağlı təkliflər hazırlanır - Yeni güzəştlər" sərlövhəli məqalə oxumaq olar.
Müəllif 2015-cildə manatın iki devalvasiyası nəticəsində ciddi maddi ziyana düşmüş fiziki şəxslərə kompensasiya ödənilməsi fonunda eyni maddi taleyi yaşamış hüquqi şəxslərə də dövlət dəstəyi göstərilə biləcəyi mümkünlyünü Milli Məclisin İqtisadi siyasət komitəsinin üzvü, deputat Vahid Əhmədovla müzakirə edir.
"Ümumiyətlə, problemli kreditlərlə bağlı təkliflər var. Bizim də təkliflərimiz var. Amma əsas məqsəd hüquqi şəxslərlə əlaqədardır. Çünki Azərbaycanda iki devalvasiyadan sonra hüquqi şəxslər, sahibkarlar da çox böyük əziyyət çəkiblər".
Bu sözləri parlamentin İqtisadi siyasət komitəsinin üzvü, deputat Vahid Əhmədov "yenisabah.az"a açıqlamasında bildirib.
V.Əhmədovun sözlərinə görə, sahibkarların hüquqlarının müəyyən qədər bərpası üçün göstərişlər var: "Hətta aldığım məlumata görə, cənab prezidentin göstərişi var. Maliyyə qurumları bu işlə əlaqədar müəyyən təkliflər hazırlayırlar. Nə vaxt prezidentə təqdim olunacaq, baxılacaq onu deyə bilmərəm. Bizim də müəyyən təkliflərimiz var. Təklifləri hazırlamışıq, yəqin ki, bu yaxınlarda təqdim edəcəyik. Bu təkliflərə baxılmasının tərəfdarıyıq".
Deputat 10 min dollara qədər fiziki şəxslərlə əlaqədar kreditlərə güzəştlər edildiyini vurğulayaraq, sahibkarların da çox böyük ziyana düşdüklərini bildirir.
V.Əhmədov hansı güzəştlərin nəzərdə tutulduğunu qabaqcadan demək istəmədiyini bildirib və mövqeyini belə əsaslandırıb: "Çünki təkliflər müxtəlifdir, müəyyən variantlar var. Hansı qəbul olunacaq, o artıq prezidentin səlahiyyətində olan məsələdir. Əsasən, hüquqi şəxslərlə əlaqədardır. Bizi narahat edən odur. Azərbaycanda sahibkarlığın inkişafına təkan vermək üçün ziyana düşmüş hüquqi şəxslərin müəyyən yardıma ehtiyacları var".
Deputat 10 min dollara qədər kreditlərə görə kompensasiyaların verilməsinin qurtarmasını, nəticənin necə olacağını izləməyi vacib sayaraq, ondan sonra bu məsələyə diqqət yetiriləcəyini bildirir.
Müəllif deyir ki, V.Əhmədov 10 min dollardan yuxarı krediti olanlarla bağlı petisiya (imza toplanması - red.) yaradılmasının təsirindən də danışıb: "Hər şeyin bu məsələlərə təsiri ola bilər, həmçinin petisiyanın da. Elə hesab edirəm ki, petisiya da müəyyən qədər təsir göstərə bilər. Bu məsələlərə çoxdan baxılır, biz Milli Məclisdə bu problemlərə nə qədər toxunmuşuq, təkliflərimiz olub, müəyyən hissəsi qəbul olunub. Hesab edirəm ki, bu proses davam edir. Yəqin ki, müəyyən variantlar üzərində iş gedir. Onlara baxılacaq".
Xatırladaq ki, 2015-ci ilin fevral və dekabr aylarında devalvasiya nəticəsində dollar manata nisbətdə 2 dəfədən çox bahalaşdı. Bundan irəli gələrək, dollarla götürülmüş kreditlərin ödənilməsində problem yarandı. İstər fiziki, istərsə də hüquqi şəxslər məhkəmələrə verildi. 2019-cu il fevralın 28-də prezident 10 min dollara qədər krediti olan fiziki şəxslərin problemlərinin həlli üçün fərman imzaladı. Aprelin 22-dən həmin kompensasiyaların ödənilməsinə başlanılıb.
600 min sahibsiz it və paytaxt küçələri - iddia
"Modern.az"da isə "Bakıda 600 mindən çox sahibsiz it var və sayları artmaqdadır - təhlükə" sərlövhəli məqalə diqqət cəlb edir.
Müəllif bu günlərdə paytaxtın Binəqədi rayonunun Sulutəpə qəsəbəsində sahibsiz bir itin 2015-ci il təvəllüdlü Hüseyn Məmişovun sifətini parçalaması fonunda problemin aktuallaşdığını bildirir.
Müəllifin sözlərinə görə, paytaxtın mərkəzində, xüsusilə də şəhərətrafı qəsəbələrdə sahibsiz itləri görmək adi hala çevrilib, uşaqlar bu sahibsiz itlərin hücumlarına daha çox məruz qalırlar.
Müəllif iddia edir ki, belə faktlar günü-gündən artır, ən təhlükəlisi də hücum edən itin quduz olmasıdır.
Respublika Gigiyena və Epidemiologiya Mərkəzinin məlumatına istinadən müəllif deyir ki, 2018-ci ildə 15 mindən artıq adamı sahibsiz heyvan dişləyib ki, onlardan da 13 mini it dişləməsidir.
Müəllifin sözlərinə görə, Balaxanı qəsəbəsində "Toplan" sahibsiz itlərə qayğı mərkəzi yaradılıb, bir çox başqa tədbirlər icra edilib, amma sahibsiz itlərin artımı və yaratdığı təhlükə qalmaqdadır.
Müəllif deyir ki, hazırda paytaxt ərazisində 600 mindən çox sahibsiz it var və onların sayı artmaqdadır, sahibsiz itlərin artması sakinlər, elə paytaxta gələn çoxsaylı qonaqlar üçün ciddi təhlükə yaradır.
Yazı müəllifi axşam saatlarında, işıqlandırmanın zəif olduğu məhəllədaxili yollarda sahibsiz itlərin qorxusundan insanların evdən çıxmağa ehtiyat etiklərini deyir, həm də bunu insanların saqlamlığına açıq-aşkar təhlükə adlandırır.
Yazı müəllifi bu istiqamətdə təhlükəsizliyin təmin olunmamasından ciddi narahatlıq da ifadə edir: "Bəs biz nəyi gözləyirik, gözləyirik ki, Binəqədidəki hadisə başqa yerlərdə də baş versin, uşaqlar, böyüklər ziyan çəksin?!", deyə eitrazını dilə gətirir.
Müəllifə görə, bəziləri heyvanların hüquqlarının müdafiəsində ifrata vararaq bu heyvanların küçələrdən yığışdırılmasına maneçilik törədirlər: "Onlar başa düşmürlər ki, xəstə, sahibsiz heyvanlar övladlarımız, elə özümüz üçün ciddi təhlükə mənbəyidir", deyə müəllif mövqeyində haqlı olduğunu iddia edir.
Rəy yaz